2 Macabeos 1
1
Sba vun laj yich'ic judioetic ti te nacalic ta Egiptoe
1“Cuts' calal judioetic, vo'oxuc ti te nacaloxuc ta Egiptoe, chabanucoxuc chacalboticotic tal, vu'uncutic ti li' nacaluncutic ta Jerusalén xchi'uc ta scotol yosilal Judeae. Cuxetuc no'ox avo'ntonic acotolic. 2Ac'o yac'boxuc c'usi chtun avu'unic li Diose. Ac'o sna' li c'usi xchapanoj comel xchi'uc li Abraham, Isaac, xchi'uc Jacobe, ja' li lequil jtuneletic yu'une. 3Ac'o yac' tsots sc'oplal ta avo'ntonic ti chavich'ic ta muq'ue, ti c'otuc ta pasel avu'unic ta scotol avo'ntonic li c'usi ta sc'ane. 4Xchi'uc ac'o sjamboxuc lec avo'ntonic ta xch'unel li mantaletic yu'une, xchi'uc ac'o yac'boxuc jun avo'ntonic. 5Xchi'uc ac'o ya'iboxuc li ac'opojelique, ti co'oluc avo'nton achi'uquique ti mu me xascomtsanoxuc c'alal yorail oy avocolique. 6Ja' jech li c'usi ta jc'anbecutic Dios ta atojolique:
7“C'alal ja' ochem ta ajvalilal li Demetrio ta yabilal baluneb sbalunvinic (169), vu'uncutic li judiouncutique jech la jts'ibaboxuc tal: ‘C'alal ja'o toj tsots jvocoltic ta uts'intael ta jabil le'e c'alal ilic Jasón xchi'uc li xchi'iltac ti laj yaq'uic ta c'abal li ch'ul banamil xchi'uc bu c'alal sventainoj li ajvalil cu'untique, 8ja' laj yac'beic sc'ac'al li muc'ta ochebal sventa ch'ulnae, xchi'uc la smilic li boch'otic mu'yuc smulique. La jc'anbecutic vocol li Cajvaltique jech laj ya'ibuncutic li jc'opcutique. Laj cac'becutic milbil matanal xchi'uc trigo, la jtsancutic candil, te laj cac'cutic ta mexa ta stojol li ch'ul pane’, xi chal li vune. 9Jech yu'un li' ta orae la jts'ibaboxuc tal vun yan velta ta atojolic, yu'un chcalcutic ava'yic ti ac'o apasic jun q'uin ta sventa yaxnaetic ta yual Quisleu,#1.9 Quisleu - Q'uelo Yotol Israeletic. ta yabilal vaxquib slajunvinic (188).”
Xchibal vun laj yich'ic li judioetic te ta Egiptoe
10“Vu'uncutic li jnaclumuncutic li' ta Jerusalén xchi'uc ta Judae, li banquilaletic xchi'uc li Judase chacalbecutic tal chabanel jchi'uc li Aristobuloe, ja' li xchi'il ta abtel muc'ta ajvalil Tolomeoe, ja' jun sts'unubalic xchi'uc li paleetic ti t'ujbilique. Jech chabanucoxuc chacalbotcutic tal ec, vo'oxuc li judiooxuc te nacaloxuc ta Egiptoe; cuxetuc me avo'ntonic ta acotolic. 11Coltabilutic yu'un Dios ta sventa li tsots vocoliletic ti toj xi'bal sbae, ja' yu'un ta jtojbetic ta vocol ta scotol co'ntontic ta sventa ti la scoltautic ta stsalel li cajcontratique, ja' li muc'ta ajvalile.
12“Yu'un ja' la snuts loq'uel li boch'otic la scontrainic li ch'ul lume. 13Jech yu'un c'alal ibat ta Persia banamil yajsoldadotac li muc'ta ajvalil ti mu xa staq'uic tsalel yilele, pero te iyich'ic milel ta sna li me' dios Naneae ta scoj ti ilo'laatic li paleetic yu'un li me' diose. 14Ja' te ic'ot li muc'ta ajvalil Antiocoe, chi'inbil batel yu'un ep xchi'iltac, yu'un tsc'an ta xnupin xchi'uc me' dios. Pero ja' no'ox tsc'an ta xu'uninic li matanal sventa nupinel xchi'uc li epal c'ulejalil ta sna li Naneae. 15Li paleetic yu'un Naneae laj yaq'uic ta q'uelel li c'ulejalile. Li muc'ta ajvalil Antiocoe te i'och xchi'uc jayibuc no'ox viniquetic ta yut li nae. C'alal te xa'ox oy ta yute, li paleetique la smaquic li ti'nae. 16Nacastal lic sjamic li jolnae, jech la smilic ta ton li muc'ta ajvalile xchi'uc li xchi'iltaque. Ta ts'acal la sc'ocbeic sjol xchi'uc yoc sc'ob. La sjipbeic loq'uel li boch'otic te comenic ta amaq'ue. 17¡Ich'biluc ta muc' sbatel osil li Dios cu'untique, yu'un laj yich'ic milel li boch'otic ven chopol c'usitic tspasique!
