1 Tesalonicenses 2
2
Yabtel Pablo xchi'uc xchi'iltac c'alal te oyic ta Tesalónica
1Li vo'oxuque quermanotac, xana'ic lec ti mu alticuc li'aycutic te ta atojolique. 2Xana'ic ti laj quich'cutic uts'intael, laj quich'cutic q'uexlaltasel ta Filipose,#Hch 16.19-24. pero laj yac'bun lec stsatsal co'ntoncutic li Dios cu'untique, jech te c'ot jcholcutic ava'yic li sc'ope, ac'o me toj ep laj quich'cutic contrainel.#Hch 17.1-9. 3Li c'usi laj calbotcutique, mu yu'unuc lo'labiluncutic, mu yu'unuc chopol c'usi oy ta co'ntoncutic, xchi'uc muc lo'lavanejuc ta jpascutic. 4Yu'un xu' cu'uncutic laj yil li Diose, jech laj yac'bun cabtelcutic xcholel li Lequil A'yeje, ja' yu'un ja' ta xcalcutic batel. Mu ja'uc ta jsa'cutic c'u x'elan lec ac'o yiluncutic li cristianoetique.#Gá 1.10. Ja' ta jc'an ti lec ac'o yiluncutic li Diose, yu'un ja' chil c'usi oy ta co'ntontic. 5Xana'ic lec ti mu'yuc bu lec xa xic'opojcutic ta sventa yu'un oy c'usi ac'o avac'buncutic. Mu'yuc bu xilo'lavancutic ta sventa yu'un xpich'et co'ntoncutic yu'un ataq'uinic. Ja' testigo cu'uncutic li Diose. 6Muc ja'uc la jsa'cutic ich'el ta muc' yu'un cristianoetic, me ja'uc vo'oxuc, me ja'uc ta yantic. 7Ac'o me oy c'usi xu' ta jc'ancutic ta sventa ti vu'un yajtacbolaluncutic Cristoe, pero ja' no'ox laj cac'cutic avilic ti toj lec co'ntoncutic ta atojolique. Ja' jech la jpascutic jech chac c'u cha'al jun me'il ti lec ta xc'uxubin yole. 8Bats'i ep jc'anojotcutic. Mu ja'uc no'ox oy ta co'ntoncutic ta jcholbotcutic li Lequil A'yeje; oy ta co'ntoncutic chcac' jbec'talcutic ta acojic noxtoc, yu'un bats'i ep jc'anojotcutic ta jyalel. 9Quermanotac, xana'ic lec c'u x'elan tsots li'abtejcutic, xchi'uc c'u x'elan lubel laj ca'icutic ta sventa ti laj cac'cutic persa c'alal te oyuncutic ta atojolique.#Hch 18.3; 2 Ts 3.8. Laj avilic ti ta c'ac'al ta ac'ubal tsots li'abtejcutic sventa chicuxicutique, yu'un jech muc xcac'cutic avocolic ti c'alal te la jcholcutic ava'yic li Lequil A'yej yu'un Diose.
10Vo'oxuc testigooxuc, xchi'uc ja' testigo ec li Diose ti ta melel tuc' co'ntoncutic, ti lec c'usi la jpascutic, ti mu'yuc jmulcutic c'alal te oyuncutic ta atojolic vo'oxuc li jch'unolajeloxuque. 11Xana'ic lec ti ja' jech la jpascutic ta atojolic jech chac c'u cha'al tspas jun totil ta stojol xnich'nabe. 12Lec la jtaq'uiotcutic, la jtsatsubtascutic lec avo'ntonic. Laj calbotcutic ti tsc'an jech chapasic jech chac c'u cha'al tsc'an pasel ta stojol li Dios ti laj yic'oxuc sventa cha'ochic ta slequilal yo' bu tspas mantale.
13Ja' yu'un mu xlaj co'ntoncutic o stojbel ta vocol li Diose. Yu'un c'alal laj ava'yic li sc'op Dios la jcholcutic ava'yique, lec laj avich'ic ta muc'. Muc xanopic ti ya'yej no'ox cristianoe. Laj ach'unic ti ja' sc'op Diose, ti ja' melele, jech te ch-abtej o ta avo'ntonic vo'oxuc ti ach'unojique. 14Li vo'oxuque quermanotac, laj achanbeic c'u x'elan yo'ntonic li steclumal Dios te ta Judea ti oyic ta stojol Cristo Jesuse. Yu'un laj xa avich'ic uts'intael yu'un achi'iltaquic#Hch 17.5. ec jech chac c'u cha'al laj yich'ic uts'intael yu'un judioetic li jch'unolajeletic te ta Judeae. 15Ja'ic noxtoc ti la smilic Cajvaltic Jesuse, xchi'uc ti la smilbeic li j'alc'opetic yu'une, xchi'uc ti la snutsuncutic loq'uel ec li vu'uncutique.#Hch 9.23,29; 13.45,50; 14.2,5,19; 17.5,13; 18.12. Tsa'beic sc'ac'al yo'nton li Diose, xchi'uc chopol chilic scotol cristianoetic noxtoc. 16Tsc'an chispajesuncutic ec, yu'un jech mu me jcholcutic ava'yic sc'op Dios vo'oxuc li yanlumoxuque, yu'un jech mu me xacolic. Jech scotol c'ac'al chjelov ta bis li smulique. Ja' yu'un te xa oy ta stojolic li sc'ac'al yo'nton Diose.
Tsc'an chbat sq'uel jch'unolajeletic ta Tesalónica li Pabloe
17Quermanotac, li' ta orae voc'olutic jayibuc c'ac'al ta q'uelel, pero ta co'ntoncutique mu'yuc voc'olutic. Yu'un oy ta co'ntoncutic ta jc'an ta jq'uelcutic asatic yan velta. 18Ja' yu'un ta jc'an chitalcutic ta atojolic. Vu'un jtuc li Pabloune, oy xa sjayibal velta ta ox xtal jq'ueloxuc, pero la smacun ta be li banquilal pucuje. 19Yu'un vo'oxuc no'ox smuc'uloxuc co'nton; vo'oxuc xcuxeteloxuc co'nton, xchi'uc vo'oxuc no'ox ta aventaic ti mu'yuc c'usi jtaoj chca'ye. Vo'oxuc jcoronaoxuc chca'ay c'alal tsta yorail chtal li Cajvaltic Jesucristoe. 20Ta melel vo'oxuc xcuxeteloxuc co'ntoncutic; vo'oxuc ta aventaic ti mu'yuc c'usi jtaoj chca'icutique.
Currently Selected:
1 Tesalonicenses 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.