Tito 2
2
I'albat Tito ti ac'o xchanubtas c'usi lec tspas li jch'unolajeletique
1Pero li vo'ote, ja' me xaval li c'usi xco'laj xchi'uc lequil chanubtasele. 2Li moletique, albo ya'yic ti ac'o snop lec c'usi tspasique, ti ac'o oyuc lec srazonique, ti ac'o sq'uel sbaic leque, xchi'uc ti ac'o xch'unic leque, ti ac'o c'uxubinvanicuque, xchi'uc ti ac'o oyuc smuc'ul yo'ntonique. 3Ja' no'ox jech ec li me'eletique, albo ya'yic ti ac'o yich'beic lec smelole. Mu me puru lo'iltavanejuc tspasic, xchi'uc mu me xyacubic. Ja' tsc'an ja' ac'o yaq'uic ta chanel li c'usi leque. 4Yu'un jech ac'o yac'beic xchan c'u x'elan ac'o sc'an lec smalalic li tsebetique, xchi'uc c'u x'elan ac'o xc'uxubin li yolique, 5ti ac'o sq'uel sbaic leque, ti ja' ac'o spasic c'usi leque, ti ac'o sq'uel lec yut snaique, ti ac'o oyuc slequil yo'ntonique, xchi'uc ti ac'o xch'unbeic smantal smalalique, yu'un jech mu xchopolc'optaat yu'unic li sc'op Diose.
6Jech noxtoc li queremetique, albo mantal ti ac'o sq'uel sbaic leque. 7Ta sventa scotol le'e, tsc'an vo'ot chavac' ta ilel li c'usi lec ta pasele. Lec me xachanubtasvan; oyuc me lec smelol c'usi chaval. 8Oyuc me lec stu li ac'ope; lec me ac'o batuc avu'un scotol, yu'un jech mu chopoluc chc'opojic ta jtojoltic li boch'o chopol yo'ntonique, jech te ta xq'uexov stuquic.
9Jech noxtoc li boch'o ochemic ta mozoile, albo ti ac'o xch'unbeic scotol smantal li yajvalique, ti lec ac'o spas sbaique, ti mu me staq'uilanic li c'usi ch-albatique. 10Mu me smucul elc'anbeic c'usi oy yu'un li yajvalique. Ac'o yaq'uic ta ilel ti tuc' yo'ntonique, yu'un jech lec chbat sc'oplal li lequil chanubtasel yu'un Diose, ja' li Jcoltavanej cu'untique.
11Yu'un laj xa yac' ta ilel li slequil yo'nton Diose, ja' ti tal yac'be scoltaelic scotol cristianoetique. 12Li slequil yo'nton Diose ja' chac' c'otuc ta co'ntontic ti ac'o jcomtsantic c'usi chopole xchi'uc li sc'upinel c'usitic sventa banamile, yu'un jech lec xa c'usitic ta jpastic batel; tuc' c'usitic chlic jpastic, xchi'uc ja' xa no'ox chquich'tic o batel ta muc' li Diose. 13Jech jun no'ox co'ntontic ta jmalabetic sc'ac'alil li c'usi toj jun yutsile, ja' ti c'alal tsut tal li Muc'ul Dios Jcoltavanej cu'untique, ja' li Cristo Jesuse.#2 P 1.1. 14Ja' ti laj yac' sba ta milel ta jcojtic,#Mt 20.28; Mr 10.45; Gá 1.4; 1 Ti 2.6. yu'un jech la spojutic loq'uel ta sventa c'usitic chopole,#Sal 130.8; Mt 20.28. xchi'uc ti la slecubtasutic sventa chijyu'uninutique,#Ex 19.5; Dt 4.20; 7.6; 14.2; 1 P 2.9. xchi'uc ti jutebuc co'ntontic ac'o jpastic c'usi leque.
15Ja' me jech xavalbe ya'yic, ja' me jech xachanubtas, ja' me jech xataq'ui, yu'un oy avabtel ta stojol Dios. Mu me boch'o xaslabanot.
Currently Selected:
Tito 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.