18“Ta sventa ti ta xa jpastic li q'uin sventa chich' lecubtasel li ch'ulna ta sc'ac'alil vo'ob xcha'vinic (25) yual Quisleue,#1.18 Quisleue - Q'uelo Yotol Israeletic. ja' yu'un la jchapancutic ta xcalbotcutic tal ti ja' lec chapasic li sq'uin Yaxnaetique xchi'uc sq'uin li c'oc' ti ivinaj c'alal laj yac' chic'bil matanal li Nehemiase, ja' li boch'o la spas li ch'ulnae xchi'uc li scajleb smoton Diose. 19Jech c'alal chucbilic batel ta Persia banamil li jmoltot jyame'tic ta vo'onee, li paleetic ti lec xch'unojique la stsaquic li ch'ul c'oc' te ta scajleb matanale. Te la snaq'uic ta jun ch'en ti bu mu'yuc ya'lele, te la snaq'uic lec comel; mu'yuc boch'o laj yil. 20Jeloven xa'ox ep jabil, li Nehemiase itacat batel ta Judá yu'un li muc'ta ajvalil ta Persiae yu'un jech la sc'an li Diose, xchi'uc la stac batel li smomnich'nabtac paleetic ti snac'ojic li ch'ul c'oq'ue. Laj yalic ti mu'yuc la staic li c'oq'ue; ja' no'ox la staic c'u cha'al aceite ti toj tote. Li Nehemiase laj yal ti ac'o sloq'uesique, ti ac'o yich'ic tale.#Neh 1.7-8. 21C'alal lec xa chapanbil scotol li milbil matanal te ta scajlebe, li Nehemiase la spas ta mantal paleetic ti ac'o smalic ta sba yac'ol si', xchi'uc c'usitic yan li aceite ti toj tote. 22Jech la spasic. C'alal la spas muc'ta jale, ijam li c'ac'ale yu'un macal ta toc; lic tsanuc muc'ta c'oc', jech toj ch'ayel ic'ot yo'nton scotolic. 23C'alal sbats'il ta c'aq'uel li matanale, li paleetic xchi'uc scotol boch'otic te oyique lic sc'opanic Dios: Ja' la sliques sc'opanel Dios li Jonatane, li yantic xchi'uc li Nehemiase, ja' xa no'ox la staq'uic. 24Ja' jech lic sc'opanic Dios: ‘Cajval, Cajval Dios. Vo'ot laj apas scotol li c'usitic oye, toj tsotsot, toj ech'em axi'elal; tuc' c'usi chapas, lec chac'uxubinvan, vo'ot no'ox atuc muc'ta Ajvalilot, lec scotol c'usi chapasbuncutic. 25Vo'ot no'ox atuc toj lecot, vo'ot no'ox lec tuc' c'usi chapas, xu' avu'un, xchi'uc cuxulot o ta sbatel osil. Vo'ot chacolta ta scotol svocolic li israeletique, vo'ot laj at'uj, xchi'uc laj ats'u'iltas#Cf. Gn 12.1-3; 22.15-18; Dt 14.2. li jmoltot jyame'cutic ta vo'onee. 26Ich'o li milbil matanal li' chacac'botcutic ta sventa scotol li Israele, yu'un ja' yajvaltac ateclumal. Chabio me, ts'u'iltaso me atuc.#Cf. Lv 20.26; Dt 32.9; 2 Mac 14.15. 27Tsobo tal li jchi'iltacutic ti bu pucbilic batele.#Cf. Dt 30.4; Neh 1.9. Ac'bo scolelic li boch'otic oyic ta mozoil te ta slumal li yanlumetique. Q'uelo me li boch'otic bajbilique xchi'uc ti mu'yuc stu ch-ilatique, yu'un jech ac'o yotquinic yanlumetic ti vo'ot no'ox atuc Diosot cu'uncutique. 28Ac'bo stoj smulic li jtoybaetic ti chiyuts'intauncutic, ti chchopolc'optauncutique. 29Ja' te xavac' li ateclumal ta ch'ul banamil avu'une jech chac c'u cha'al yaloj comel li Moisese’,#Cf. Ex 15.17; Dt 30.4-5. xiic ta sc'opanel Dios.
30“Ja'o lic q'uejinicuc ec li paleetique. 31C'alal ic'ac' li milbil matanale, li Nehemiase la spas mantal ti ac'o smalic ta sba yac'ol jaybejuc muc'ta tonetic li scomelal aceite ti toj tote. 32C'alal jech la spasique, te itsan jun muc'ta c'oc' ti ja' la smacbe xojobal li c'oc' te xojoban ta scajleb matanale.
33“Li c'usi ic'ot ta pasele ipuc batel sc'oplal. Laj yalbeic ajvalil ti sts'ants'un xa c'usi te la staic ti bu la snaq'uic c'oc' li paleetic, ja' li boch'otic chucbilic batele, xchi'uc ja' la stunesic xchi'uc xchi'iltac sventa la sts'u'iltasic o li milbil matanale. 34C'alal laj xa sna' lec ajvalil ti ja' melele, lic yac' ta pasel coralton, la setic lec ta coralton li banamile, ja' ch'ul banamil icom yu'unic. 35Li muc'ta ajvalile xchi'uc li boch'otic ich'bilic ta muc' yu'une laj yac'be sbaic lequil matanaletic. 36Li Nehemías xchi'uc xchi'iltaque neftar laj yac'beic sbiin li aceitee, ja' smelol lecubtasbil. Pero ja' epic ta xalic ti ja' sbi naftae”, xi li vune.
Currently Selected:
2 Macabeos 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.