Mollurolovomato 15

Moosesolluro dato adoka tovinokwono

1To'no'gwowi Mooseseke'aro Isuraiyolda'ai togai'aro ton Gooti Yawellu ilomoropiyo'moneyokwe pwolno pwolnodo ton dato aro amadopekono.

“Gooti Yawel Ijupda'ai hoos toorogai'aro a'mwo hoos toorai mokavlaiyokwe toorogai'aro toorai soolwara tovi amobwokuruvollumokarogano. Toro tooro nemi molo bwotonyo nekullodopure toorai Gooti Yawel kuuwolo'moka tovino tov nuu kwollu ilomoropiyo'moneyokwe dato amadumo. 2Gooti Yawel mi jurogudo nyabodowo gavnokweyol nyo'mwojodowodekonoo. Toro tool mi Gooti nyumo'nodowodo toolluno tov dato tokwe ilomodomoropiyamekono. Aki mi nyunumiyago toolluro Gooti toolluno tov ilomoropiyamekono. 3Toro toolluno yovo tov Gooti Yawelekono. Gooti Yawel su tool amuulokaikono.

4Toro tool Feroo toolluro a'mwo mollurogudo toorogai'aro karis toorogai'aro toorai soolwara tovi amobwokuruvollumokaikono. Aki Feroo toolluro mollurogudo tooravuro a'mwo aguto senyubworomaroka kworai kuruv Soolwara Weyako tovi amulegoukuurosumokarogano. 5Toro toorai wonyo kamiyo tov bu'duvoloma'dowo sulo pwolbusuko wonyo tovi anakuuto tomuu kwolmwolavo.

6Oo Gooti Yaweloo, gumoro anato tov jurogudo kuunodokwono. Toro tokwe gumi ikomago toorai aromiyebuuropimadekugono. 7Aki gumoro jurogudo kuunodo tokwe gumi ikomago toorai kuuwolo'madekugono. Oo guu tookujuro surodo guunodowodo tov du'wiyo nodowodo to'busukokwono. Toro tokwe gumi ikomago toorai amonopimokarogano. 8Toro te guvnokwe tooku soolwara tovino dolo bwotonyo amoropiyamado tovida'ai soolwara tov amungelamokakwono. Toro mungelabodowo imgu amgu kuurupto to'busuko i'na'dubul soolwara tov aki aiko te nouroto'no'jokweyo'mo jurogudo agurokuuropimalovakono. 9Toro gurokuuropiyoduke toga nemi ikomago tooro aro adumaporogano. “Nevu povomje'nomokaulowa'ji noulogalomworaranorogano. Aki kemoro kuto ivito ton momuudeyosowa'ji nemiyo'mo mallo'mo anekulluno'ji tov nokwo ipolomaranonogano. Toro te nemi kwallu'mopto togai mokaulowa'ji auloromiyebuuropiyano.” Toro adumaporogano. 10Nemino su toro adumapo kuvi kuruv guvno'gwowi gumoro dolo jurogudo amoropiyamado tovida'ai soolwara tovi yiuwi'nokai Ijupda'ai su toorai amulegoukuurosumokarogano. Toro toorai wonyo soolwara luwagu luwaguto guureji yoduke tovi anakuuto tomuu sulo pwolbusuko kwolmaporogano.

11Gooti Yaweloo, guvubusuko gooti pwol nonagutomuugono. Guu sugudo kuunodo su tooku yiuwi'nokai noonyumwonyu punyu kuuwolo'mwakudekugono. Toro tookujuno tov yiuwi'nokai a'mwo abolo ton gumoro duuwallo jurogudo yodo'bure tonyu kwonpi toga luko yopi gumino ilomogwopiyapinogano. 12Toro tooku gumoro anato tov ruuguusapiyodum kwako akavida'ai wonyo tov ikomago toorai ame'nyudapimokakwono. 13Guu ikomago toorai toro kwimado kuvi kuruv nemino'gwowi kalo buuropino gujunodowodekugono. Toro tooku amollurolovonekuma'modo tonollu gumoro mwalodumdo sugudo kuunodo toru'no guvnokwekujuro jurogudo tokwe mollubworonekumokavla'binonogano. 14Gumoro toro sumado tovino a'mwo kantri go'no go'nodo pumuuda'ai tooro wuu'nodupu luko bu'buto bwotonyo amjumoulmwolavo. Filistiyada'ai kworo kuruv wuu'nodupu luko bwotonyo sadokwovo. 15Aki Idoomda'ai mido mollomwalokwe kworo kuruv wosamujuko po'dogalo kuulonallo'mo kuudo miyau'mwakovo. Aki Moowapda'ai a'mwo aguto kworo kuruv gadomuuno plawanonoldukoneyokwe puvilai'godo sumwanadokwovo. Aki yiuwi'nokai a'mwo Kenanda'ai kworo kuruv kemoro jurogudo ton wonyo to'busuko aduuwiyopiyadokwovo. 16Yiuwi'nokai su tooro gumoro jurogudo tovi me'no wuu'nodupu luko bu'buto bwotonyo amujumoulmwolavo. Toro tooro luko yodupu nemi manekumjukupinorogano. Aki toro tonol pla'mdowa'jure toga nemi noonyumwonyu puruv miyanekullugolpinorogano. Luko bwotonyo yopi nokwo avlapureyokwe nekwonyapino ipinorogano. Oo Gooti Yaweloo, gumoro amollurolovonekumokobadokuudo tonollu aki aiko te ku'nono mameronekumwallupinonogano. 17Aki toro tooku nemi mollubworonekumokavla'mdum gumoro muumuudo toollomno nekumokaula'bi ilaiyo to'no mwalanonogano. Gooti Yaweloo, muumuudo su tool guvnokwe tooku mwallo'moneyokweyorukono. Toro towai ilomorogwopiyo'mo ago tov guvnokwekujuro jurogudo tokwe modubino toru'no nemi nekumokaulabinekugono. 18Gooti Yaweloo, guu yiuwi'nokai toga aguto kig yiunokuudo mujomwekovla'mwalbinekugonoo.”

