1 Corintios 1 CORINTIOS
1 CORINTIOS
Li'i ja' scarta jch'unolajeletic ta Corinto its'ibabatic batel yu'un Pablo, ja' yu'un Corintios la sbiin. Li lum Corintoe ja' jun muc'ta lum, ep beetic te tsnupan sba. Te chjelovic ep jchonolajeletic, jmanulajeletic xchi'uc boch'otic chanovic ta barco. Li cristianoetic te ta lum Corintoe puquem sc'oplalic ti ep mulil te ta stojolique, ti ja' xa jech stalelic oe, xchi'uc ti oy ep jmulavil antsetic te ti ja' yabtelic oe.
Ja' yu'un chquiltic ti oy jech la spasic ec li jch'unolajeletique; ep mulil la spasic, ja' yu'un tsots itaq'uiatic yu'un li Pabloe. Ma'uc no'ox jech la spasic li jch'unolajeletique; ep c'usi yan chopol ic'ot ta pasel yu'unic: lic svoq'uilan sbaic ti c'alal chlic c'op yu'unic ta nail tsobobbaile; laj yaq'uilan sbaic ta chapanel ta stojol jchapanvanejetic; lic soquesic stalelic antsetic c'alal jmoj tsobol cha'yic sc'op Dios; la soquesic c'u x'elan ta pasel sna'ubil Cajvaltic; toj bij la scuy sbaic, yu'un ibat ta yo'ntonic c'opojel ta yan c'op. Oy ep c'usi chopol ic'ot ta pasel yu'unic, ja' yu'un tsots itaq'uiatic yu'un li Pabloe. Laj yal Pablo ti i'oc' c'alal la sts'iba li cartae yu'un sna'oj ti tsotse, pero persa la spas yu'un c'ux ta yo'nton noxtoc li jch'unolajeletique.
Chvinaj ta capítulo 5.9-10 ti yich'ojic xa ono'ox taq'uiel jun velta yu'un li Pabloe, yu'un oy jun carta yich'ojic ti mu xvinaj bu ibate. Ja' no'ox chvinaj ti laj yich'ic albel ti mu me scap sbaic xchi'uc li boch'otic chopol c'usi tspasique, ja' yu'un chquiltic ti ta melel chopol stalelic li corintoetique. Li sba scarta Corintios li'i ja' xa xchibal carta itacbatic batel yu'un li Pabloe.
¿Boch'o la sts'un sc'op Dios ta lum Corinto? Ja' Pablo ti c'alal iloc' xchibal velta ta xcholel sc'op Diose (q'uelo Hch 18.1-18) ja'o c'alal i'ech' lajuneb yoxvinic (50) jabil svoq'uel ta banamil li Jesucristoe. Ja' yu'un toj tsots sc'oplal laj ya'ay Pablo ti c'alal isoquic li jch'unolajeletique. Li jch'unolajeletique oy israeletic; ja' ep li yanlum cristianoetique, yu'un ja' slumalic (1 Co 12.2).
¿C'usi ora laj yich' ts'ibael? Laj yich' ts'ibael c'alal i'ech' xa'ox vo'lajuneb yoxvinic, c'alal ta vaclajuneb yoxvinic (55-56 d.C.) jabil svoq'uel ta banamil li Jesucristoe. Ja'o la sts'iba ti c'alal te oy ta Efesoe (q'uelo capítulo 16.8-10), xchi'uc te chvinaj ti oy yic'al ja' laj yich' batel carta li Timoteoe.
Li vun li'i voc'bil ta balunvoc':
I.
Ta cap. 1.1-9: Patub o'ntonal xchi'uc stojbel ta vocol Dios
II.
Ta cap. 1.10—4: Sc'oplal la svoq'uilan sbaic jch'unolajeletic, sc'oplal mero bijilil ta sventa Dios, bijilil ta sventa banamil, yabtel jcholc'opetic, xchi'uc stoyobbail corintoetic
III.
Ta cap. 5—6: Taq'uiel ta sventa c'usi mu lecuc tspas jch'unolajeletic
IV.
Ta cap. 7: Chanubtasel ta sventa nupinel
V.
Ta cap. 8—11.1: Sc'oplal ve'liletic ac'bil ta smoton li c'usitic cuybilic ta diose
VI.
Ta cap. 11.2-34: Taq'uiel ta sventa antsetic, xchi'uc ta sventa spasbel sna'ubil Cajvaltic
VII.
Ta cap. 12—14: Sc'oplal bijilil chac' Ch'ul Espíritu
VIII.
Ta cap. 15: Sc'oplal cha'cuxesel
IX.
Ta cap. 16: Scoltael boch'o abul sbaic, sc'oplal c'usi xchapanoj tspas Pablo, sc'oplal taq'uiel xchi'uc sc'anel bendición ta slajeb c'op.
Currently Selected:
1 Corintios 1 CORINTIOS: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.