Ezequiel 6
6
Sc'oplal c'usi chc'ot ta pasel ta stojol li vitsetic te ta Israele
1La sc'opanun yan velta li Muc'ul Diose jech laj yalbun: 2“Xnich'on cristiano, q'uelo batel li vitsetic ta Israele; alo c'usi chc'ot ta pasel ta stojolic. 3Jech xavalbe: ‘Vitsetic ta Israel, a'yic c'usi chal li Muc'ul Diose, ja' li Ajvalil cu'untique. Jech chalbe li muc'tic vitse, li bic'tal vitse, xchi'uc li bevo'etic ta soplejaltique: A'yo ava'ay, vu'un ta jtac tal pleito ta atojol; ta jines scotol li toyol c'opojebaletic te ta atojole. 4Ta jlilin scotol li scajleb matanaletic avu'une xchi'uc ti bu chich' chiq'uel pome. Li avinictaque ta xcac' chamicuc te ta stojol li sloc'obal diosetic avu'une. 5Li sbec'tal boch'otic ta xchamique ta xcac' ti te no'ox telajtic chcomic ta stojol li sloc'obal adiosique. Li sbaquilique te no'ox tanpuc chbat cu'un ta spat xocon li scajleb matanaletic avu'unique. 6Buyuc no'ox chanaquiic batel, ta xich' jinesel li lumetic avu'unique; xchi'uc li scajleb matanaletic avu'unique. J'ech'el chyavnaij o; xocol banamil chcom o li yavil scajleb matanal avu'unique. Li sloc'obal diosetic avu'unique ta xich' lilinel, ta xich' ulesel. Li scajleb xchic'ubiltac pom avu'unique ta xich' vuq'uesel. Scotol li c'usitic pasbil ta ac'obique ta xch'ay scotol.#Lv 26.30-31. 7C'alal chavilic ep chchamic te ta atojolique, jech chlic ana'ic ti vu'un Muc'ul Diosune. 8Pero ta to jcomtsan jayibuc, ta to xcolic ta milel, jech ta spuc sbaic batel ta yantic banamil. 9Li boch'otic cuxul chcomique te chlic sna'icun ta yantic banamil ti bu chucbilic batele. Te chlic sna'ic ti vu'un laj cac'be svocolic ta scoj ti imulivajic ta jtojol ta sventa ti laj yich'ic ta muc' yan diosetique. Te chlic q'uexovicuc stuquic ta scoj li xchopol talelic la spasic ta jtojole. 10Jech chlic sna'ic ti vu'un Muc'ul Diosune, xchi'uc ti muc alticuc laj cal ti chcac'be tsots svocolique, xi li Diose’, uto”, xiyutun.
11Jech laj yalbun noxtoc li Muc'ul Diose: “T'axo ta majel ac'ob, lico batel ta teq'uel, jech xaval: ¡Ay! Toj abul sbaic ta scoj ti toj chopol c'usi tspasic li israeletique, yu'un milbil chchamic ta espada, ta vi'nal, xchi'uc ta tsatsal chamel. 12Li boch'o nom oyique chchamic ta tsatsal chamel; li boch'o nopol oyique chchamic ta espada; li boch'o cuxul to chcomique chchamic ta vi'nal. Ja' jech ta jloq'ues li sc'ac'al co'nton ta stojolique. 13C'alal chavilic ep animaetic te ta stojol sloc'obaltac adiosique, xchi'uc te ta spat xocon scajleb matanaletic ta bic'tal vitsetic, ta yolon te'etic, xchi'uc ti butic laj achiq'uic pom ta stojol li sloc'obal adiosique, ja' to te chlic ana'ic o ti vu'un Muc'ul Diosun ta melele. 14Ta jye' batel jc'ob ta stojolic, buyuc no'ox nacajtic batel, ta jc'atajesbe ta xocol banamil li yosilalique. Co'ol ta jcomtsan jech chac c'u cha'al li xocol banamil ta Diblat ti j'ech'el yavnaijem oe, yu'un jech tsna'ic o ti vu'un Muc'ul Diosun jtuque”, xi.
Currently Selected:
Ezequiel 6: TZE97
Highlight
Copy
Compare
Share
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
