2 Corintios 2
2
1Jech la jnop ti ja' lec mu xa xtal jq'ueloxuc yan veltae, yu'un jech mu xtal cac' avat avo'ntonic. 2Yu'un me vu'un chacac'boxuc avat avo'ntonique, ¿boch'o chiyac'bun xcuxetel co'nton, yu'un vo'oxuc no'ox ta aventaic ti xcuxet co'ntone? 3Ja' yu'un la jts'ibaboxuc tal li yan cartae, yu'un jech mu xavac'bicun cat co'nton c'alal me lital ta atojolique, yu'un sc'oplal vo'oxuc chavac'bicun xcuxetel co'nton. Yu'un me xcuxet no'ox co'nton ec li vu'une, ta jna' ti jech xcuxet no'ox avo'ntonic eq'ue. 4C'alal la jts'ibaboxuc tal li cartae, toj vocol laj ca'ay, toj ep laj cat co'nton; ta ya'lel jsat ivu' cu'un la jts'iba. Yu'un ma'uc sventa chcac' avat avo'ntonic; ja' no'ox ta jc'an ac'o avilic ti bats'i ep jc'anojoxuque.
Li Pabloe la spasbe perdón ta yo'nton li boch'o staoj smule
5Li boch'o laj yac' ep at-o'ntone mu jtucuc no'ox laj yac'bun cat co'nton. Laj yac'boxuc avat avo'nton acotolic ec. Pero mu yu'unuc chcac'be xchi'il smul ti jech chcale. 6Xu' xa o ti jech yepal laj avac'beic stoj smul jech chac c'u cha'al laj achapanic c'alal ep tsoboloxuc laj anopique. 7Ja' tsc'an chapasbeic xa perdón, xchi'uc tsc'an chapatbeic yo'nton, yu'un naca me j'ech'el sjip sba o ta stojol Cajvaltic ta scoj ti ep chat yo'ntone. 8Ja' yu'un chacalboxuc, avocolicuc ac'beic yil ti ac'anojique. 9Ja' yu'un la jts'ibaboxuc tal c'usi chapasic ta sventa li c'op le'e, yu'un ta jq'uel me ta melel chach'unic scotol li c'usitic laj cale. 10Me laj apasbeic perdón li vo'oxuque, jech ta jpasbe perdón ec. Tsc'an chcac' perdón, ac'o me mu'yuc smul ta jtojol. Ti jech ta jpase, ja' sventa ac'o avilic li vo'oxuque, yu'un ta sventa Cristo jech ta jpas. 11Yu'un jech mu xcac'betic spas canal ta jtojoltic li banquilal pucuje, yu'un jna'ojtic xa li c'usi oy ta yo'nton tspase.
Mu junuc yo'nton laj ya'ay Pablo te ta Troas
12C'alal lic'ot ta lum Troas sventa ta jchol li Lequil A'yej yu'un Cristoe, toj lec jamal ti'na c'ot jta ta sventa li Cajvaltique. 13Pero solel muc xpaj ta lo'il co'nton laj ca'ay, yu'un mu'yuc to te oy c'ot jta li Titoe. Jech la jc'opan comel li jch'unolajeletic te oyique; lital ta ora li' ta Macedonia#Hch 20.1. banamil.
Ta jpastic canal ta sventa li Cristoe
14Pero coliyal Dios ti scotol c'ac'al chac' jpascutic canal li Cristoe, jech buyuc no'ox chvinaj batel sc'oplal Cristo ta jventacutic, jech chac c'u cha'al smuil yic' pom ti buyuc no'ox xvinaj batele. 15Vu'uncutic smuil yic' pom c'otemuncutic ta stojol Dios yu'un li Cristoe. Ja' yu'un chvinaj batel yic' ta stojol li boch'otic chcolique xchi'uc li boch'otic ch'ayel chbatique. 16Li boch'otic ch'ayel chbatique ja' xa sventa lajel chamel cha'yic ti c'alal cha'ibeic yiq'ue. Yan li boch'otic chcolique ja' xa sventa xcuxlejal cha'yic o ti c'alal cha'ibeic yiq'ue. Mu'yuc boch'o xu' yu'un spasel ta stuc no'ox jech chac le'e. 17Li vu'uncutique muc ja'uc sventa ta jsa'cutic taq'uin ta sventa sc'op Dios jech chac c'u cha'al tspasic li yantique. Li vu'uncutique ja' ta sventa Dios ti tsots sc'oplal chca'icutic jamal chcalcutique. Ja' yu'un q'uelbiluncutic yu'un Dios ti c'alal chic'opojcutic ta sventa Cristoe.
Currently Selected:
2 Corintios 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.