2 Reyes 2
2
Imuy ta vinajel li Eliase
1C'alal la sta yorail yu'un Muc'ul Dios chic' muyel ta vinajel ta sutub ic' li Eliase, li Elías xchi'uc Eliseoe iloq'uic batel ta Gilgal. 2Li Eliase jech laj yalbe li Eliseoe:
—Coman to li'i, yu'un li Muc'ul Diose chistacun batel ta Betel —xut.
Itac'ov li Eliseoe:
—Chacalbot ta jamal ta stojol Muc'ul Dios xchi'uc ta atojol ec ti mu'yuc ta jvoc' jba ti bu chabate —xi.
Jech te ibat xchibalic ta Betel. 3Li j'alc'opetic te nacalic ta Betele ital snupic ta be li Eliseoe jech laj yalbeic:
—¿Me xana' ti ta x'ic'at batel yu'un Muc'ul Dios tana li jchanubtasvanej avu'une? —xutic.
—Jna'oj xa, pero mu me c'usi xavalic li vo'oxuque —xi li Eliseoe.
4Li Eliase jech laj yalbe noxtoc li Eliseoe:
—Coman to li'i, yu'un li Muc'ul Diose chistacun batel ta Jericó —xut.
Itac'ov li Eliseoe:
—Chacalbot ta jamal ta stojol Muc'ul Dios xchi'uc ta atojol ec ti mu'yuc ta jvoc' jba ti bu chabate —xut.
Jech te ibat xchibalic ta Jericó. 5Li j'alc'opetic te nacalic ta Jericoe ital snupic ta be li Eliseoe jech laj yalbeic:
—¿Me xana' ti ta x'ic'at batel yu'un Muc'ul Dios tana li jchanubtasvanej avu'une? —xutic.
—Jna'oj xa, pero mu me c'usi xavalic li vo'oxuque —xut.
6Li Eliase jech laj yal noxtoc:
—Coman to li'i, yu'un li Muc'ul Diose chistacun batel ta Jordán —xut.
Itac'ov li Eliseoe:
—Chacalbot ta jamal ta stojol Muc'ul Dios xchi'uc ta atojol ec ti mu'yuc ta jvoc' jba ti bu chabate —xut.
Jech te ibat xchibalic. 7Te ic'otic lajuneb yoxvinic (50) j'alc'opetic; nom no'ox la sva'an sbaic ta stuq'uil yo' bu va'alic li Elías xchi'uc Eliseoe. Yu'un li Elías xchi'uc Eliseoe te la sva'an sbaic ta ti' uc'um Jordán. 8Li Eliase la sloc' li sc'u'e; la sbal lec. Ja' la smaj o li uc'ume, jech la svoc' sba o. Ja' te ijelovic batel xchibalic ti bu taquin icome. 9C'alal jelovenic xa'ox batel ta jot uc'ume, li Eliase jech laj yalbe li Eliseoe:
—Albun li c'usi chac'an ta jpasbote, yu'un yo'to mu'yuc ta jvoc' jbatic —xut.
Itac'ov li Eliseoe:
—Ta jc'an ti xjelov to jech yepal chquich'be stsatsal Dios jech chac c'u cha'al avich'oje —xi.
10Itac'ov li Eliase:
—Toj tsots li c'usi chac'ane, pero me chavil ti c'alal chiloc' batel ta atojole, xu' chata li c'usi chac'ane. Pero me muc xavile, mu xata —xut.
11C'alal ja'o te chlo'ilajic batel ta bee, te laj yilic chanov jun careta xchi'uc ca'etic, tsanal chac c'u cha'al c'oc'; ja' ech' voc'aticuc yu'un. Jech li Eliase ta sutub ic' imuy batel ta vinajel. 12C'alal laj yil li Eliseoe, tsots i'avan: “¡Tati, Tati, vo'ot spojobbailot ono'ox li israeletique!”, xi.
Li Eliseoe mu'yuc xa bu laj yil o yan velta li Eliase.
Lic sts'acbe yabtel Elías li Eliseoe
Li Eliseoe la sli' sc'u'; cha'lic ibat yu'un. 13La stambe li sc'u' Elías te ibaj comel yu'une. Isut batel; te c'ot sva'an sba ta ti' uc'um Jordán. 14Ja' la smaj o uc'um ta sc'u' li Elías te yich'oje, jech laj yal: “¿Bu oy li Muc'ul Dios yu'un Eliase?”, xi.
C'alal la smaj li uc'ume, la svoc' sba ta jujujot, jech te ijelov o batel ta jot uc'um. 15Li j'alc'opetic te ta Jericó te va'ajtic chq'uelvanique, c'alal laj yilic ti jech ic'ot ta pasele, jech laj yalic: “¡Li stsatsal Dios yich'oj to'ox Eliase ja' xa laj yich' li Eliseoe!”, xiic.
Te bat snupic ta be li Eliseoe; la squejan sbaic ta stojol, 16jech laj yalbeic:
—Oy lajuneb yoxvinic (50) queremetic ti lec xu' yu'unique; ac'o bat st'unic li jchanubtasvanej avu'une. Me yu'un i'ic'at batel ta stsatsal Muc'ul Diose, oy yic'al oy bu icomtsanat ta jun vits, o me ta junuc stenlejal —xiic.
Itac'ov li Eliseoe:
—Mo'oj, mu me boch'o xataquic batel —xut.
17Pero ta sventa ti tsots isujvanic ti ac'o bat yich' t'unele, jech i'albatic ti ac'o spasique. Oxib c'ac'al la st'unic, pero mu'yuc la staic. 18Jech isutic batel ta stojol li Eliseo ti te comen ta Jericoe. Jech i'albatic yu'un li Eliseoe:
—Laj ono'ox calboxuc ti mu me xabatique —xut.
Li Eliseoe la slecubtas nio' te ta Jericó
19Li jnaclumetic te ta Jericoe jech laj yalbeic li Eliseoe:
—Q'uelavil, li banamil li' ta lume toj lec yilel. Pero li vo'e mu'yuc lec, xchi'uc mu'yuc c'usi xch'i li'i —xiic.
20Li Eliseoe jech laj yal:
—Ich'bicun tal junuc muc'ta ach' taza, xchi'uc te xavaq'uic tal ats'am —xi.
Jech laj yich'beic tal. 21Li Eliseoe te ibat ta nio'; te la stani ochel li ats'ame, jech laj yal:
—Jech yaloj li Muc'ul Diose: ‘Li nio' li'i vu'un la jlecubtas, jech mu'yuc xa boch'o ta xcham, xchi'uc oy xa c'usi chlic ch'iuc noxtoc li' ta banamile’, xi li Muc'ul Diose —xi.
22Li nio'e lecuben icom o jech chac c'u cha'al laj yal li Eliseoe.
23Ts'acal iloc' batel ta Jericó; ibat ta Betel. C'alal te chanov batel ta bee, te iloq'uic tal ta lum jtsob queremetic; te lic sna'leic li Eliseoe, jech laj yalbeic: “¡Batan t'abjol! ¡Batan t'abjol!”, xutic.
24Li Eliseoe ijoybij; la sq'uel batel. Ta sbi Muc'ul Dios laj yut batel. Te iloc' tal cha'cot osoetic; ja' la smil chib yoxvinic (42) queremetic. 25Li Eliseoe ibat ta vits Carmelo; ts'acal te isut o batel ta Samaria.
Currently Selected:
2 Reyes 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.