Eclesiastés 3
3
Scotol oy yorail
1Scotol oy sc'ac'alil; ja' yu'un scotol li c'usi tsc'an co'nton ta jpastic li' ta banamile oy yorail.
2Oy yorail chijvoc'; oy yorail chijcham.
Oy yorail ts'unubajel; oy yorail sbulel.
3Oy yorail milbail; oy yorail poxtael.
Oy yorail svuq'uesel; oy yorail sva'anel.
4Oy yorail oq'uel; oy yorail tse'ej.
Oy yorail me'nal; oy yorail ac'ot.
5Oy yorail sjinesel tonetic; oy yorail stsobel.
Oy yorail ta jmey jbatic; oy yorail mu jmey jbatic.
6Oy yorail ta jt'untic; oy yorail ta jch'aytic.
Oy yorail ta jq'uejtic; oy yorail ta jiptic.
7Oy yorail ta jch'i'tic; oy yorail ta jts'istic.
Oy yorail ch'anxijchi; oy yorail chijc'opoj.
8Oy yorail ta jc'an jbatic; oy yorail ta jbaj jbatic.
Oy yorail oy c'op; oy yorail mu'yuc c'op.
9¿C'usi chloc' yu'un li jun vinic ti smiloj sba ta abtele? 10Scotol li abtel yac'oj Dios ta sventa cristianoetique, quiloj xa ti ja' no'ox ac'bilic ta sventa oy svocolic o. 11Toj lec c'upil sba la spas scotol li Diose; lec oy yorail laj yac'be. Jech noxtoc laj yac'be ta yo'nton cristianoetic ti mu'yuc spajeb c'usitic tspas li Diose, ac'o me mu xlaj yotquinic scotol li c'usi spasoj Dios ta sliqueb xchi'uc c'alal to ta slajebe.#Sal 139.17; Is 55.8-9; Ro 11.33.
12Laj xa quil ti jchop no'ox c'usi lec ta sventa li cristianoetique, ja' ti ac'o cuxetuc no'ox yo'ntonic, ti ac'o sc'upinic c'usi lec ti jayib c'ac'al cuxulique. 13Ja' no'ox yac'ojbutic Dios ti ac'o ve'cutic, ac'o cuch'tic vo', ti ac'o jc'upintic c'u x'elan slequil yutsil li cabteltique. 14Scotol li yabtel spasoj Diose lec ts'acal la spas; mu stac' jelel o.#Sal 33.11. Mu'yuc boch'o tsmuq'uibtas; mu'yuc boch'o tsbic'tajes. 15Li c'usi chvinaj li' ta orae te ono'ox oy ta vo'one; li c'usi chvinaj le' to batele li' oy o ta ora. Jech pasbil yu'un Dios ti ja' no'ox te xvalc'uj sutbij oe.
Li' ta banamile mu'yuc ono'ox c'usi tuc' chich' pasel o
16Li' ta banamile oy xa ep c'usi laj cotquin. Ti bu sc'oplal lec chich' chapanele, soquem o ta j'ech'el; ti bu sc'oplal tuc' chich' pasele, bats'i chopol chich' pasel o. 17Jech laj cal ta co'nton: “Ac'o xchapan Dios li boch'o tuq'ue xchi'uc li boch'o chopole, yu'un oy yorail yu'un ta sventa scotol li c'usitic oye, xchi'uc li c'usi chich' pasele”, xichi.
18Jech la jnop noxtoc: “Li Diose chac'be yil c'u x'elan stalelic li cristianoetique, yu'un jech ac'o sna'ic ti co'ol chc'ot ta pasel ta stojolic jech chac c'u cha'al li chonbolometique. 19Yu'un li c'usitic chc'ot ta pasel ta stojol li cristianoetique ja' jech ta xc'ot ta pasel ta stojolic ec li chonbolometique. Xcham li chonbolometique; xcham ec li cristianoetique, yu'un co'ol no'ox ta ic' cuxulic.#Sal 49.12,20. Muc ja'uc xa yan o c'u x'elan cuxul li cristianoe, co'ol no'ox. Ja' yu'un altic no'ox scotol; mu'yuc c'usi stu o. 20Jun no'ox yavilic ti bu chbat scotolique, yu'un co'ol pasbilic ta lum, jech scotolic chc'atajic ta lum yan velta.#Gn 3.19; Job 34.15. 21¿Boch'o xu' tsna' ti ja' chmuy ta vinajel xch'ulel li cristianoe, ti ja' chcom ta yut banamil xch'ulel li chonbolometique?#Ec 12.7. 22Ta melel laj xa cotquin lec ti oy no'ox jun c'usi lec ta sventa li cristianoe, ja' ti ac'o no'ox sc'upin lec ya'ay li yabtele; ja' no'ox jech ac'bil o. Yu'un mu'yuc boch'o xu' chbat yic' tal yan velta yu'un ac'o tal sq'uel c'usi chc'ot ta pasel ti c'alal chamen xa'oxe”, xi la jnop.
Currently Selected:
Eclesiastés 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.