Matyuu 22

Kwolabolo yoma'nyo'moneyokwe lubullu doto tovino yovekurajokwono

(Luuk 14:16-24)

1Aki Jisasol yovekurajo kuuguudo puruv aro kuudokaikono. 2“Muunyu kai'muuda'ai aguto kig mido mollomwalo tovi dolago tomuu kuulomwallo'mo tov aro to'busukokwono. A'mwo aguto kig pwol gamoro kwolaiyo toollu abolo uumaso'mo toga lubullu doto kwosokaikono. 3Toro wosuno sumaiyokwe a'mwo aguto kig su tool lubullu doto su tovi biyonomwallo'moneyokwe a'mwo abolo me'no ajesungiko ton abupureyokwe gamoro ki'nato womdokwe pworai amodapiyokaikono. Toro amodapiyoka su tooro plaino sumaveyokwe a'mwo abolo lubullu doto tovi biyonomwallo'moneyokwe me'no ajesungiko tonyu kuudoporogano. Toro kuudopo kuvi kuruv a'mwo abolo su ton lubullu doto tovi biyonomwallo'mo tovino mwinopogano. 4Toro te a'mwo aguto kig tool aki aiko te gami ki'nato womdokwe pworai modapiyo'no aro kuudokaikono. “Kevu bolokwopi a'mwo abolo lubullu doto tovi biyanyo'moneyokwe me'no ajesungiko tonyu duujulo. Oo a'mwo aguto kig tool gamoro wosamujuko ton me'no sovrovaikubwemokaikono. Aki toro tool buulmokau toorogai'aro buulmokau taiyo inuuguutowopinodo toorogai'aro toorai movailodowo muugupto ton me'no adovorojosumokaikono. Aki yiuwi'nokai lubullu doto tovi yanyo'moneyokwe wosamujuko ton me'no sovrowosumokaikono. Toro te kevu lubullu doto su tovi neya biyonomwallulo.” Toro duujulo.” Kuudokaikono.

5Toro kuudopo kworo kuruv muu'nyubusuko to'no ino sumaveyokwe pwolno pwolnodo tooro gomno gomno kuugollu'movoporogano. Pwol gami wosamuju'womdo tomuuno avlavokaikono. Aki pwol gami nuugwiwomdo yo'moneyokwe tomuuno avlavokaikono. 6Aki pworo aguto kig toolluro ki'nato womdokwe su toorai galomwora'no sumaveyokwe kaiyako igolo'mno yiuno'no aromiyosoporogano. 7Su toro aromiyosopo tovino a'mwo aguto kig tool wuu'no'no gamoro a'mwo mollurogudo toorai modapino sumaiyokwe a'mwo romiyosokwe toorai yiuno'no aromiyebuuropiyoporogano. Yo'mno aki a'mwo romiyosokwe su tooravuro ago wagwolago tonyu duko tokwe aluvirowapiyoporogano.

8Toro te a'mwo aguto kig su tool gamoro ki'nato womdokwe pworai aro kuudokaikono. “Nuu lubullu doto tovi yanyo'moneyokwe ton me'no sovrowosumokwono. Toro kuvi kuruv a'mwo abolo lubullu doto tovi biyonomwallo'moneyokwe me'no ajesungiko ton biyolo to'no uu'mwojodupudogano. 9Toro tovino tov kevu bolokwopi a'mwo abolo puuto aguto tomuu yomollodopure tonyu dodomallulo. Yiuwi'nokai a'mwo abolo sumdo kwonpi su tonyu lubullu doto akavi biyonomwalpino'moneyokwe nokwo domapinorekikono.” Kuudokaikono. 10Toro wuujuno sumaiyokwe a'mwo ki'nato womdokwe tooro bolokwo'mno puuto tomuuda'ai yiuwi'nokai a'mwo abolo so'mgonomaropo tonyu aju'bworomaroporogano. A'mwo abolo ma'no ma'nodokweyodeyo oo sugudodeyo yiuwi'nokai kwonopo tonyu aju'bworomaroporogano. Toro ju'bworoma'no sumaveyokwe kwolabolo yoma'nyo'moneyokwe ago tovi anakuuto tomuu kuula'mno aulomwollutowopiyopogano.

