Ezequiel 12
12
Li Ezequiele la spasbe senyail ti chich'ic chuquel batel ta yan banamile
1La sc'opanun yan velta li Muc'ul Diose, jech laj yalbun: 2“Xnich'on cristiano, vo'ote te nacalot ta stojol li jtoyba cristianoetique. Oy satic pero mu xilic, oy xchiquinic pero mu xa'ibeic smelol,#Is 6.9-10; Jer 5.21; Mr 8.18. yu'un ja' bats'i jtoyba cristianoetic. 3Ja' yu'un li vo'ote chapano c'usi chtun avu'un; loc'an batel ta ana jech chac c'u cha'al li boch'o chucbil chbat ta yan banamile. Ta c'ac'altic xapas, ta sat scotol achi'iltac xaloc' batel. Oy yic'al ja' to jech chc'ot ta yo'ntonic, yu'un solel jtoybaetic ta jyalel. 4Ta c'ac'altic xaloq'ues li c'usi oy avu'une; ta satilal xapas jech chac c'u c'u cha'al chucbil xa chabat yilel. Ta mal c'ac'al xaloc' batel; ta sat scotolic xavich' batel c'usitic oy avu'un, jech chac c'u cha'al li boch'o chucbil xa batele. 5Ta satilal xavom li coraltone, yu'un ja' te chajelov batel. 6C'alal ch-ic'ub osile, ta sat scotolic xacajan loq'uel ta anecub li c'usi chtun avu'une; maco asat ti c'u cha'al mu xaq'uel li avosilale. Ja' senyail ti jech ta xc'ot ta pasel ta stojol li achi'iltaque”, xiyutun.
7Jech lic jchapan jba jech chac c'u cha'al laj yalbun li Diose. Ta c'ac'altic la jchapan c'usi oy cu'un jech chac c'u cha'al chchapan c'usi chtun yu'un li boch'o chucbil chbat ta yan banamile. Ta mal c'ac'al la jvom ta jc'ob li coralton sventa te chiloc' batele. Ta ac'ubaltic liloc' batel ta satilal; la jcajan batel ta jnecub li c'usitic chtun cu'une.
8Ta sob yoc'omal la sc'opanun li Muc'ul Diose, jech laj yalbun: 9“Xnich'on cristiano, me jech chasjac'bot li jbajmantal israeletique: ‘¿C'usi chapas le'e?’, me xayutote, 10Jech xatac'be: ‘Jech chal li Muc'ul Diose, ja' li Cajvaltique: Le'e ja' smelol c'usi chc'ot ta pasel ta stojol li ajvalil ta Jerusalene xchi'uc scotol li jnaclumetique. 11Li c'usi ta jpase ja' senyail li c'usi chc'ot ta pasele. Ja' jech chc'ot ta pasel ta atojolic li vo'oxuque, yu'un tsta yorail chaloq'uic batel; chucbil chabatic ta yan banamil. 12Li banquilal avu'unique ta persa ta scajan loq'uel ta snecub li c'usi chich' batele. Ta ac'ubaltic ta xloc' batel; ta svom loq'uel sbe ta coralton; ta smac loq'uel sat yu'un jech mu x'ilat, xchi'uc jech mu sq'uel comel li yosilale. 13Pero vu'un ta jyac ta ch'ojon, jech te mit'il chc'ot ta jyoc. Ta xcac' ic'atuc batel ta Babilonia ta yosilal li caldeetique, pero mu'yuc bu ta sq'uel ta sat,#2 R 25.7; Jer 52.4-11; Ez 17.18-20. yu'un te ta xc'ot chamuc. 14Scotol li boch'otic te xchi'inojic ti chcoltavanique xchi'uc scotol li yajsoldadotaque ta jpuquic batel ta xchanjotal xchiquin banamil, ta jloq'ues batel quespada ta spatic. 15C'alal ta xlic jpuquic batel ta yantic lum, ta yantic banamile, jech chlic sna'ic ti vu'un Muc'ul Diosune. 16Jutuc xa no'ox ta xcac' colicuc ta milel ta espada, ta vi'nal, xchi'uc ta tsatsal chamel; yu'un jech ac'o c'ot yilic te ta yantic lum ti toj chopol c'usi la spasique. Jech chlic sna'ic ti vu'un Muc'ul Diosune, xi li Diose’, uto”, xiyutun.
Laj yich' alel yan velta ti chtal tsots vocole
17La sc'opanun yan velta li Muc'ul Diose, jech laj yalbun: 18“Xnich'on cristiano, nican ta xi'el ti c'alal chave'e; ato avo'nton yilel ti c'alal chavuch' vo'e. 19Jech xavalbe li jnaclumetic ta banamile: ‘Li Muc'ul Diose jech chal ta sventa li jnaclumetic li' ta Jerusalene xchi'uc ta scotol li yosilal Israele: Ta xi'el xa chlic ve'icuc; ta at-o'nton chlic yuch'ic vo', yu'un li yosilalique ta xich' pojel scotol ta scoj simaronil li jnaclumetique. 20Li lumetic ti oy lec yajvale xch'ijan chcom; li banamile yavnaijem chcom o, yu'un jech chlic sna'ic ti vu'un Muc'ul Diosune, xi li Diose’, uto”, xiyutun.
21La sc'opanun yan velta li Muc'ul Diose, jech laj yalbun: 22“Xnich'on cristiano, ¿c'usi smelol yu'unic li slo'ilic achi'iltac ti jech chalique: ‘Inatub xa sc'ac'alil; li c'usi chich' alel ti chc'ot ta pasele chch'ay no'ox batel’,#2 P 3.4. ti xiique? 23Jech xavalbe ya'yic: ‘Jech chal li Cajvaltique, ja' li Muc'ul Diose: Li c'usi chalic le'e ta xcac' ch'ayuc o ta alel te ta stojol li israeletique’, xi. Jech chal noxtoc: ‘Po'ot xa tsta sc'ac'alil, ta xa xc'ot ta pasel scotol li c'usitic laj yich' aq'uel ta ilele. 24Chlaj sc'oplal ti oy boch'o ch-epalc'opoj ti chal oy c'usi i'ac'bat yil ti mu meleluque. Chlaj sc'oplal ti oy boch'o chlo'lavan te ta stojol li israeletique. 25Yu'un vu'un chic'opoj jtuc, vu'un li Muc'ul Diosune, jech persa chc'ot ta pasel li c'usi chcale; mu xa epuc c'ac'al chjalij. Vo'oxuc li jtoyba israeloxuc ti cuxuloxuc li' ta orae, ta xavil ta asat atuquic ti chc'ot ta pasel li c'usitic laj cale, xi li Diose’, uto”, xiyutun.
26La sc'opanun yan velta noxtoc li Diose, jech laj yalbun: 27“Li achi'iltaque jech chalic ta atojol: ‘Li c'usi i'ac'bat yil ta xch'ulel li vinic le'e ma'uc sventa chc'ot ta pasel ta ora; li c'usi chal li vinic le'e ja' sventa ep jabil chbat’, xiic. 28Ja' yu'un jech xavalbe ya'yic: ‘Jech chal li Cajvaltique, ja' li Muc'ul Diose: Mu xa epuc c'ac'al sc'an xc'ot ta pasel li c'usi laj cale. Scotol li c'usi iloc' ta quee persa chc'ot ta pasel scotol, xi’, uto”, xiyutun li Diose.
Currently Selected:
Ezequiel 12: TZE97
Highlight
Copy
Compare
Share
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
