2 A'mwo Aguto Kig 17

Hoosiyal Isuraiyolda'ai a'mwo aguto kig sumo'noka tovinokwono

1To'no'gwowi a'mwo aguto kig Ehasol Juuda'wolluro yovodolobunyo tonyu mido mollomwalo yoduke tov 12-pela kworomo kuuwolo'nokaikono. Toro tool mido mollomwalo kuuno yoduke toga Isuraiyolda'ai yovodolobunyo punyu Ela'wolluro muugunyo Hoosiyal a'mwo aguto kig kwimo'nokaikono. Toro tool a'mwo aguto kig wimo'nyuno sumaiyokwe Samariya toru mwalo'no Isuraiyolda'ai yovodolobunyo tonyu 9-pela kworomo tobuullu mido amollomwallajukekono. 2Toro momjomwekovla'mdowo Gooti Yawelluro sumdo tovi ma'no ma'no amjumovlaiyajukekono. Toro kwol kuruv gamoro ma'no ma'nodo tov aiyoga Isuraiyolda'ai a'mwo aguto kig kirovanyuvanyu kuumwiyo pworavuro sajupo to'busuko kubalno miyajukekono. 3Toro te Hoosiyal Isuraiyolda'ai tonyu a'mwo aguto kig mido mollomwaloduke toga Asiriyada'ai a'mwo aguto kig Salamaneseraike'aro gami a'mwo mollurogudo toorogai'aro tooro molo abuuwiyoporogano. Toro buuwino sumaveyokwe Isuraiyolda'ai tonyu kuuwolovoporogano. Toro kuuwolovopo tovino tov Hoosiyal Salamaneserallu aro kuudokaikono. “Nuu gumi dolago tomuu mwalmonyugono.” Toro wuujuno sumaiyokwe Hoosiyal yiuwi'nokai kworomo toga takis nuugwiyo kuubiyajukekono. 4Toro kwol kuruv kworomo pullugwoji Hoosiyal Ijupda'ai a'mwo aguto kig Soo'wollu abomonekulluuloneyokweyo'mo a'mwo pworai kwollomno amodapiyokaikono. Aki yiuwi'nokai kworomo toga takis nuugwiyo kuubiyajuko kwol kuruv su toro toga muubiyokaikono. Hoosiyal toro yoduke tovino Asiriyada'ai a'mwo aguto kig Salamaneseral wuu'no'no adokaikono. “Oo Hoosiyal mi kisuvolo donyadopiyo.” Toro juno sumaiyokwe Salamaneseral a'mwo mollurogudo pworai moropiyabo'no Hoosiyallu bogalomwora'no sumaveyokwe wuulo killo'mo ago tovi aulomerosopekono.

Asiriyada'ai tooro Isuraiyolda'ai tonyu molo tovi buuwolovo'mno ameromokavlavopo tovinokwono

5Toruda'ai Asiriyada'ai a'mwo aguto kig Salamaneseral Hoosiyallu me'no kuulomerosuno sumaiyokwe gami mollurogudo toorogai'aro tooro wagwolago Samariya'no bo'mno aiyowomno bomwodovoma'no sumaveyokwe molo abuuwiyoporogano. Molo wino wino sumaveyokwe kworomo pullapullu kuuwolo'nokarogano. 6Toro kuuwolo'noka su toga Hoosiyal Isuraiyolda'ai tonyu a'mwo aguto kig mido mollomwaloduke tov 9-pela kworomo me'no kuuwolo'nokaikono. Su toro toga Asiriyada'ai tooro Isuraiyolda'ai tonyu kworomo pullapullu su tobuullu molo tovi wino sumaveyokwe me'no kuuwolovoporogano. Toro uuwoleno sumaveyokwe wagwolago Samariya toru kemiyo'mo amaroporogano. Toro malluno sumaveyokwe Asiriyada'ai a'mwo aguto kig tool Isuraiyolda'ai a'mwo abolo tonyu Asiriya'no ameromokavlavokaikono. Toro meromokavla'mno sumaiyokwe Isuraiyolda'ai a'mwo abolo punyu wagwolago Hala toru kuumwallokaikono. Aki Isuraiyolda'ai a'mwo abolo gabovo punyu kwako Goosan towai wonyo Haboorovi wobo toru kuumwallokaikono. Aki Isuraiyolda'ai a'mwo abolo gabovo punyu Midida'ai tooravuro wagwolago tonyu kuumwallokaikono. 7Toro te Isuraiyolda'ai tobuuravuro tabunyuwuulo amaropo su tov aro tovinokwono. Kemi Gooti Yawelluro sumdo tovi ma'no ma'no sajupogano. Aki toro ton aro kuudo miyaullajupogano. Aiyoga nemi nellukweyago tooro Ijupda'ai a'mwo aguto kig Feroo toollu dolago tomuu mwalodopure toga Gooti Yawel abomollurolovomokalokwokaldeyo. Kuudo miyaullajupogano. Toro kuudo miyau'dupu kuunano gooti pworai sulomoropiyajupogano. 8Aki Isuraiyolda'ai a'mwo abolo ton kevnokwenyuro a'mwo aguto kig tooravuro ma'no ma'no pasudo yodopure tonyu wonodupu kuumjunyajupogano. Aki Isuraiyolda'ai su ton kantri gabovo tonyuro a'mwo aguto kig pworo ma'no ma'no yodopure kugai'aro wonodupu kuumjunyajupogano. Aiyoga Gooti Yawel Isuraiyolda'ai tonyu a'mwo aguto kig su tooravuro kwako ton wiyo'moneyokwe me'no amovomjapiyokarogano. Toro amovomjapiyoka tooravuro kwako tovi Isuraiyolda'ai ton mwalodupu ma'no ma'no aval'no sajupogano.

Currently Selected:

2 A'mwo Aguto Kig 17: SMB

Highlight

Copy

Compare