Jeremías 50
50
Ta xich' jinesel li Babiloniae
1Li Muc'ul Diose ta sventa j'alc'op Jeremías laj yal c'usi chc'ot ta pasel ta stojol li Babiloniae,#Is 13.1—14.23; 47.1-15. ja' li yosilal caldeaetique. Jech laj yal:
2“Alic batel, aq'uic ta na'el ta yantic lumetic.
Aq'uic lec ta ilel senyail; mu me xamuquic, puquic batel.
Jech xavalic: ‘¡Li Babiloniae ch-och xa ta c'abal!
¡Li dios Bele tstsalat xa!
¡Li dios Merodaque mu'yuc c'usi stu chcom!
¡Li sloc'obal diosetic te va'ajtique
ta xa xich' voq'uel, ta xa xich' lilinel!’, chianic.
3Yu'un chtal contrainatuc yu'un jun banamil ta norte;
ja' chtal syavnaijesbeic li yosilalique.
Me junuc cristiano, me chonbolom mu'yuc chcom;
ta xjatovic batel scotolic”, xi li Muc'ul Diose.
Ta sut ta slumalic li israeletique
4Jech chal li Muc'ul Diose: “C'alal me la sta li sc'ac'alil li yorail le'e, ta sutic tal yan velta li smomnich'nab Israele; jmoj tsutic tal xchi'uc li smomnich'nab Judae. X'oc' x'avanic tal, chtal sa'icun; vu'un li Muc'ul Diosun yu'unique. 5Ta sjaq'uic tal bu sbelal li Sione. Ja' te ta xbatic, jech ta xalic: ‘La'ic, la jtsob jbatic ta stojol Muc'ul Dios ta sventa c'usi chapanbil ti mu xlaj sc'oplal sbatel osile, ti mu xch'ay ta co'ntontic oe’, xiic.
6“Li jteclumale ja' jechic jech chac c'u cha'al ch'ayemal chijetic ti mu'yuc lec chabibil,#Ez 34.5-6; Zac 10.2; Mt 9.36; Mr 6.34. ti ivovijesatic ta be yu'un li jchabichijetic yu'unique. Ich'ayatic comel ta vitsetic, jech te ixanovic batel ta vitsetic. Jech ich'ay o ta yo'ntonic bu icom li scoralique. 7Te la snupic ta be li yajcontraique, te imilatic. Li yajcontraique jech laj yalic: ‘Mu'yuc jmultic li vu'utique; ja' stuquic staoj smulic ta stojol li Muc'ul Dios ti ja' slequil ve'ubique, ti ja' stsatsal yo'ntonic li smoltot syame'ic ta vo'onee’, xiic.
8“¡Jatovanic loq'uel te ta Babilonia;#Is 48.20; Jer 51.6,45; Ap 18.4.
loc'anic batel ta yosilal li caldeaetique!
¡Ba'yucbeanic loq'uel ta anil jech chac c'u cha'al
ba'yuc be ta anil yu'un chijetic li tot tentsunetique!
9Yu'un ta xcac' stsob sbaic tal epal muc'tic lumetic ta norte,
ja' chtal scontrainic li Babiloniae.
Lec chapal ta xtalic, ta x'och ta sc'obic li Babiloniae.
Lec sna'ic yaq'uel flecha, me jutuc mu stselbuj yu'unic;
muc alticuc ch-ech' li flechaetic yu'unique.
10Ta xich'beic batel c'usitic oy yu'unic li caldeaetique;
mu xa c'u sna'ic sutel”, xi li Muc'ul Diose.
Ic'ot ta pasel ilaj li Babiloniae
11“Caldeaetic, vo'oxuc ti xatse'inic no'oxe,
ti xcuxet no'ox avo'ntonic laj avulesic li cu'untaque,
ti ja' jechoxuc jech chac c'u cha'al jcot tsebal vacax
ti xcuxet no'ox yo'nton ta slo' scotol li unin jobeltique,
xchi'uc ti ja' jechoxuc jech chac c'u cha'al ca'etic
ti sts'ijlajetic no'oxe.
