Daniel 2
2
Laj yalbe smelol xvayech Nabucodonosor li Daniele
1C'alal xchibal jabil yochel ta ajvalilal li Nabucodonosore, ivaychin. Toj ep ilo'ilaj yo'nton; solel muc xvay o. 2Jech la stac ta iq'uel li boch'otic sna'ic sq'uelel senyail ta vinajele, li jt'unuletique, xchi'uc li boch'otic xotquinbeic senyail c'usi chc'ot ta pasele xchi'uc scotol li boch'o bijique, yu'un ac'o yalbeic li c'usi laj yil ta xvayeche. Jech ibatic ta stojol li ajvalile. 3Li ajvalile jech laj yalbe:
—Oy c'usi laj quil ta jvayech, pero solel i'ech' xa co'nton ta snopel c'usi smelol —xut.
4Li bijil viniquetique jech laj yalbeic ta arameo c'op li ajvalile:
—Ajvalil, ich'bilucot ta muc'. Vu'un li avajtuneluncutique albuncutic li avayeche; ta xcalcutic ava'ay li c'usi smelole —xutic.
5Itac'ov li ajvalile:
—Li c'usi jnopoje ja' ta jc'an chavalbicun ca'ay li c'usi la jvaychine. Me mu xavalbicun c'usi la jvaychin xchi'uc c'usi smelole, biq'uitic chavich'ic sesinel. Li anaique puru slilijemal xa te chcom. 6Yan me chavalbicun ca'ay li c'usi la jvaychine, xchi'uc li c'usi smelole, ta xcac'boxuc ep amotonic, xchi'uc ta xcac'oxuc ta ich'el ta muc'. Albicun tal ca'tic c'usi la jvaychine xchi'uc li c'usi smelole —xut.
7Itac'ovic xchibal velta:
—Albuncutic li avayeche; ta xcalcutic ava'ay li c'usi smelole —xiic.
8Itac'ov li ajvalile:
—Ta jna' ti ja' no'ox chac'anic ac'o jalijuque, yu'un laj xa ava'yic li c'usi oy ta co'ntone. 9Me mu xavalbicun ca'ay li c'usi la jvaychine xchi'uc li c'usi smelole, co'ol stojol amul chavich' ta acotolic. Yu'un chquil ti chac'an chanopic xa no'ox li stac'ubil chavalbicun tale. Ja' xa no'ox chac'an cha'epalc'opojic, yu'un laj avaq'uic jalijuc. Albicun tal li c'usi la jvaychine, jech ta jna' ti xu' avu'un chavalbicun noxtoc li smelole —xi.
10Li boch'o sna'ic sq'uelel senyail c'usi chc'ot ta pasele jech laj yalbeic li ajvalile:
—Ajvalil, mu'yuc boch'o li' ta banamil ti xu' tsna' li c'usi chajaq'ue. Jech noxtoc me junuc ajvalil, ac'o me tsots svu'el, ac'o me tsots yabtel, mu'yuc jech tsjac'be junuc bijil vinic, jt'unul, o me ja' li boch'o sna'be senyail c'usi chc'ot ta pasele. 11Li c'usi chajaq'ue ajvalil, toj tsots; mu'yuc boch'o xu' chastac'bot. Ja' no'ox xu' chastac'bot li diosetic ti muc li'uc xchi'inoj ta naclej cristianoetique —xiic.
12C'alal laj ya'ay jech li ajvalile, bats'i tsots i'ilin. Ta sc'ac'al yo'nton laj yal mantal ti ac'o yich'ic milel scotol li bijil viniquetic te ta Babiloniae. 13C'alal loq'uem xa mantal chich'ic milel scotolique, lic yich'ic t'unel ec li Daniel xchi'uc xchi'iltaque,#Dn 1.20. yu'un ac'o milaticuc.
14Li Daniele ibat sc'opan ta sventa sbijil, ta sventa lequilc'op li Arioc banquilal soldado yu'un ajvalil ti yu'un xa'ox chbat smil li bijil viniquetique. 15Jech laj yalbe:
—¿C'usi smelol ti ta anil no'ox laj yal mantal ajvalil jech chich' pasele? —xut.
Li Arioque lic xcholbe ya'ay smelol c'u yu'un ti jech chich' pasele. 16Li Daniele i'och batel ta stojol li ajvalile; la sc'anbe vocol ti ac'o to smala jutuque, yu'un ja' chalbe ya'ay li c'usi la xvaychine xchi'uc li c'usi smelole. 17Li Daniele ibat ta sna, c'ot yalbe ya'yic xchi'iltac li c'usi chc'ot ta pasele, ja' li Ananías, Misael, xchi'uc Azariase. 18Laj yalbe ti ac'o sc'anbeic vocol Dios ta vinajele, yu'un ac'o svinajes li c'usi mucule, jech mu xlajic ta milel xchi'uquic li bijil viniquetic te ta Babiloniae. 19Li Daniele ta yac'ubalil no'ox i'ac'bat yil li c'usi mu sna'ique, jech lic yalbe slequilal li Dios ta vinajele, 20jech laj yal:
“Sbatel osil ich'biluc o ta muc' sbi li Diose,
yu'un ja' yu'un li bijilil xchi'uc li tsatsalile.#Job 12.13; Pr 2.6.
