Kuurotokwe 18

Poolol wagwolago Koorinda'ai toorai kuuguudo sugudo tokwe amoruudomolloka tovinokwono

1Toruda'ai lukomgu Poolol wagwolago Atens toru kuugollu'movokaikono. Toro wuugollu'mo'mno sumaiyokwe plavo'no wagwolago Koorin toru ai'movokaikono. 2Wagwolago su tovi toro ki'mo'mno sumaiyokwe a'mwo Juu pwollu abuuru'marokaikono. A'mwo abuuru'maroka su toolluno yovo tov Akwila'wolekono. Toro tool proovins Poontosda'aiyekono. A'mwo su tool muudu'nodo toga gami abolo Prisilakwe teyaul kantri Itali tomuuda'ai wuugollu'mokabolno wagwolago Koorin toru abomwaloleyaukono. Su toro abomwalolo tov aro tovinokwono. Roomda'ai a'mwo aguto Sisa Klaudiyosol Roomda'ai Juu a'mwo abolo mwalodupudo tonyu modovomjapiyo'moneyokwe kuuguudo aduuwiyajukekono. Toro duuwiyoduke tovino tov Juu a'mwo abolo ton Room towai wuugollu'mo'mdupu gomno gomno avlaiyajupogano. Toro te a'mwo kwolabolo su teyaul Room toru wuugollu'mo'mno sumaleyokwe wagwolago Koorin toru abomwaloleyaukono. Toro bomwalodole teyaullomno Poolol wuuru'mallo'moneyokwe kuuwokaikono.

3Toro wino sumaiyokwe Akwila'wollu kuuru'marokaikono. Akwila'weke gami abolo Prisilakwe teyaul ago mojo'moneyokwe sel ton giwolyakwollodubuleyaukono. Aki Poolol kwol kuruv nuugwiyo mallo'moneyokwe womdo aval'nodo su tov yodowodekono. Poolol a'mwo kwolabolo su teyaullu wuuru'malluno sumaiyokwe amwallajupogano. Toro mwalodupu yiuwi'nokai ton womdo avalo tovi sajupogano. 4Aki Poolol yiuwi'nokai Sabat toga Juu tooravuro i'bwo'nyago tovi aullajukekono. Toro kuulodawo a'mwo abolo Juu togai'aro Grikda'ai togai'aro tonyu kuuguudo sugudo tovino kuudo neya uubwepino'moneyokwe sodubwasajukekono. Toro yodubwasoduke tovino ajainyubwollajuporogano.

5Toruda'ai Sailaseke Timootiyeke tooral kwako Masedooniya tomuuda'ai wuugollu'mo'mno sumaleyokwe wagwolago Koorin'no abolorakono. Toro tooral bino sumaleyokwe wagwolago Koorin toru abai'movolorakono. Toro bai'mo'mdole toga Poolol nuugwiyo womdo sajuko tovi imwogapino sumaiyokwe yiuno Gooti toolluro kuuguudo sugudo tokwe to'no amoruudomollajukekono. Toro te Poolol Juu toorai aro sodubwasajukekono. “Gooti toolluro nemi nekullo'mwojo'moneyokwe amonekwopiyaboka Krais tool Jisasol kwekono.” Sodubwasajukekono. 6Toro yodubwasoduke tovi Juu pworo wuu'nyuno sumaveyokwe Poolollu kisuvolo wiyo'mno mebweyogalo kuudoporogano. Toro yodopure tooraino Poolol ilaiyo mibwosuno'no gavnokwe tool aro kuuduuwallunokaikono. Gami youro tovida'ai sullukwako kwollajuko ton nomuugona'dopure toru aluvourokurosokaikono. Toro luvourokurosuno sumaiyokwe yogalo aro kuudokaikono. “Kevu Gooti toollu manyu tomuu'aro yeru'mdeyapinopi gamoro kirumwallo tovi yiunokuudo ai'napi tov moro tovasuda'aiyo'maiyo. Toro kuvi kuruv kevnokwe togaikulluro tovasuda'ai ki'napinogaikikono. Toro te aga'no'gwowi mekono. Nuu kuuguudo sugudo tokwe a'mwo Juu tooravuro miyawosunodupudo tooraiyomno moruudomollumwalmonyugono.” Kuudokaikono.

