1 Kuuguudo 22
22
Devitol Gooti Yawellu ilomoropiyo'moneyokwe ago tovi mojo'moneyokwe ton sogwolosoka tovinokwono
1To'no'gwowi Devitol aro adokaikono. “Nevu Gooti Yawellu ilomoropiyo'moneyokwe ago tov akawai modanokwono. Aki Isuraiyolda'ai ton Gooti Yawellu wiroudapiyo'moneyokwe dukwagupto kurukwe'aro avalo akawai yokwollosanokwono. Toro sokwollosa'ji tovi muunyu toru duko tovi yiunokuudo nopiyono'moneyokwe ibesa'aiyo pworai romiroudapimwalanonogano.” Adokaikono. 2A'mwo kantri pumuuda'ai pworo Isuraiyolda'ai togai bomwalodupudorogano. Devitol a'mwo bomwalodupudo su toorai doma'no sumaiyokwe abi'bwo'nopo toorai womdo tov aro kwiyokaikono. Gooti toollu ilomoropiyo'moneyokwe ago tovi mojo'mo sulo pun doviyovo'dogaloso'moneyokwe a'mwo pworai ajesokaikono. 3Aki Devitol aiyon bwotonyago togai'aro amollogwolosokaikono. Aiyon su ton pun kudo'aiko tovi romiyomjagullo'mo nillo ton yakwollo'mogano. Pun kudo'aiko tovi gudupolallo'mo hijes ton yakwollo'mogano. Toro ton mollogwolosuno sumaiyokwe aki aiyon sallukwa'jo bwotonyago pugai'aro amollogwolosokaikono. Aiyon sallukwa'jo su tonyu ku'nono majagillajuporogano. 4Aki Devitol iko pun yogwoloso'moneyokwe a'mwo Tairuda'ai toorogai'aro Saidoonda'ai toorogai'aro tooro amokabupureyokweyo'mo ajesokarogano. Toro tooro iko sida bwotonyago ton dovobworomwora'dupu Devitollomno amokabiyajuporogano. Iko bwotonyago amokabiyajupo su tonyu ku'nono majagillajuporogano. 5Devitol toro yogwoloso'no aro adokaikono. “Gooti toollu ilomoropiyo'moneyokwe ago tov moro muugunyo Sooloomonol modono kuvi kuruv muugunyo su tool agutolmaiyo. Aki toro tool ago mojo'mo tovino kuudo maiyekono. Toro tovino tov ago su tovi mojo'moneyokwe nuvnokwe toonyu yiuwi'nokai ton neya yogwolosumo. Toro sogwolosumi togai moro muugunyo tool lukomgu ago bwotonyo sugumaluko puruv nokwo modonekono. Toro amodo'ji tovi yiuwi'nokai a'mwo abolo kwako akavi mwalodupudo ton bwonopi aro dumaupinogano. “Oo ago su tov sugumaluko kuunodo'mdeyo,” dopi yiuwi'nokai tomuu modomollupinogano.” Devitol toro juno sumaiyokwe yere maboloduke toga ago tovi mojo'moneyokwe bwotonyago ton yiuno'no sogwolosokaikono.
6Toruda'ai Devitol gami muugunyo Sooloomonollu doma'no sumaiyokwe aro aduuwiyokaikono. “Guu nevu Isuraiyol tonolluro Gooti Yawellu ilomoropiyo'moneyokwe ago tovi modubinekugono.” Aduuwiyokaikono.
Currently Selected:
1 Kuuguudo 22: SMB
Highlight
Copy
Compare
Share
Want to have your highlights saved across all your devices? Sign up or sign in
© 2022: Ethnos360 Sanford, Florida