21Ja' tsjel ti c'u x'elan ora chtale,
xchi'uc ja' tsjel c'u x'elan chtal li jujun jabile.
Ja' tsloq'ues, xchi'uc ja' tstic' ta yabtel li ajvaliletique.
Ja' chac'be ep sbijil li boch'otic bijique;
ja' tsjambe sat li boch'otic oy c'usi lec sna'ique.
22Ja' tsvinajes li c'usi mucule, xchi'uc li c'usi nac'ale;
ja' yiloj li c'usi oy ta ic' osile,
yu'un puru sac osil te xchi'uc ta naclej.#Job 12.22; Sal 139.11-12.
23Dios, vo'ot li Diosot yu'un jmoltot jyame'tac ta vo'onee,
chajtojbot ta vocol, ta xcalbot alequilal,
yu'un vo'ot laj avac'bun jbijil xchi'uc jtsatsal.
Li' ta orae laj avac'bun quil li c'usi la jc'anbotcutique,
yu'un laj xa avac'bun jna' li c'usi tsc'an tsna' li ajvalile”, xut li Diose.
24Ts'acal to, li Daniele ibat ta stojol li Arioc banquilal soldado yu'un ajvalile, ja' li boch'o albil yu'un ajvalil chbat smil li bijil viniquetic ta Babiloniae, jech c'ot yalbe:
—Mu xamil li bijil viniquetique. Ic'un batel ta stojol li ajvalile, vu'un ta xcalbe ya'ay li c'usi la xvaychine xchi'uc li c'usi smelole —xut.
25Ja' yu'un li Arioque ta ora laj yic' batel ta stojol ajvalil li Daniele, jech c'ot yalbe:
—Oy la jta jun vinic te ta stojol li boch'otic chucbil iloq'uic tal ta Judae; ja' xu' yu'un chayalbot c'usi smelol li avayeche —xut.
26Li ajvalile jech laj yalbe li Daniel, ja' li Beltsasar sbi yu'unique:
—¿Me vo'ot xu' avu'un chavalbun li c'usi la jvaychine xchi'uc li c'usi smelole? —xut.
27Itac'ov li Daniele:
—Ajvalil, li c'usi chajac' ti mu'yuc boch'o sna'e, mu'yuc boch'o xu' yu'un chac' ana', me junuc boch'o sna' sq'uel senyail ta vinajel c'usitic chc'ot ta pasel, me junuc jt'unul, me junuc li boch'o sna'be senyail c'usi chc'ot ta pasele, mu'yuc boch'o xu' chayalbicot. 28Pero oy jun Dios te ta vinajel, ja' xu' yu'un tsvinajes li c'usitic mucule. Ja' tsc'an chac'bot ana' li c'usi ta to xc'ot ta pasel ta atojol ta ts'acal, vo'ot li ajvalilote. Li c'usi laj avil ta avayeche, li c'usi laj avil ta ach'ulele, ja' jech chac li'i: 29C'alal mocholot ta avayabe, te lic anopilan c'usi chc'ot ta pasel ta ts'acal. Pero li Boch'o xu' yu'un chac' ta na'el li c'usitic mu'yuc boch'o sna'e ja' laj yac'bot avil li c'usi ta xc'ot ta pasele. 30Li vu'une ac'bilun xa quil li c'usi mu xvinaje. Pero ma'uc yu'un vu'un toj ven bijun ta scotol li cristianoetique. Ja' no'ox ta sventa ac'o ana' c'usi smelol li avayeche, xchi'uc ac'o ana' li c'usi chanopilan ti chac'an chana'e.
31“Li c'usi laj avil ta avayeche ajvalil, ja' jun muc'ta loc'om. Li loc'ome bats'i muc' ta jyalel, yan to sba slequil, solel chac' lec xojobal, toj xi'bal sba ta q'uelel. 32Li sjole pasbil ta bats'i lequil c'anal taq'uin. Li sna yo'nton xchi'uc li ste'eltac sc'obe pasbil ta saquil taq'uin. Li xch'ut xchi'uc xchibal yo'e pasbil ta bronce. 33Li ste'el yacane pasbil ta tsatsal taq'uin. Li xpoch'omal yacan xlic ta sat yacane oy juteb pasbil ta tsatsal taq'uin, oy juteb pasbil ta lum chic'bil ta c'oc'. 34C'alal te aq'ueloje, ic'oc tal stuc jbej ton; muc ta c'abaluc laj yich' c'oquel tal. Toj lilijel ic'ot yu'un li yacan muc'ta loc'om pasbil ta tsatsal taq'uin ti pasbil ta chic'bil lume. 35Jech ililij o li tsatsal taq'uine, li lum chic'bil ta c'oq'ue, li broncee, li saquil taq'uin xchi'uc li c'anal taq'uine; ipas ta pucuc scotol. Ja' jech ibat ta ic' jech chac c'u cha'al solil trigo c'alal chich' majel ta yorail q'uepelaltique. Me jutuc mu'yuc xa c'usi icom. Yan li ton ti la slilin li muc'ta loc'ome, ipas ta jun muc'ta vits; la snojes scotol li banamile.
