2 Tesalonicenses 2
2
Ta to xlic jun vinic ti ja' yabtel o tscontrain Diose
1-2Quermanotac, ta jc'anboxuc vocol ta atojolic ti mu me ta aniluc xajel c'usi chach'unic ta sventa ti c'usi ora chtal yic'utic li Cajvaltic Jesucristo sventa chbat jchi'intic oe.#1 Ts 4.15-17. Mu me xavac' abaic ta lo'lael, ac'o me oy boch'o chc'ot yalboxuc ti jech i'ac'bat sna'ic yu'un Diose, o me chayac'boxuc aq'uelic carta ti chalic vu'uncutic la jpascutique, o me ta yeic chayalboxuc ti ital xa li Cajvaltique, mu me xch'ay avo'ntonic yu'un. 3Me jutuc mu me boch'o xlaj ta lo'lael avu'unic. Yu'un ba'yuc tsta yorail oy boch'o chchibaj yo'ntonic, xchi'uc ta xlic jun ven chopol vinic ti ja' sve'el ch'ayele. 4Li vinic chcale ta stoy sba, chlic scontrain li Diose xchi'uc scotol li c'usitic yich'ojic ta muc' cristianoetique.#Dn 11.36; Ez 28.2. Ta scuy sba ta Dios stuc. Ta x'och chotluc ta yut ch'ulna yu'un Dios; chal ti ja' Dios stuque.
5Na'ic me ti jech ono'ox laj calboxuc c'alal te to'ox jchi'ucoxuque. 6Li vo'oxuque xana'ic xa boch'o spajesoj ti jech mu to xlic ta orae. Me la sta sc'ac'alile, ja' to ta xlic vinajuc. 7Yu'un li' xa tspas yabtel ta mucul li chopol vinique. Ja' no'ox me iloq'uesat batel li boch'o spajesoj toe, 8ja'o chlic vinajuc li chopol vinique. Pero c'alal chtal li Cajvaltique, ta yic'al ye no'ox ta smil,#Is 11.4. ta xojobal no'ox ta xlaj. 9Li ven chopol vinic ta xtale ventainbil yu'un scotol svu'el li banquilal pucuje. Jech puru tsotsic c'usi tspas. Ta spas ep sq'uelubiltac stsatsal,#Mt 24.24. pero ja' no'ox sventa chlo'lavan. 10Ta sventa ti ep ta chop chopol lo'lavanej ta spase, jech ta xlajic o ta lo'lael li boch'otic ch'ayel ta xbatique. Yu'un la sbajic li c'usi melele, ti ja' sventa xu' chcolic oe. 11Ja' yu'un li Diose ta xac' tal tsots lo'lael ta stojolic, yu'un jech ac'o xch'unic li lo'laele. 12Jech chich'ic chapanbel o smulic scotol li boch'otic muc xch'unic li c'usi melele, yu'un ja' lec laj ya'yic spasel li c'usitic chopole.
T'ujbilic yu'un Dios scotol li boch'otic chcolic sbatel osile
13Pero ta sventa li vo'oxuc ti ach'unojic xae, ti c'anbiloxuc yu'un Cajvaltique, scotol c'ac'al tsc'an ta jtojbecutic ta vocol Dios ta aventaic. Yu'un t'ujbiloxuc ono'ox ta sliquebal, yu'un ac'o colanic sbatel osil ta sventa ti lecubtasbiloxuc xa yu'un li Ch'ul Espiritue, xchi'uc ta sventa ti laj ach'unic li c'usi melele. 14Ja' yu'un laj yic'oxuc Dios ti c'alal la jcholcutic ava'yic li Lequil A'yeje, yu'un ac'o atabeic slequilal yutsilal li Cajvaltic Jesucristoe.
15Ja' yu'un quermanotac, staojuc me yav o avo'ntonic ta stojol li Cajvaltique. Ja' me ch'unic o ti c'u x'elan la jchanubtasotcutic ta quecutic, o me ta jcartacutique.#1 Co 11.2. 16-17Ac'o stsatsubtasboxuc avo'ntonic, ac'o scoltaoxuc stuc li Cajvaltic Jesucristoe xchi'uc li Dios cu'untique. Ja' li Jtotic ti ep la sc'anutique, ti laj yac'butic spatubil co'ntontic sventa sbatel osile, xchi'uc ti ta sventa slequil yo'nton laj yac' ti jech jun co'ntontic ta jmalatic li c'usi yalojbutique, yu'un jech j'ech'el jun avo'nton ja' chapasic o, ja' chavalic o li c'usitic leque.
Currently Selected:
2 Tesalonicenses 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.