2 Koorin 13
13
Wagwolago Koorinda'ai Jisasolluro a'mwo abolo ton wako neya au'nomwalpureyokwe tovinokwono
1Nuu pugasal toga kemi me'no abekuru'maronyugono. Toro toonyu aki aiko te pugake'aro nobekuru'ma'monyugono. Neya duu'nyulo. Gooti toolluro yogalo puruv aro sakwollungikokwono. “A'mwo pworaldeyo oo pworapwolorodeyo tooro a'mwo pwolluro pasudo yodowo'jure tovino dodoluwosupinorogano. “Oo a'mwo akaigwol toro toro yodowodekono.” Su toro adodoluwosupi tov kuudo youromapinogaikikono. Oo yogalo su tov nebal'nodo'mdeyo. Kuudo youromapinogaikikono.” Su toro sakwollungikokwono.
2Sumdomgu nuu pugasal toga kemi me'no abekuru'maronyugono. Su toro toga kemida'ai pworo ma'no ma'no pasudo mujumovla'mdopure toorai wako neya kuu'numwalpino'moneyokwe nuu duudapi yogalo me'no kwiyonyugono. Toro to'busuko kubalno aga kuga kuruv nuu manyu tomuu kuuno mwalodum yiuwi'nokai a'mwo ma'no ma'no pasudo sadokwopo toorai wako neya kuu'numwalpino'moneyokwe duudapi yogalo aval'no aro kwimwakono. “Nuu aki aiko te abekuru'ma'mi toga a'mwo ma'no ma'no pasudo sadokwopo su toorai wonyapino mimonyugono. Toro kwonyu kuruv kuudo nekuutemonyugono.” Duudapi yogalo su toro kwimwakono.
3Kevu mino aro yajunodupudogaikikono. “Krais tool Poololluro mago tovi'aro nemi nekudodowodoldukono oo manekudodowodoldukono?” Yajunodupudogaikikono. Toro yajunodupudo kuvi kuruv nuu kemi abekuru'ma'mi toga'no'gwowi aro kuudo nyanuupinogaikikono. Oo Krais tool Poololluro mago tovi'aro kuvinono nekudodowodoldeyo. Kuudo nyanuupinogaikikono. Neya duu'nyulo. Krais tool a'mwo jurogudo nonaguto pwolbusuko kemi maikullokwekono. Toro kwol kuruv kemi akuuto toru gamoro jurogudo tov kuu'maiyo toru'no ikuduuwallunodowodekono. 4Nebalokwono. Aiyoga Krais tool a'mwo jurogudo nonagutokwe pwolbusuko sumo'nyajukekono. Toro imo'noduke toollu i'noguropte tovi amovoromiyoguroptowosopekono. Toro kwol kuruv aga'no'gwowi Gooti toolluro jurogudo tovida'ai aiyo yomjomwekovla'mdowodekono. Su toro to'busuko kubalno nevu Krais toollu uuguro'mwonyodowado toonol Krais amovoromiyoguroptowosopo su toolbusuko jurogudo nonagutokwe imo'nodowadonogano. Toro kuvi kuruv nevu Krais toollu uuguru'mwonyodowado toonol kemi abekuru'mara'ji toga Gooti toolluro jurogudo to'gwowi ikuduuwallumwalanonogano. Toro toonol Gooti toolluro jurogudo su tokwe kemi akuuto toru aiyo yomjomwekovla'mwalanonogano.
5Kevnokwe togaikul kemoro kuudo uubweyodupudo tov nebal'nodo'mdukoneyokwe tovino neya jainyubwo'nogaulo. Aki kevnokwe togaikul yamju neya junogaulo. Kevnokwe togaikul yamju wiyoganopi aro tovino denodokwopiyomarogaulo. Oo Jisas Kraisol moro poowokalago tovi kuulonumwalodowodoldeyo. Su toro tovino neya denodokwopiyomarogaulo. Pugaikul yamju wiyoganopi Krais Jisasol kemoro poowokalago tovi maulekumwalo'ji to'gwowi kevu kuudo kuunodo muubweyodupudogaikikono. 6Toro kuvi kuruv nuu aro tovino nyunodowodonyugono. Kevu nemino tov, Oo a'mwo su tooro Krais toolluro kuurotokwe kuunodorodeyo. Su toro kuudo neya youronekumapino'moneyokwe nyunodowodonyugono.