11Su toro kuulomwollutowopiyodopure tonyu a'mwo aguto kig tool agallainyubworokaikono. Toro gallainyubwo'no sumaiyokwe kwonoka tov, a'mwo aulomwaloka pwekwo kwolabolo yoma'nyo'moneyokwe youro po'dogalo toul mamollosoka toollu kwonokaikono. 12Toro wonyuno sumaiyokwe aro kuudokaikono. “Ibwoto'nyoloo, guu kwolabolo yoma'nyo'moneyokwe youro po'dogalo toul mamollosumado tooku adadomgu'aro aulabumodekudeyo?” Kuudokaikono. Toro kuudoka tovi a'mwo su tekwo yogalo puru'monodo kuruv mado'no yiuno mago to'no amorowopiyokaikono. 13#Mt. 8:12, 25:30; Lk. 13:28Toro yoduke toga a'mwo aguto kig tool gami womdokwe pworai aro kuudokaikono. “Kevu a'mwo su toolluro suvlato tonyu mogalerosopi kwa'mgu dugumwuulo tomuuno bilomodukwopiyulo. Dugumwuulo su tomuu danyu'nyuwuulo bwotonyo ibwosunodopure tovida'ai kumdato mujode'movla'mdupudomuugono. Aki toro tomuu kemi mago tonyu tuko do'nugovla'mdupudomuugono.”

14Jisasol yovekurajo su tov toro wuujuno sumaiyokwe kavlo tovino aro kuudokaikono. “Gooti tool a'mwo abolo bwotonyago tonyu doma'dowodekono. Toro kuvi kuruv gavuge kuvinono kuulomwallo'moneyokwe to'gwowi yiuno pwolno puru'monodo tonyuno to'no jesodowodogano.” Kuudokaikono.

“Nevu a'mwo aguto Sisa toollu takis nuugwiyo uubiyo'mo tov nokwo'mo'mdukono?” Samuugojopo tovinokwono

(Mak 12:13-17; Luuk 20:20-26)

15Toruda'ai Farasi tooro Jisasollu galomworallo'mo kwinyajupo su tooro plavo'mno su'bwo'noporogano. Toro i'bwo'nyuno sumaveyokwe aro adomdukuurosoporogano. “Nemida'ai pworo Jisasollu youkuu'nuuji kwipi toga gamoro yogalo kaiya'no ado'ji tovi'aro nevu nokwo mworaranekono.” Adomdukuurosoporogano. 16Su toro domdukuurosuno sumaveyokwe toga kemoro a'mwo uumjunyokwe pworogai'aro Herootolluro uumjunyokwe pworogai'aro toorai Jisasollomno amoropiyaboporogano. Toro amoropiyabopo su tooro bino sumaveyokwe Jisasollu aro kuudoporogano. “Ibwasokweyoloo, guu nebal'nodekugono. Toro tooku yiuwi'nokai a'mwo abolo tonyu yiuno avalousuno yodubwasodumdekugono. A'mwo abolo yovokweyodeyo oo yovomaiyokweyodeyo kunyu kuruv Gooti toolluro pasudo tonyuno yiuno nebal'no yodubwasodumdekugono. 17Toro tooku donekudono. Nevu Roomda'ai a'mwo aguto bomwallo Sisa toollu takis nuugwiyo uubiyo'mo tov yowa'nodo'mdukono? Nevu nuubimwalanonoldukono oo muubimwalanonoldukono?” Kuudoganoporogano.

18Su toro kuudoganopo toorai Jisasol kemoro poowokalago magu'nyo kuudo kuuluuwo'duke su tovi me'no youroonyuno sumaiyokwe aro kuudokaikono. “Kevu kuunanokwe toorekul buro'nyo'mo yamju donyudoganmwakwovo?” 19Toro wuujuno sumaiyokwe aro kuudokaikono. “Kevu takis nuugwiyo sulo pullu donumokabilo.” Toro kuudoka tooro nuugwisulo pullugwo kuumokaboporogano. 20Toro mokabino sumaveyokwe toga Jisasol aro kuudoganokaikono. “Nuugwiyo akavi ala'mwolluro sumdomago tokwe yovo tokwe tovallu doonmwakovo?” 21Toro kuudoganoka tooro kuudoporogano. “Sisa toollu kwonmwakuuwono.” Su toro kuudopo toorai Jisasol aro kuudokaikono. “Sisa toolluro tonyu Sisa toollu neya duuwiyogaulo. Aki Gooti toolluro tonyuno'gwowi Gooti toollu neya duuwiyogaulo.” Kuudokaikono.

