Daniel 1
1
Sc'oplal Daniel xchi'uc xchi'iltac te ta Babilonia
1C'alal yoxibal jabil xa'ox yochel ta ajvalilal ta Judá li Joaquime, ibat ta Jerusalén li Nabucodonosor ajvalil ta Babiloniae; te c'ot setuic xchi'uc yajsoldadotac.#2 R 24.1; 2 Cr 36.5-7. 2Li Diose laj yac' ta sc'ob Nabucodonosor li Joaquime, jech la xchuc batel ta Babilonia. Jech noxtoc laj yac'be ta sc'ob ep li c'usitic chtun te ta xch'ulna Muc'ul Diose. Li Nabucodonosore te c'ot yac' scotol ta xch'ulna diosetic yu'un; te la stic' ta snail sc'ulejal li diosetic yu'une. 3Li ajvalile laj yalbe mantal li Aspenaz, ja' li banquilal j'abtel yu'une, yu'un ac'o yic' tal jayibuc judaetic, ja' li xnich'nabic banquilaletique. 4Ja' ac'o yic' tal li jilum queremetic ti leque, ti lec c'oq'uique, ti oy lec sbijilique, ti oy c'usi lec sna'ique, ti oy c'usi lec xotquinique, yu'un jech xu' yu'un ch-abtejic ta stojol ajvalil. Ja' chlic yich'ic chanubtasel ta sc'op xchi'uc ta sts'ib li caldeaetique.#2 R 20.17-18; 24.10-16; 2 Cr 36.10; Is 39.7-8. 5Li ajvalile laj yal mantal ti ja' jech ac'o ve'icuc ec li queremetic jech chac c'u cha'al sve'el stuque; ja' ac'o yuch'ic ec li pasem ya'lel ts'usub chuch' stuque. Oxib jabil ac'o xchanubtasic lec; ts'acal xu' chlic tunicuc yu'un li ajvalile.
6Ja' te nabal laj yich'ic t'ujel ec li Daniel, Ananías, Misael, xchi'uc Azarías liquemic ta sts'unubal Judae. 7Li banquilal j'abtel yu'un ajvalile la sjelbe sbiic li queremetique: Li Daniele Beltsasar laj yac'be sbi; li Ananiase Sadrac laj yac'be sbi; li Misaele Mesac laj yac'be sbi; li Azariase Abed-nego laj yac'be sbi. 8Pero li Daniele ic'ot ta yo'nton ti mu xu' ta soques sba ta scoj li sve'el yuch'um ajvalile, jech lic yalbe banquilal j'abtel yu'un ajvalil ti mu me sujatic ta sve'el ta yuch'ele, yu'un jech mu sbolibtas sbaic. 9Li Diose laj yac' ti ac'o lec ilatuc, ti oyuc slequil yo'nton ta stojol Daniel li banquilal j'abtel yu'un ajvalile. 10Pero li banquilal j'abtel yu'un ajvalile, jech laj yalbe li Daniele:
—Chixi' yu'un li cajvale, yu'un ja' laj yal stuc li c'usi chave' chavuch'ique. C'alal chil ti vo'oxuc jeche' sacpac'anoxuc ta scotol li yantic queremetique, vo'oxuc ta acojic me laj yac'un ta milel li ajvalile —xut.
11Li Daniele jech laj yalbe li yaj'abtel ajvalile, ja' li boch'o yich'oj yabtel ta sventainel li Daniel, Ananías, Misael, xchi'uc Azariase:
12—Abulajan paso preva avil lajunebuc c'ac'al; ja' no'ox ac'bun jve'cutic c'usitic chch'i ta banamil, xchi'uc ac'bun vo' cuch'cutic. 13C'alal me sta lajuneb c'ac'ale, co'oltsanuncutic avil xchi'uc li yantic queremetic ti co'ol sve'elic xchi'uc ajvalile; ja'o xu' chanop c'usi chapas ta jtojolcutic ti me avil c'u xi'elancutique —xut.
14Li xchi'il ta abtel ajvalile lec laj ya'ay li c'usi i'albate, jech lic spas preva lajuneb c'ac'al. 15C'alal la sta lajuneb c'ac'ale, ja' toj lec satic, lec sololic; ja' mu sta jech li yantic queremetic ti co'ol sve'elic xchi'uc ajvalile. 16Ja' yu'un li xchi'il ta abtel ajvalile mu'yuc laj yac'be o sve'ic li c'usitic sc'oplal chac'be sve'ique. Ja' no'ox laj yac'be sve'ic li c'usitic chch'i ta banamile.
17Li chanib queremetic le'e i'ac'bat lec sbijilic; ijambat lec satic yu'un Dios ta yotquinel ep vunetic xchi'uc chanubtaseletic. Li Daniele lec sna' yalbel smelol vaychiletic xchi'uc c'usi chil ta xch'ulelic. 18C'alal ic'ot sc'ac'alil c'usi ora albil chbat sva'an sbaic ta stojol ajvalile, li banquilal j'abtel yu'un ajvalile laj yic' batel ta stojol li Nabucodonosore. 19Li ajvalile la sc'opan li queremetique. Mu'yuc yan queremetic la sta jech chac c'u cha'al li Daniel, Ananías, Misael, xchi'uc Azariase, jech te i'ochic o ta abtel yu'un li ajvalile. 20Scotol li c'usitic toj tsotsic la sjac' ajvalil ta sventa li bijililetique, lajuneb velta xjelov sbijilic laj yil ta scotol li boch'otic sna'ic sq'uelel senyail ta vinajele xchi'uc li jt'unuletic ta scotol ti c'u smuc'ul sventainoje. 21Li Daniele te i'abtej o ta stojol ajvalil c'alal to ta sba jabil yochel ta ajvalilal li Ciroe.#Esd 1.1.
Currently Selected:
Daniel 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.