7Toro te nevu Gooti toollu subusu'nyogalo aro wuudodowadonogano. “Oo Koorinda'ai a'mwo abolo su tobuuro ma'no ma'no pasudo nyumwalpiyokwe guu neya duuwiyo'mwojogawono.” Subusu'nyogalo su toro wuudodowado tov nevnokwenolluno aro wuuduuwallunyo'mo'maiyo. “Oo nevu Krais toolluro womdokwe kuunodo tovosonogano.” Su toro tovino wuuduuwallunyo'mo'maiyo. Toro kuvi kuruv kevu sugupasudo tovi neya imwalpino'moneyokwe tovino Gooti toollu subusu'nyogalo wuudodowadonogano. Toro te a'mwo pworo nemino aro kuudo sanekuupi tov, Oo su tooro Krais toolluro womdokwe kuunodoromaiyo. Su toro kuudo sanekuupi kuruv nemi aguto manekullumo'nonokwono. Kevu sugupasudo to'no mujumovla'mwalpino su to'gwowi nemi aguto nekullumo'nodowodokwono.
8Neya duu'nyulo. Nevu nebaikuuguudo tovi kisuvolo miyanonogano. Toro kuvi kuruv nemoro yiuwi'nokai womdo mujumovla'mdowado to'gwowi nebaikuuguudo su tovi sobanyo to'busuko molluulnoda'mdowodokwono. 9Nevu aro tovino ilaiyo yodowadonogano. Nevu a'mwo pworavuro sumdo tovi jurogudo nonaguto wimo'nodowadonogano. Su tov aro tovinokwono. Kevu jurogudo billumo'nodupudogaikikono. Kevu su toro billumo'nopi aki aguto yiunokuudo yogullopipino'moneyokwe tovino nevu Gooti toollu subusu'nyogalo wuudodowadonogano.
10Kuudo neya jaullulo. Aguto tool kemi jurogudo daikullumwojo'moneyokwe tov mi janubweno sumaiyokwe gamoro jurogudo tov me'no anubweyokaikono. Jurogudo anubweyoka su tov kemi kaiyako mourotovekwapiyo'mo'maiyo. Toro kuvi kuruv kemi jurogudo ikullumwojumovlaiyo'moneyokweyokwono. Toro te lukomgu nuu abekuru'ma'mi toga Aguto toolluro jurogudo tokwe kemi guureji daikumuuroleyo'mo manyunadopiyo. Toro te aga nuu manyu tomuu kuuno mwalodum kemi pas akav sokwollekwopiyamono.
Poololluro aiyowo'mo yogalo tovinokwono
11Mi avalobuuravoo, nuu aiyowo'mo yogalo akav ikudumo'mokwono. Kevu kemi poowokalago kuunodo togai ilaiyo neya jumovlavogaulo. Aki kevu Krais toolluro a'mwo abolo jurogudo neya jumo'nogaulo. Aki kemi poowokalago tonyu jurogudo duuwimwojo'moneyokwe moro yogalo tonyu ilaiyo neya domollomarogaulo. Aki kevu kuudo avalo puru'mono neya jou'movlavogaulo. Aki kemoro sumwoluko tov aval'no wosunopi kavo neya domwalogaulo. Kevu su toro somjomwekovlapi tov Gooti tool kevuge nomwalmwalonekono. Gooti su tool kemino kalo buuropino winyokwekono. Aki kevu sumwoluko puru'mono wosunyo'moneyokwe kuruv Gooti su tool nokwo ikubwemwalonekono.
12Kevu Jisasolluro a'mwo abolo togaikul imgu amgu iru'mato sunpi toga kemi poowokalago togai wiyo'moneyokwe suuwado tonyu molluduuduulo neya inpinogaikikono. 13Aki yiuwi'nokai Gooti toolluro a'mwo abolo akawaida'ai ton kemiyomno, “Ilaiyokwonoo,” adekwopiyamapogano.
14Oo aro tovino nyunodowodonyugono. Nemi Aguto Jisas Kraisolluro yasuwa'wino sugumaluko tov kemi nekubwemwalonekono. Aki Gooti toolluro kalo buuropino winodowodo tov kemi nekwo'mwalonokwono. Aki Gooti toolluro Kuullo tool kemoro yiuwi'nokai poowokalago go'no go'nodo tonyu aval'no moguro'mwojaikubweyowo'ji kevu puru'mono nokwo guro'mwonyumwalpinogaikikono.
Currently Selected:
2 Koorin 13: SMB
Highlight
Copy
Compare
Share
Want to have your highlights saved across all your devices? Sign up or sign in
© 2022: Ethnos360 Sanford, Florida