Isuraiyolda'ai ton dato toro amadopogano.

Miriyamovuro dato adoka tovinokwono

19Toro te Isuraiyolda'ai ton soolwaravuro akuuto toru kwako yalukullo kworoka tovi kuula'mno igo'mgu ai'movopogano. Toro kuvi kuruv Feroo toolluro hoos toorogai'aro karis toorogai'aro a'mwo karis gunyukullokwe toorogai'aro toorono'gwowi Isuraiyolda'ai tonyu povomjai'nomokaulodopure toga Gooti Yawel wonyo tov aki aiko te amorubu'duvolokaikono. Toro amorubu'duvoloka toga wonyo tov yiuwi'nokai Ijupda'ai su toorai aiyowomno abu'duvolomwalokakwono.

20Toruda'ai Eroonollu jo'mwo Miriyamov proofet abolo purukwono. Toro tov gami taborin tov malluno sumaiyokwe kworomo sokakwono. Toro yoduke toga yiuwi'nokai abolo kun kuruv Miriyamovi uumjuno'mno kemi lawiyo ton malluno sumaveyokwe kworomo sopogano. 21Toro yo'mno Miriyamov dato puruv aro amollubworadokakwono.

“Gooti Yawel Ijupda'ai hoos toorogai'aro a'mwo hoos toorai mokavlaiyokwe toorogai'aro toorai wonyo tovi amobwokuruvollumokaikonoo. Toro te molo bwotonyo su tovi Gooti Yawel kuuwolo'moka toolluno tov ilomoropiyo'moneyokwe dato adanoo.”

Miriyamov dato toro amollubworadokakwono.

Iru'wuullokwe wonyo tovinokwono

22Toruda'ai Moosesol Isuraiyolda'ai tonyu mollubworomokavlavo'no Soolwara Weyako tovi kuugollu'movopogano. Toro wuugollu'mo'mno sumaveyokwe kwako a'mwomaiyo kuu'maiyo Suur dodupudo toru'no amollubworomokavlavokaikono. Toro ton plaino sumaveyokwe iruko pullapullu kuuwolo'nokagano. Iruko su tobuullu wonyo nyo'mo puru'monodo kuruv miyo'mgonomaropogano. 23Toro ton kwako Mara toru ki'mo'mno sumaveyokwe wonyo manyo'moneyokwe puvi kwonopogano. Wonyo su tov iru'wuullokwe tovino tov ku'nono miranyajupokwono. Toro te kwako su toru'no yovo tov Mara sowaroporukono. 24Toro towai Isuraiyolda'ai a'mwo abolo ton Moosesollu mebweyogalo aro kuudopogano. “Nevu wonyo nonyo'moneyokwe tov burowo'nyo nanonoldeyo?” Kuudopogano. 25Toro kuudopo tovi Moosesol Gooti Yawellu subusu'nyogalo guureji kuudoganokaikono. Toro wuudoganyuno sumaiyokwe Gooti Yawel Moosesollu ipilo pullugwo kuuduuwallokaikono. Toro kuuduuwalloka tovi Moosesol malluno sumaiyokwe wonyo iru'wuullokwe tovi kwolowopiyokaikono. Toro kwolowopiyoka toga wonyo iru'wuullokwe su tov nyuranyo'mo ilaiyo sumo'nokakwono.

Toro towai Isuraiyolda'ai ton mwalodopure toga Gooti Yawel nuumjunpino'moneyokwe loowo pun wiyo'no aki yamju kwiyoganokaikono. 26Toro tool aro kuudokaikono. “Kevu Gooti Yawel toonyuro yogaimaguurai ikudodo'mure tovi duu'nogaulo. Aki moro sumdo tovi yiuno sugudo to'no domjumovlavogaulo. Aki moro loowo adosungiko tonyu duumjunogaulo. Kevu toro supi togaikullu mairekumwallumonyugono. Sumdomgu Ijupda'ai toorai nobolluwuulo kuubweyajo su tonbusuko kubalno mairekumwallumonyugono. Su tov aro tovinokwono. Nuu Gooti Yawel kemoro nobollo tonyu ikullukulodumdonyugono.” Kuudokaikono.

27Gooti Yawel toro wuujuno sumaiyokwe Isuraiyolda'ai ton avlavopogano. Toro plaino sumaveyokwe kwako Elim toru ai'movopogano. Kwako su toru 12-pela wonyo buugo alsovomwollosungiko pworo kurukweyorukono. Aki 70-pela wonoweyo pworo da'mdupudorukono. Wonoweyo su tooro nonyo'mo ikulsulo det ton ki'nodupudorogano. Toro towai ki'mo'mno sumaveyokwe kemoro woromollo'mo sel ago ton modo'mno wonyo buugo alsovomwollosungiko su toorai wobo toru amwalopogano.

Currently Selected:

Mollurolovomato 15: SMB

Highlight

Copy

Compare