36“Ja' jech li c'usitic laj avil ta avayeche. Li' ta orae ta xcal tal ava'ay noxtoc li c'usi smelole. 37Li vo'ote, ajvalil, ajvalilot yu'un scotol li ajvaliletique, yu'un li Dios te oy ta vinajele laj yac'bot aventain scotol; laj yac'bot avu'el, atsatsal, xchi'uc laj yac'ot ta ich'el ta muc'. 38Laj yac'bot ta ac'ob scotol ta buyuc xa no'ox nacalic batel li cristianoetique, xchi'uc li chonbolometique, xchi'uc li mutetique; laj yac'bot aventain scotol. Ja' yu'un vo'ot senyailot li sjol loc'om pasbil ta c'anal taq'uine. 39C'alal chlaj sc'oplal avabtel li vo'ote, ta xlic yan ajvalil, pero mu sta jech stsatsal jech chac c'u cha'al vo'ot. Ts'acal ta xlic yoxibal ajvalil noxtoc; ja' jech stsatsal jech chac c'u cha'al bronce. Ja' chlic sventain scotol banamil. 40Li xchanibal ajvalil ta xlique toj tsots jech chac c'u cha'al tsatsal taq'uin. Jech chac c'u cha'al li tsatsal taq'uin ti ep c'usitic xu' yu'un ta sliline, ti ep c'usitic xu' yu'un ta sc'ase, ja' jech ta slilin, ta xules scotol yantic ajvalil.
41“Li xpoch'omal yacan, xchi'uc li sbic'tal yacan ti j'o'lol patbil ta lum, j'o'lol pasbil ta tsatsal taq'uine, ja' smelol chib ajvaliletic ti scontra chil sbaique. Ac'o me oy to jutuc stsatsal li taq'uine, pero laj avil ti capbil ta lum chic'bil ta c'oq'ue. 42Li yacan ti j'o'lol pasbil ta tsatsal taq'uin xchi'uc ti j'o'lol patbil ta lum laj avile, ja' smelol ti jliquel xa no'ox oy stsatsal, jliquel xa mu'yuc stsatsal li ajvalile. 43Jech chac c'u cha'al laj avil ti capal ta patbil lum li tsatsal taq'uine, ja' jech ta scap sbaic li cristianoetic ta chib lume, pero mu ono'ox spasic o ta jun, jech chac c'u cha'al mu ono'ox scap sba o xchi'uc patbil lum li tsatsal taq'uine. 44C'alal ja'o ochemic ta ajvalilal li ajvaliletic le'e, li Dios te oy ta vinajele ta sliques jun ajvalil; mu'yuc boch'o xu' chtuch'bat yabtel, mu junuc lum chtal tsalatuc yu'un. Ja' ta stsal, ja' ta slajesbe sc'oplal scotol li yantic ajvaliletique; yan li stuque j'ech'el te chcom o sbatel osil. 45Ja' smelol ti laj avil ic'oc tal stuc jbej ton ta vitse ti muc ta c'abaluc ibalch'unat tale, ti la slilin li tsatsal taq'uine, li broncee, li patbil lume, li saquil taq'uine xchi'uc li c'anal taq'uine. Li Dios ti toj muq'ue ja' laj yac'bot avil li c'usi ta to xc'ot ta pasele. Muc jeche'uc no'ox li avayeche, oy lec smelol; ja' melel, bejel laj avil li c'usi chc'ot ta pasele”, xut.
46Ja' yu'un li ajvalil Nabucodonosore la squejan spatan sba ta banamil ta stojol li Daniele, xchi'uc laj yal mantal ti ac'o yac'beic matanaletic xchi'uc pome. 47Jech laj yalbe li Daniele:
—Ta melel, li Dios avu'une ja' Dios yu'un li yantic diosetique, ja' Ajvalil yu'un li muc'tic ajvaliletique; ja' chac' ta ilel li c'usi mu'yuc boch'o sna'e, jech ivu' avu'un laj avinajes li c'usi mu xvinaje —xut.
48Li ajvalile laj yac'be tsots yabtel li Daniele; laj yac' ta ich'el ta muc', xchi'uc laj yac'be ep lequil matanaletic. Jech noxtoc laj yac' ochuc ta banquilal jpasmantal ta sventa scotol li yosilal Babiloniae, xchi'uc ja' banquilal jpasmantal ic'ot yu'unic scotol li bijil viniquetic te ta Babiloniae.
49Li Daniele la sc'anbe vocol ajvalil ti ac'o yac'be tsots yabtelic te ta yosilal Babilonia ec li Sadrac, Mesac, xchi'uc Abed-negoe. Yan li Daniele ja' la xchi'in o ta abtel li ajvalile.
Currently Selected:
Daniel 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.