7Poolol toro wuujuno sumaiyokwe Juu tooravuro i'bwo'nyago tovida'ai bolokwo'no a'mwo pwolluro ago tovino kuuwokaikono. A'mwo su toolluno yovo tov Titiyos Jostosolekono. A'mwo su tool Gooti toolluno ilomoropiyokwekono. Aki toro tool Juu tooravuro miyawosunodupudo pwekono. Toro toolluro ago tov Juu tooravuro i'bwo'nyago tovi wobo toru wo'dowodokwono. Toro te Poolol a'mwo su toolluro ago tovi wino sumaiyokwe kweke amwallajukekono. 8Toro mwaloduke toga aro sumo'nokakwono. Juu tooravuro i'bwo'nyago tovi mido mollomwalokwe pwolluno yovo tov Krisposolekono. Toro tool Aguto Jisasolluno kuuguudo tovi wuu'no'no, “Oo nebalo'mdeyo,” juno sumaiyokwe kuudo kuubweyokaikono. Aki a'mwo su toolluro yiuwi'nokai julkwolaiyo kun kuruv Aguto Jisasolluno kuuguudo tovi wuu'no'mno kuudo kuubweyopogano. Aki wagwolago Koorinda'ai a'mwo abolo bwotonyago pun Poololluro kuuguudo yodubwasoduke tovi wuu'no'mno kuudo kuubweyopogano. Toro uubweno sumaveyokwe wonyo kuuvollunopogano.

9Toruda'ai surakuuto pullugwoji Aguto tool Poolollu wojo iwo'nodupudo to'busuko puvi'aro abwiyalo'nokaikono. Toro bwiyalo'nyuno sumaiyokwe Aguto tool Poolollu aro kuudokaikono. “Guu kuuguudo sugudo tokwe moruudomollo'mo tovino luko nyumwalbiyo. Aki gumoro mago tov nobutowosumwalbiyo. Toro kweku kuruv kuuguudo sugudo su tokwe neya domoruudomollogawono. 10Su toro tov aro tovino agudumono. Nuu guuge mwalodumdonyugono. Aki wagwolago akawaida'ai a'mwo abolo bwotonyago ton numorogano. Toro tovino tov akawaida'ai a'mwo gumi kaiyako yagujugolpino pworo nonagutomuugono.” Aguto tool Poolollu toro kuudokaikono. 11Toro wuujuno sumaiyokwe Poolol wagwolago su tovi amwallajukekono. Toro mwalodowo a'mwo abolo tonyu Gooti toolluro kuuguudo tokwe sodubwasajukekono. Toro yodubwasuno yodubwasuno sumaiyokwe kworomo pullugwogai'aro 6-pela lobako tobuuke'aro kuuwolo'nokaikono.

12To'no'gwowi lukomgu Roomda'ai a'mwo aguto gavona pwol sumo'nokaikono. A'mwo aguto su toolluno yovo tov Galiyoo'wolekono. Toro tool proovins Akaiya toru mido amollomwallajukekono. Toro mollomwaloduke toga proovins su tomuuda'ai Juu pworo Poolollu kaiyako igollo'moneyokwe abi'bwo'noporogano. Toro tooro Poolollu galomwora'no sumaveyokwe a'mwo aguto su toollomno amokavlavoporogano. Toro mokavla'mno sumaveyokwe Poolollu kooti yogalo duuwiyo'moneyokwe 13kuunano aro soukuu'nuudoporogano. “A'mwo akal a'mwo abolo punyu de'nomallo'moneyokwe tool aro wuudodowodekono. “Kevu Gooti toollu puuto judo pumgu'aro julomoropiyogaulo.” Poololluro su toro wuudodowodo tov loowo tovi kisuvolo nuuwipino'moneyokweyokwono.” Poololluno su toro soukuu'nuudoporogano. 14Toro soukuu'nuudopo tovi Poolol nuujo'mo yoduke toga a'mwo aguto Galiyoo'wol Juu su toorai aro kuudokaikono. “A'mwo akal ma'no ma'nodo'mdeyo oo kiruvanyuvanyo'mdeyo puruv sowo'jujuko'mno'juki nuu kevu Juu toorekulluro yogalo anyudadokwopo tovi nokwo aikuu'no'mujukonyugono. 15Toro kuvi kuruv kemoro yogalo adadokwopo su tov kevnokwerekulluro yogalodeyo oo yovodeyo oo loowodeyo tonyuno adadokwovo. Toro tovino tov kevnokwe toorekul jovo'dogallulo. Nuu toonyuno'gwowi kooti yogalo su toro tovino domduukuuroso'mo manyunadopiyo.” Kuudokaikono. 16Toro wuujuno sumaiyokwe Juu toorai kooti yogalo mollomwalodupudo agwapto su towaida'ai amodovomjapiyokaikono.