12Li alumalic, li avosilalic ti bu lavoq'uique
toj abul sba, yalem ta q'uexlal chcom.
Ja' xa no'ox stuc ta scotol yantic lumetic
ti xch'ijan, ti taquin, ti yavnaijem chcom oe.
13Ta scoj sc'ac'al co'nton ti mu'yuc xa boch'o te chnaqui oe,
ti yavnaijem chcom o li Babiloniae.
Li boch'otic te chjelovique toj ch'ayel chc'ot yo'ntonic,
chlic slabanic ta scoj ti c'u x'elan tstoj smule.
14“¡J'ac'flechaetic, chapano lec abaic, bat setuic li Babiloniae!
¡T'ilesic batel scotol li aflechaique, mu me xacomtsanic,
yu'un staoj xa smulic ta jtojol, vu'un li Muc'ul Diosune!
15Avananic ta spat xocon li Babiloniae.
Ta xa xac' sba ta c'abal.
Ta xloman yalel li toyol q'uelub osiletic yu'une;
ta xvuc'an li coraltonetique.
Yu'un vu'un ta jpac sutel jtuc, vu'un li Muc'ul Diosune.
Ac'beic spacol li c'usi la spase;
ja' jech xapasbeic ec jech chac c'u cha'al la spas stuque.
16Mu me boch'o xacomtsanic ta Babilonia ti xu' to te tsts'unubaj,
xchi'uc ti xu' to te chtuch' trigoe.
C'alal chilic li muc'ta tsatsal pleitoe,
li yanlumetique ta jujuntal chlic suticuc ta slumalic;
ta jujuntal chlic jatovicuc batel ta yosilalic.#Is 13.14.
Isutic ta yosilalic li israeletique
17“Li israeletique ja' jech chac c'u cha'al ch'ayemal chijetic ti nutsbilic ta leonetique. Ba'yuc iti'atic yu'un li Asiriae, ja'o iti'atic yu'un li Nabucodonosor ajvalil ta Babiloniae; ja' la slajesbe c'alal ta sbaquilic. 18Vu'un li Muc'ul Diosun ti ta jpas ta mantal scotol te ta vinajele, vu'un li Diosun yu'un Israele, jech chcal: Ta xcac'be stoj smul li ajvalil ta Babiloniae xchi'uc li yosilale; ja' jech ta jpasbe jech chac c'u cha'al laj cac'be stoj smul li ajvalil ta Asiriae. 19Ta xquiq'uic sutel yan velta ta yosilalic li israeletique; te ta xvul xcux lec yo'ntonic. Ta xvul sa' lec sve'elic ta Carmelo, ta Basán, xchi'uc ta vitsetic yu'un Efraín xchi'uc ta Galaad, jech lec noj xch'utic o. 20Ta sc'ac'alil le'e ta to xich' t'unel me oy smul li Israele, pero mu'yuc xa chich' tael o. Ta xich' sa'el bu oy smul li Judae, pero mu xa xvinaj o. Yu'un ta jpasbeic perdón li boch'otic cuxul to chcomic cu'une”, xi li Muc'ul Diose.
Tsalbil chcom li Babiloniae
21“¡Bat tsaquic ta pleito li yosilal Merataime#50.21 Merataime - Ta hebreo c'op ja' smelol epal toybail, pero li bats'i sbie ja' Marratu.
xchi'uc li jnaclumetic ta Pecode!#50.21 Pecode - Ta hebreo c'op ja' smelol yavil tojob-mulil, pero li bats'i sbie ja' Pucudu.
¡Nutsic batel, bat milic, ulesic o ta j'ech'el!
Ja' jech xapasbeic jech chac c'u cha'al laj calboxuque”, xi li Muc'ul Diose.
22Tsots chvinaj yech'al muc'ta pleito ta banamil;
tsots xa liquem vocolajel.
