Gálatas GÁLATAS
GÁLATAS
Li vun li'i ja' Gálatas. Yu'un li jch'unolajeletic laj yich'ic c'opanel batel ta cartae te oyic ta Galacia banamil; ja' yanlum jch'unolajeletic. Li cartae mu xal bu lumal tsc'opan batel; ja' no'ox chalbe sc'oplal jujutsob jch'unolajeletic ta Galacia banamil.
¿C'u x'elan ilic li jch'unolajeletic ta Galacia banamile? Jamal chal Pablo ti ja' la xcholbe ya'yic Lequil A'yej ta sliqueb ti c'alal ip cha'ye (4.13). Chvinaj ta Hch 16.6 ti ja'o yorail te c'ot xchol sc'op Dios ta xchibal velta iloc' ta xcholel sc'op Dios li Pabloe. Chvinaj noxtoc ti te ijelov yan velta ta yoxibal velta yabtele (Hch 18.23).
¿C'u yu'un laj yich' ts'ibael li cartae? Yu'un li jch'unolajeletique ilajic ta lo'lael yu'un judioetic ti tsots sc'oplal cha'yic circuncisione, xchi'uc ti oy ta yo'nton tscontrainic li Pabloe. Ja' c'ot socbeic sjol li jch'unolajeletique. Laj yalbeic ti persa chich'ic circuncisione, xchi'uc ti persa chch'unic li mantaletic ts'ibabil yu'un Moisese (4.21), xchi'uc ti persa chich'ic ta muc' li c'usitic c'ac'alil, li c'usitic ual chich'ic ta muc' judioetique.
Chvinaj noxtoc ti oy bu chopol laj yalbeic sc'oplal li Pabloe (1.10-12). Li jch'unolajeletique oy bu ic'ot ta yo'ntonic li c'usi icholbatique, tsc'an tstic' sbaic ta mozoil yan velta yu'un li mantaletique. Ja' yu'un li Pabloe tsvulesbe ta sjolic ti toj xcuxet no'ox yo'nton laj ya'yic c'alal lic xch'unic li Lequil A'yeje (4.13-15), yu'un laj ya'yic ti ja' no'ox chcolic ta sventa c'usi la spas li Jesucristoe, ti ma'uc ta sventa c'usi ta jpas jtuctique. Ja' yu'un li Pabloe sujbil laj ya'ay la sts'iba batel ta ora li carta li'i. Ma'uc no'ox tsc'an tspoj sba ti c'alal chopol ch-albat sc'oplale. Ja' tsots sc'oplal laj ya'ay ti mu me soquesic c'u x'elan ta ch'unel li Lequil A'yeje. Ja' yu'un jamal laj yal ti ma'uc ya'yej cristiano la xchole, ti ja' sc'op stuc li Diose (1.11—2.21).
Jech noxtoc jamal laj yalbe ti mu ja'uc ta sventa mantaletic lec chijyilutic li Diose. Ti ja'uque, ja' mu'yuc stu icham ta cruz Cristo ti jechuque (3.13,14; 2.20,21). Yu'un li Abrahame lec i'ilat yu'un Dios ta sventa xch'unojel yo'nton, ma'uc ta sventa mantaletic. Yu'un c'alal ta yorail cuxul li Abrahame sc'an to'ox chanib ciento xchi'uc lajuneb xcha'vinic (430) jabil sc'an xtal li mantaletique. Laj yalbe ti vu'utic mero smomnich'nabutic Abraham ta sventa xch'unojel co'ntontique, yu'un laj xa scoltautic li Cristoe. Ja' yu'un laj yalbe ti junuc me yo'ntonic, ti mu me sjelilan li c'usi chch'unique, mu me stic' sbaic ta mozoil yan velta (5.1).
¿Boch'o la sts'iba li vun li'i? Lec chvinaj ti ja' la sts'iba li Pabloe (1.1).
¿C'usi ora laj yich' ts'ibael? Li c'usi ora laj yich' ts'ibaele mu stac' lec na'el. Oy bu chalic ti laj yich' ts'ibael ta (55-57 d.C.) jabil svoq'uel ta banamil li Jesucristoe, ja'o ti c'alal laj ya'ay Pablo ti tsc'an xa'ox tscomtsanic xch'unel Lequil A'yej li jch'unolajeletique.
Li vun li'i voc'bil ta vo'voc':
I.
Ta cap. 1.1-9: Sliqueb
II.
Ta cap. 1.10—2.1-21: Sc'oplal bu la sta li Lequil A'yej la xchol Pabloe
III.
Ta cap. 3—5.1-12: Ta sventa xch'unojel co'ntontic colem lijc'ot.
IV.
Ta cap. 5.13—6.1-10: Sc'an ta jna'tic lec stunesel ti coltael la jtatique.
V.
Ta cap. 6.11-18: Slajeb c'op
Currently Selected:
Gálatas GÁLATAS: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.