Rut 2
2
Rut la stsob trigo ta trigoaltic yu'un Booz
1Li Elimeleque, ja' li anima smalal Noemie, oy jun yuts' yalal, Booz sbi. Li Booze lec jc'ulej.
2Li Rute jech laj yalbe li Noemie:
—Me chacoltaun batel, yu'un chibat ta trigoaltic, ta jq'uel me oy junuc jtuch' trigo chac'bun jtsob batel ti bu chcom ta tuch'el yu'une#Lv 19.9-10; Dt 24.19. —xut.
—Lec oy, batan tseb —xi itac'ov li sme'el'alibe.
3Li Rute ibat; te c'ot stsob trigo ta yut trigoaltic. Te nom-ts'ac batel ta spat li jtuch' trigoetique. Li trigoaltique ja' yu'un li Booze,#2.3 Booz - Ta hebreo c'op ja smelol oy lec stsatsal. ja' li yuts' yalal anima Elimeleque. 4Li Booze ibat ta Belén; te c'ot sc'opan li svinictaque, jech laj yalbe:
—Ac'o xchi'inoxuc li Muc'ul Diose —xut.
—Jech ac'o yac'bot ep bendición ec li Muc'ul Diose —xi itac'ovic.
5Li Booze jech lic sjac'be li scapurale:
—¿Boch'o tsebal le'e? —xut.
6Itac'ov li capurale:
—Ja' Moab tseb yic'oj tal li Noemie. 7Jech vul yal: ‘Avocoluc ac'bun jtsob ec li trigo bu chcom ta tuch'el yu'unic jtuch' trigoetique’, xi. Jech te lic stsob. Sob lic sjapu, yoquel to sbats'il o; me jutuc mu'yuc bu chcux —xi li capurale.
8Li Booze jech laj yalbe li Rute:
—A'yo ava'ay tseb. Mu me bu xbat atsob trigo ta yan trigoaltic. Li' no'ox xatsobe; li' xachi'in li jquiarataque. 9Te nablan batel ta spatic li jtuch' trigoetic cu'une. Laj xa calbe ya'ay jvinictac ti mu me xayuts'intaicote. Me itaquij avo'ntone, bat uch'an vo' te ta yavil ca'alcutic ti slupojic jvinictaque —xut.
10Li Rute la spatan sba ta banamil; laj yich' ta muc', jech la sjac'be:
—¿C'usi smelol ti jech chac'uxubinune yu'un ana'oj ti vu'un yan jlumale? —xut.
11Itac'ov li Booze:
—Yu'un la jna' scotol c'usi lec laj apas ta stojol ame'el'alib Noemí ti c'alal chamen xa'ox li smalale. Ja' laj acomtsan li atot ame' bu lavoq'ue; li' latal ta yan lum ti mu xavotquine. 12Muc'ul Dios chayac'bot atojol ti jech laj apase. Li Muc'ul Diose, ja' li Dios yu'un Israel ti laj asa' sventa chascoltaote, ja' chayac'bot amoton ta sventa scotol li c'usitic laj apase —xut.
13Itac'ov li Rute:
—Toj lec avo'nton ta jtojol. Scotol li c'usi laj avalbune, lec chpat co'nton yu'un. Lec ac'anojun, ac'o me muc vu'cun aquiaraun —xi.
14C'alal yorail chve' li Booze, laj yic' li Rute, jech laj yalbe:
—La' ve'an. Tsaco pan li'i; ts'ajo li' ta tatal ya'lel ts'usube —xut.
Li Rute te ichoti xchi'uc li jtuch' trigoetique. Li Booze laj yac'be lec sve'el, jech te ive', Lec inoj xch'ut; icom to scomelal yu'un. 15C'alal bat stsob yan velta trigo li Rute, li Booze jech laj yalbe li svinictaque:
—Ac'beic stsob noxtoc li trigo te yo' bu oy achucbil trigoique; mu me xaq'uexlaltasic. 16Ac'o me xabots'ic comel jlicanticuc ti bu chucbil xa avu'unique yu'un ja' ac'o stsob tal ec, pero mu me c'usi xavalbeic —xut.
17Li Rute te la stsob li trigoe; te imal o c'ac'al#2.17 C'ac'al - Oy boch'o chalic jtotic. yu'un. Te lic smaj ti c'u yepal la stae; ja' iloc' yu'un ech'em ta jtob (20) kilo. 18Jech isut batel ta lum; yich'oj batel li strigoe, c'ot yac'be sq'uel li sme'el'alibe. La sloq'ues noxtoc li scomelal sve'ele; laj yac'be li sme'el'alibe.
19Jech laj yal li Noemie:
—¿Bu la'ay ta abtel naxe? ¿Bu ay atsob tal li trigo ti toj ep laj ata tale? Ac'o ac'batuc ep bendición yu'un Dios li boch'o toj lec la xc'uxubinote —xut.
Itac'ov li Rute:
—Li boch'o li'abtej yu'une ja' jun vinic, Booz sbi —xut.
20Li Noemie jech laj yal:
—Ac'o ac'batuc ep bendición yu'un li Muc'ul Diose, yu'un toj lec chixc'uxubinutic ta ora jech chac c'u cha'al la xc'uxubinutic li anima jmalaltique. Yu'un ja' mero cuts' calaltic,#Lv 25.25. ja' yu'un ja' oy ta sventa chiscoltautic —xut.
21Li Rute jech to laj yal:
—Laj yalbun noxtoc ti xu' te chc'ot jtsobilan oe, ja' to me la xtuch'ic scotol li svinictaque —xut.
22Li Noemie jech laj yalbe li yalibe:
—Tseb, ja' lec me ja' te chachi'in o ta abtel li squiarataque; mu xabat ta yan trigoaltic, yu'un jech mu'yuc boch'o xu' chayuts'intaot —xut.
23Ja' yu'un li Rute te la xchi'inbe ta abtel squiaratac li Booze; te la stsobilan o li trigoe. Ja' to ilaj yo'nton ec ti c'alal la xtuch'ic scotol cebada xchi'uc trigo li svinictac Booze. Te la xchi'in o ta naclej li sme'el'alibe.
Currently Selected:
Rut 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.