23C'uxi laj yich' voq'uel,
c'uxi laj yich' lilinel li martillo#Jer 51.20-23. yu'un scotol banamile.
C'uxi ic'ataj ta xocol banamil yu'un
scotol yantic lum li Babiloniae.
24Babilonia, atuc laj ayac aba;
muc xava'ay te mit'il lac'ot.
Te chucul lacom o,
yu'un laj asa'be sc'ac'al yo'nton li Muc'ul Diose.
25Li Muc'ul Diose la sjambe snail li abtejebaletic yu'une,
jech la sloq'ues tal li abtejebaletic sventa sc'ac'al yo'ntone.
Yu'un li Muc'ul Dios ti tspas ta mantal scotol te ta vinajele
tsots yabtel tsc'an tspas te ta yosilal li caldeaetique.
26Vo'oxuc ti te oyoxuc ta jujujot sti'il banamile,
jambeic snail li c'usitic oy yu'unique;
c'atajesic ta sbusleb tonetic.
La' milic, ulesic o ta j'ech'el,
me jutuc mu c'usi xacomtsanic.
27¡Milic scotol li soldadoetic yu'unique,
aq'uic batel ta yav milubbailtic scotol!
Ay, toj abul sbaic,
yu'un ic'ot xa sc'ac'alil ti tstoj smulique”, xi li Muc'ul Diose.
28Li cristianoetic ti chjatovic loq'uel ta Babiloniae te chc'ot spuquic a'yej ta Sión c'u x'elan ch-ac'bat stojic yu'un Muc'ul Dios cu'untic li Babiloniae. Ja' spacol ch-ac'batic ti c'u x'elan la spasbeic li ch'ulna yu'une.
29“Iq'uic scotol li boch'otic lec sna'ic yaq'uel flechae;
ac'o tal yac'beic li Babiloniae.
Paso acarpanaic ta joyob;
mu me xcol avu'unic junuc.
Ja' jech xavac'beic stoj ti c'u x'elan yabtele;#Sal 28.4; 137.8; Ap 18.6.
ja' jech xapasbeic ti c'u x'elan la spas stuque,
yu'un la stoy sba ta jtojol, vu'un li Muc'ul Diosune,
vu'un li Ch'ul Diosun yu'un Israele.
30Ja' yu'un li queremetic yu'unique te busul chchamic ta xoraltic;
li soldadoetic yu'unique ta xchamic scotol c'alal me la sta sc'ac'alile”, xi li Muc'ul Diose.
31Li Muc'ul Dios ti tspas ta mantal scotol te ta vinajele jech chal:
“Jtoyba lum, a'yo ava'yic, vu'un chajcontrainot;
laj xa sta sc'ac'alil chacac'bot atoj amul.
32Jtoyba lum, ta xabosi avacan, te chayal ta lum;
mu'yuc boch'o chastotsot liquel.
Ta xcac'be sc'ac'al li lumetic avu'une;
ta jchic' scotol li boch'otic ats'aquinojan aba achi'uc ta joyobe”, xi li Muc'ul Diose.
33Li Muc'ul Dios ti tspas ta mantal scotol te ta vinajele jech chal: “Li smomnich'nab Israele xchi'uc smomnich'nab Judae co'ol uts'intabilic. Te chucbilic o yu'un li yajcontraique, mu xcoltaatic o. 34Pero vu'un li jpojvanejun yu'unique lec xu' cu'un; ja' Muc'ul Dios tspas ta mantal scotol te ta vinajel, xi jbi. Vu'un ta jchapan, vu'un ta jva'an jba ta scoltael. Vu'un chcac' ti ac'o junuc yo'nton scotolic te ta yosilalique; vu'un ta xcac'be svocol li jnaclumetic ta Babiloniae”, xi li Muc'ul Diose.
35Li Muc'ul Diose jech chal noxtoc:
“¡Ac'o milaticuc ta espada li jnaclumetic ta Babiloniae,
ja' li caldeaetique, li banquilaletique, xchi'uc li bijil viniquetic yu'une!