17Toro modovomjapino sumaiyokwe a'mwo su tooro yere muugollu'mo'mdopure toga Juu tooravuro i'bwo'nyago tovi mido mollomwalokwe pwollu agalomworaropogano. A'mwo su toolluno yovo tov Soostenesolekono. Toro toollu galomwora'no sumaveyokwe kooti yogalo mollomwalodupudo agwapto su tovuro kwa'mgu wobo toru iwago aromiyoporogano. Toro romiyodopure toollu a'mwo aguto Galiyoo'wol amuugonaroka kwol kuruv mwonyubusuko to'no sokaikono.

Poolol wagwolago Antiyook'no aikomgu avlavoka tovinokwono

18Toruda'ai Poolol wagwolago Koorin toru iruko bwotonyago tobuul me'no mwalno sumaiyokwe Jisasolluro a'mwo abolo tonyu nuugollu'meyo'moneyokwe aro kuudokaikono. “Oo ilaiyokwono. Nuu kado pla'mo'monyugono.” Toro wuujuno sumaiyokwe a'mwo kwolabolo Akwila'weke Prisilakwe teyauke avlavopogano. Toro ton plaino sumaveyokwe wagwolago Senkriya toru ai'movopogano. Toro ton muudu'no ai'movopo toga Poolol gami midoto tov ado'nokaikono. Su toro ado'noka tov Gooti toollu subuu'yamju puruv me'no kwiyoka tovino duuwallo'moneyokwe ado'nokaikono. Toro me'no do'nyuno sumaiyokwe lukomgu kwako Siriya tomuuno plaiyo'moneyokwe sip pwollu nuugwiyo abiyosopogano. Toro biyosuno sumaveyokwe sip toollu ilomwalo'mno avlavopogano.

19Toro ton plaino plaino sumaveyokwe wagwolago Efesos toru ai'movopogano. Toro ai'movopo towai Poolol a'mwo kwolabolo teyaullu wuugollu'mo'mno sumaiyokwe Juu tooravuro i'bwo'nyago puvi aulokaikono. Toro kuulno sumaiyokwe Juu toorogai kuuguudo aulodomwalokaikono. 20Toro kuulodomwalno sumaiyokwe Juu tooro Poolollu aro kuudoganoporogano. “Oo guu nevuge akawai manyu toga nokwo mwalbinekudeyo?” Toro kuudoganopo tovi Poolol kuudokaikono. “Awiyo.” 21Toro wuujuno sumaiyokwe nuugollu'meyo'mo tool aro kuudokaikono. “Gooti tool ilaiyo kwino'ji nuu kemiyomno aikomgu nomonyugono.” Kuudokaikono. Toro wuujuno sumaiyokwe sip pwollu mobiyoso'no ilomwalno sumaiyokwe wagwolago Efesos toru kuugollu'movokaikono.

22Toro tool plaino sumaiyokwe wagwolago Sisariya toru ai'movokaikono. Toro ki'mo'mno sumaiyokwe sip toolluda'ai bolokwo'no wagwolago Jeruusalem'no tool kwokado avlavokaikono. Toro tool plaino sumaiyokwe wagwolago Jeruusalemda'ai Jisasolluro mollu'bwoto tobuurai kuuru'marokaikono. Toro wuuru'ma'no sumaiyokwe a'mwo abolo su tobuurogai kuuguudo pwekwo adomwalokaikono. Toro domwalno sumaiyokwe Jeruusalem toru uugollu'movo'no wagwolago Antiyook'no aikomgu kwolokaikono.

23Toro wolai'mo'mno sumaiyokwe wagwolago su towai iruko pubuul amwalokaikono. Toro tool iruko pubuul me'no mwalno sumaiyokwe wagwolago su tovi kuugollu'movokaikono. Toro wuugollu'mo'mno sumaiyokwe proovins puruvallu'aro avlavokaikono. Proovins su tovalluno yovo tov Galesiyake Frijiyake tovakono. Toro tovallu tomuu plaino sumaiyokwe wagwolago go'no go'nodo tonyu somollajukekono. Toro yomollodowo a'mwo abolo Jisasollu uumjunyokwe tonyu wuuru'ma'dowo jurogudo aduuwimwojomollajukekono.