22Jisasolluro su toro kuudoka tovi a'mwo amoropiyabopo su tooro wuu'no'mno kuudo bwotonyo sourukwapiyoporogano. Toro yourukwapino sumaveyokwe a'mwo su tooro Jisasollu wuugollu'movo'mno avlavoporogano.

Sajuusi tooro a'mwo abollungopo aiyo aiko te nodukapino tooraino samuugojopo tovinokwono

(Mak 12:18-27; Luuk 20:27-40)

23 # Krt. 23:8 Aki iruko avalo su tollugwoji Juu a'mwo pworo Sajuusiyoravo dodupudo su tooro Jisasollomno aboporogano. Sajuusi tooro aro kuudo yau'dupudorogano. A'mwo me'no abollungopo ton aiyo aiko te ku'nono madukapinogano. Su toro kuudo yau'dupudo tooro Jisasollomno bino sumaveyokwe aro kuudoporogano. 24“Ibwasokweyoloo, Moosesolluro loowo sakwollungiko puruv aro dodowodokwono. “A'mwo pwol kwolaiyo miyawosunowo'ji abolo'ji kuvi kuruv gami gagwai'yago pwol gamoro abolo kanyu su tovi neya maronekono. Gagwai'yago su tool toro marowo'ji kwolaiyo amollawosuno'ji su tooro gami gadai'yago toolluro aiko toru'no mapinorogano.” Su toro sakwollungikokwono.”

25Toro te nemida'ai a'mwo atobuul ato pworal todoroto amwallajuporogano. Toro todorotavuro sumdomguda'ai tool abolo puruvi malluno sumaiyokwe kwoloraiyo mamollawosuno'no abolokaikono. 26Aki kwolloruda'ai kwol kuruv abolo kanyu su tovi malluno sumaiyokwe kwolaiyo mamollawosuno'no abolokaikono. Aki kwolloruda'ai kwol kuruv tono sokaikono. Tono tono ino sumaveyokwe abolo avalo su tovi yiuwi'nokai atobuul ato pworal todoroto malluno sumaveyokwe kwolaiyo pwolnodo kwol kuruv mamollawosuno'mno abolopiyoporogano. 27Yiuwi'nokai todoroto me'no bolopino sumaveyokwe aiyowo'mo toga abolo kurukwe'aro abolokakwono. 28Toro wuujuno sumaveyokwe aro samuugojoporogano. “Yiuwi'nokai abolopingopo atobuul ato pworal su todoroto abolo su tovi me'no amaropo tooraino tov lukomgu aiyo aiko te adukapi toga gadoolluro abolo kuunodo wimo'nono'mdukono?” Samuugojoporogano.

29Toro samuugojopo kuvi kuruv Jisasol aro kuudokaikono. “Kemoro kuudo tov po'dogalo miyau'mwakovo. Kevu Gooti toolluro yogalo sakwollungiko togai'aro gamoro jurogudo tokwe'aro tovalluno kuudo miyouroma'mwakovo. 30A'mwo abolo me'no abollungopo ton lukomgu aiyo aiko te adukapi toga aki aiko te kwolabolo miyoma'nupinogano. Toro kun kuruv aiyo aiko te adukapi toga muunyu kai'muuda'ai ensel miyoma'nodupudo toorobusuko kubalno mwalpinogano.

31Aki kevu a'mwo abolo me'no abollungopo ton aiyo aiko te nodukapino tonyuno Gooti toolluro yogalo aikullaboka tovi mwonodupudorekuldeyo? 32#Moll. 3:6Yogalo su tov arokwono. Nuvu Eburaiyameke Aisakeke Jekoopeke toorai Gooti toonyugono. Gooti su tool a'mwo me'no abollungopo toorai Gootolmaiyo. Toro kuvi kuruv aiyo mwalodupudo tonyuno'gwowi Gootekono. Su toro sakwollungiko tovi mwonodupudorekuldeyo?” Jisasol Sajuusi toorai toro kuudokaikono. 33Toro wuujuno sumaiyokwe a'mwo abolo ton Jisasolluro ibwasoduke tovi wuu'no'mno luko morumoukuropi sopogano.

