Proverbios 31
31
Taq'uiel ta sventa jun ajvalil
1Li'i ja' ya'yej slo'il Lemuel ajvalil ta Masa; ja' laj yal li c'usi ichanubtasat yu'un sme'e:
2Querem, vo'ot ti la jvoq'uesot, ti laj cayintasote,
vo'ot li stac'ubilot ca'yej jlo'il ti xivocolet ta stojol Diose,
oy c'usi ta jc'an chacalbot:
3Mu me xavontol lajes atsatsal ta stojol li antsetique,
yu'un li antsetique ja' chaq'uic ch'ayuc ta be li ajvaliletique.
4Lemuel, mu lecuc me chuch'ic pox li ajvaliletique;
mu lecuc me chyacubic li banquilaletique.
5Me jech te chuch'ilanic o poxe, xu' chlic ch'ayuc ta yo'ntonic li mantaletique,
jech mu xa stuc'ulanbeic o ya'yej li boch'o abul sbaique.
6Te ac'o yuch'ic pox li boch'otic mu'yuc stsatsalique
xchi'uc li boch'otic tsots svocolique,
7yu'un jech xu' chch'ay ta yo'ntonic ti abul sbaique, jech mu xa sna'ic ti ep svocolique.
8Coltao ta lo'il li boch'o mu sna' xlo'ilajique;
coltao li boch'o mu xu' yu'un tspoj sbaique.
9C'opojan, tuc' xachapanvan;
coltao li me'onetique xchi'uc li boch'otic toj abul sbaique.
Sc'oplal jun ants ti lec yabtele
10Li lequil ants, xchi'uc ti toj baxbole toj vocol ta tael,
yu'un ja' toj ech'em slequil jech chac c'u cha'al tonetic ti toj c'upilic sbae.
11Li smalale lec spatoj yo'nton yu'un;
scotol no'ox ora tsta lec c'usitic oy yu'unic.
12Scotol c'ac'al ti jayib c'ac'al cuxule
puru lequic yabtel ta stojol li smalale.
13Ta xbat sa' tal tsotsil chij xchi'uc lino no,
jech xcuxet yo'nton chlic spas yabtel.
14Ja' jech ch-abtej jech chac c'u cha'al jun barco sventa bolomajel
ti nom to chbat xcuch tal c'usitic chtune.
15Ic' to chlic sventa chac'be sve'el li yalabtaque,
xchi'uc chalbe c'usi ac'o spas li squiarataque.
16Ta xbat sq'uel me oy bu lec jsepuc osil yu'un ta sman;
te ta xlic sts'un o sts'usub; ja' chlic stunes ti c'u yepal spasoj canal ta sventa yabtele.
17Ta xchuc lec xch'ut, ta xich'be lec yipal;
xcuxet no'ox yo'nton chbat abtejuc.
18Oy ta yo'nton ti lec ac'o batuc li yabtele;
te chnaxub o ac'ubal yu'un, te xojoban o sluz xchi'uc.
19Ta sc'ob stuc chlic naojuc;
ta sc'ob stuc chlic jalubajuc.
20Ta xc'uxubin li me'onetique;
ta scolta li boch'o abul sbaique;
21C'alal chyal ep tayoe, mu xat yo'nton ta sventa li yalabtaque,
yu'un lec pimic li sc'u' spoc' yu'une.
22Ja' stuc ta sjal muc'tic poq'uetic;
li sc'u' spoq'ue puru ta lequil lino no sjalanoj.
23Li smalale lec ich'bil ta muc' te ta slumal,
xchi'uc te chchi'in ta chotlej li banquilaletic ta lume.
24Li antse lequil poq'uetic ta sjal xchi'uc chuquiletic;
ta xchonbe batel li jchonolajeletique.
25Ja' sc'u' c'otem li stsatsale xchi'uc ti lec sc'oplale;
me jutuc mu xlo'ilaj yo'nton ta sventa yoc'omal.
26Ta stunes lec sbijil c'alal chc'opoj;
ta slequil yo'nton ta xchanubtasvan.
27Tete xch'ulel xchi'uc me lec chbatic li boch'otic oy yu'une;
mu jechuc no'ox chlaj vaj yu'un.
28Jech ta xliquic li yalabtaque, chalic ti toj leque,
xchi'uc toj lec ch-ilat yu'un li smalale, jech chalic;
29“Oy ep antsetic ti lec yabtelique,
pero vo'ot no'ox atuc xjelov alequil ta scotol”, xutic.
30Li jlequil cutsiltique ja' no'ox chlo'lavan, li jt'ujumaltique mu'yuc stu;
yan me lec yich'oj ta muc' Muc'ul Dios li jun antse, lec ac'o albatuc sc'oplal.
31Albeic slequilal ta stojol li cristianoetique;
alic ti toj lec yabtele.
Currently Selected:
Proverbios 31: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.