Apoolosol wagwolago Efesos toru kuuguudo tov amoruudomolloka tovinokwono

24To'no'gwowi a'mwo Juu pwol wagwolago Efesos'no toru bai'movo'no abomwalokaikono. A'mwo su toolluno yovo tov Apoolosolekono. Toro tool wagwolago Aleksadriyada'aiyekono. A'mwo su tool kuuguudo ilaiyo to'no ajajukekono. Aki toro tool Gooti toolluro kuuguudo sakwollungiko tonyu jagilodowo pi'mwo kuudokwe sumo'nyajukekono. 25Toro toollu a'mwo pworo Aguto toolluro puuto soulonekubweyoka tovi me'no yodubwasodupudekono. Toro tool puuto su tovino a'mwo abolo punyu kavo mamoruujokwekono. Toro kwol kuruv gami poowokalago kuunodo tokwe guureji moruujokwekono. Toro moruudodowo aki Jisasollu noonyumwonyu kwimo'noka tonyuno yiuno ilaiyo to'no yodubwasokwekono. Toro tool aro souromallajukekono. Aiyoga Joonol wonyo galuvollodowo Jisasolluno kuuguudo pun sodubwasajukekono. Toro yodubwasoduke tonyuda'ai to'no Apoolosol wuu'nodowo amoruujajukekono. Toro kwol kuruv Jisasolluno kuuguudo punyuno'gwowi kuudo miyouroma'dowo miyodubwasajukekono.

26Toro tool Juu tooravuro i'bwo'nyago tovi kuulno sumaiyokwe kuuguudo tokwe yiuno kuu'maiyo toru'no sodubwasajukekono. Toro yodubwasoduke toga a'mwo kwolabolo Prisilakwe Akwila'weke teyaul au'nallajuleyaukono. Toro kuu'na'no sumaleyokwe Apoolosollu kemi ago tomuuno amokavlavoleyaukono. Toro mokavla'mno sumaleyokwe a'mwo su toolluro Gooti toolluno kuuguudo sodubwasajuko tonyuno po'dogalo yovo'dogallo'moneyokwe kuuguudo pugai'aro sodubwasoleyaukono.

27Toro me'no yodubwasuno sumaleyokwe Apoolosol proovins Akaiya tomuuno plaiyo'mo kwinokaikono. Toro te wagwolago Efesosda'ai Jisasolluro a'mwo abolo ton Apoolosollu wiyo'mwojo'moneyokwe pas puruv aro sakwollopokwono. “Oo Apoolosol kemi abekuru'maro'ji toga kevu ilaiyo neya mollomapinekono.” Pas su toro sakwollopo tov proovins Akaiya tomuuda'ai a'mwo abolo Jisasollu uumjunyokwe tonyu wiyo'moneyokwe Apoolosolluro ato tovi kuubweyopokwono. Toro uubweno sumaveyokwe Apoolosol wagwolago Efesos toru wuugollu'movo'no proovins Akaiya tomuu ai'movokaikono. Toro ai'movoka su tomuu wagwolago Koorin tov wo'dowodokwono. Toro towai ki'mo'mno sumaiyokwe Jisasolluro a'mwo abolo punyu kuuru'marokaikono. A'mwo abolo su ton Jisasolluno kuudo muudu'no kuubweyopo tov Gooti gavnokwe toolluro yasuwa'wino sugumaluko uubweyoduke tovida'ai Jisasolluro a'mwo abolo sumo'nopogano. Toro tonyu Apoolosol wuuru'ma'no sumaiyokwe bwotonyo kwiyo'mwojokaikono. 28Toro tool aro sajukekono. Apoolosol kuu'maiyo toru'no Gooti toolluro kuuguudo sakwollungiko tovida'ai pi'mwono aro sodubwasajukekono. “Gooti toolluro nemi nekullo'mwojo'moneyokwe amonekwopiyaboka Krais tool Jisasol kwekono.” Pi'mwono toro sodubwasajuko su tov Juu tooravuro pi'mwo kuudo tonyu kuuwolovokakwono. Aki kuuguudo su tov kemoro yogalo jo'mo winodopure kunyu kuruv kuumjukullajukokwono.

Currently Selected:

Kuurotokwe 18: SMB

Highlight

Copy