Loowo puruv yiuwi'nokai loowo punyu uuwolo'mdowodo tovinokwono

(Mak 12:28-31; Luuk 10:25-28)

34Toruda'ai Jisasol Sajuusi su toorai me'no kuubutovokarogano. Toro tovino Farasi tooro wuu'nyuno sumaveyokwe Jisasollomno bo'mno abi'bwo'noporogano. 35Toro abi'bwo'nopo su tooravuro loowo tovino pi'mwo kuudokwe pwol Jisasollu youkuu'nuujo'mo aro kuudoganokaikono. 36“Ibwasokweyoloo, buro'nyo loowo tov yiuwi'nokai Moosesolluro loowo punyu duuwolo'mwallo?” Kuudoganokaikono.

37Su toro kuudoganoka toollu Jisasol kuudokaikono. “Gumi Aguto Gooti toolluno kalo buuropino neya domollono. Toro tooku gumoro yiuwi'nokai poowokalago tokwe'aro gumoro yiuwi'nokai sumwoluko tokwe'aro gumoro yiuwi'nokai kuudo tokwe'aro togai Gooti toolluno kalo buuropino neya domollono. 38Loowo su tov agutokwono. Aki yiuwi'nokai loowo punyu kuuwolo'mwallo. 39Toruda'ai loowo su to'busuko iwapiyo puruv arokwono. Guvu yiuwi'nokai a'mwo abolo pwolno puru'mono kuuru'ma'bi tonyuno kalo buuropino neya domollono. Guvnokwekujuno gujunodowodo to'busuko kubalno aval'no neya domollono. Loowo iwapiyo yodowodo tov torokwono. 40#Lk. 10:25-28Toro te yiuwi'nokai Moosesolluro loowo togai'aro proofet yogalo togai'aro ton loowo su tovallu porugwo'mo'na'dupudogano.” Jisasol toro kuudokaikono.

Jisasol Farasi toorai, “Krais tool ala'mwolluro kwolaiyo imo'nonoldeyo,” kuudoganoka tovinokwono

(Mak 12:35-37; Luuk 20:41-44)

41Farasi tooro kuuno i'bwo'nodopure toga Jisasol aro kuudoganokaikono. 42“Kevu Gooti toolluro nekullo'mwojo'moneyokwe monekwopiyabwono Krais toolluno buro'nyo kuudo jukiyau'mwakovo? Su tool ala'mwolluro kwolaiyo imo'nonoldukono?” Kuudoganokaikono. Toro kuudoganoka tovi Farasi tooro kuudoporogano. “Krais su tool Devitolluro jukweyago kwolaiyo tooraida'ai imo'nonekono.” Kuudoporogano.

43Toro kuudopo tovi Jisasol aro kuudokaikono. “Kemoro yogalo adumapo su tov adadomgu'aro kuvinono imo'nono'mdeyo? Gooti toolluro Kuullo tool aiyoga Devitolluro kuudo tovi wiyoduke toga Devitol gami jukweyago kwolaiyo tekwojuno, “Mi Agutoloo,” do'no yogalo puruv aro ajakwollokaikono.

44“Gooti tool moro Aguto toollu aro kuudokaikono. Guu moro anato toru nuuge bilomwalbinekugono. Toro mwalodo'bure toga nuu gumi ikomago toorai maro'mi gumi dolago tomuu nobomagubwemorogono.”

Gooti toolluro yogalo su tovino Devitol toro ajakwollokaikono.” 45Jisasol toro wuujuno sumaiyokwe loowo tovino pi'mwo kuudokwe toorai kuudokaikono. “Devitol Krais toolluno, “Agutoloo,” adoka tov Aguto su tool Devitolluro jukweyago kwolaiyo tekwobusuko adadomgu'aro imo'nonoldukono?” Kuudoganokaikono.

46Jisasolluro kuudoganoka su tovi yiuwi'nokai a'mwo su tooro yogalo puru'monodo kuruv muuravoporogano. Aki a'mwo pwolnodo kwol kuruv Jisasollu wuudoganyo'mo tov nonaguto sumo'noporogano.

Currently Selected:

Matyuu 22: SMB

Highlight

Copy

Compare