36¡Ac'o milaticuc ta espada li jt'unuletic yu'un ti toj bij scuyoj sbaique,
yu'un jech ac'o vinajuc ti ja' bol cristianoetique!
¡Ac'o milaticuc ta espada li boch'otic lec tsots yo'ntonic ta paspleitoe,
yu'un jech ac'o lajuc stsatsalic o!
37¡Ac'o milaticuc ta espada li soldadoetic yu'unique,
xchi'uc c'alal ta ca'etic, ta caretaetic yu'unic!
¡Ac'o milatuc ta espada scotol li yanlum soldadoetic te xchi'uquique,
ac'o pasicuc jech chac c'u cha'al ants!
¡Ac'o lajuc scotol li sc'ulejalique;
ac'o pojbaticuc batel!
38¡Ac'o uluc li uc'umetic yu'unique,
ac'o taquijuc o ta j'ech'el,
yu'un li yosilal Babiloniae epal diosetic te oy,
jech vovijem sjolic ta scoj li loc'ometic yu'unique!
39“Ja' yu'un li Babiloniae ja' xa yavil jti'val chonbolometic xchi'uc oq'uiletic#Ap 18.2. xchi'uc avestruz mutetic chc'ot. Mu'yuc xa chich' va'anel o yan velta; jayc'oluc cristianoetic chjelov, mu'yuc xa boch'o chjelov ta naclej te. 40Ja' jech ta xcom jech chac c'u cha'al Sodoma xchi'uc Gomorra xchi'uc li yantic lumetic te ta spat xocon#Gn 19.24-25. ti iyavnaijesatic yu'un Diose. Ja' jech mu'yuc xa boch'o te ta xnaqui o, me jutuc mu'yuc yajval chcom o”,#Is 13.20-22. xi li Muc'ul Diose.
41“A'yo ava'yic, ta xchapan sbaic tal ep soldadoetic,
ja' jun muc'ta lum ta namal banamil te ta norte;
toj ep svu'el, toj tsots xu' yu'un, xchi'uc ep ajvaliletic yu'un.
42Oy lec sflechaic xchi'uc slanzaic;
ven simaronic, me jutuc mu'yuc c'uxubinel ta yo'ntonic.
Ti c'alal ch-avanique, ja' jech chac c'u cha'al xbac' muc'ta nab.
Cajajtic ta ca' chtalic;
lec chapalic sventa chtal stsaquic ta pleito li Babiloniae.
43C'alal cha'ay a'yej li ajvalil ta Babiloniae,
aluben chcom ta xi'el;
toj tsots chat yo'nton, toj ep svocol
jech chac c'u cha'al jun ants ti yu'un xa chcuxe.#Jer 6.22-23.
44“Chital jech chac c'u cha'al jcot león chloc' tal ta toyolal te'tic ta uc'um Jordán, ti chbat yo' bu oy lec sve'el li chijetique. Ta xcac' jatovicuc loq'uel ta anil li babiloniaetique, xchi'uc ta xcac' pasaticuc ta mantal yu'un li boch'o t'ujbil cu'un ch-och ta ajvalilale. ¿Me oy boch'o xco'laj jech chac c'u cha'al li vu'une? ¿Me oy boch'o xu' chistsalun? ¿Me oy junuc jchabichij ti xu' yu'un chtal sva'lebinune? 45Vu'un li Muc'ul Diosune, a'yo ava'yic c'usi jchapanoj ta sventa li Babiloniae, xchi'uc c'usi jnopoj ta sventa li yosilal caldeaetique: C'alal ta bic'tal chijetic ta xich'ic jochel batel; ta xich' lilinbel comel li snaique. 46C'alal chjin li Babiloniae, ta xnic li banamile, yu'un xc'ululet ta jyalel. Li oq'uele xvinaj to batel ta yantic lumetic.#Jer 49.18-21.
Currently Selected:
Jeremías 50: TZE97
Highlight
Copy
Compare
Share
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
