1 Crónicas 9
9
1Ja' jech tsacajtic sbiic icomic ta svun ajvaliletic yu'unic scotol li israeletique.
Sc'oplal boch'otic isutic tal ta Babilonia
(Neh 11.1-24)
Pero li smomnich'nabtac Judae chucbil ibatic ta Babilonia ta scoj la ti stoy sbaic ta stojol Diose.
2Li boch'otic ba'yuc isutic tal, tal naclicuc yan velta ta yosilalic xchi'uc ta slumalique, ja' tojol israel viniquetic, paleetic, levietic, xchi'uc j'abteletic ta ch'ulna. 3Li boch'otic te ivul naquiicuc ta Jerusalene ja' li smomnich'on Judá, Benjamín, Efraín, xchi'uc Manasese.#Esd 2.27; Neh 7.73; 11.3.
4Li smomnich'on Judá ti isutic tale ja' Utai xnich'on Amiud; ja' smoltotac li Omri, Imri, xchi'uc Bani. Le'e ja' xa smomnich'nabtac li Fares, xnich'on Judae. 5Li silonetique ja' isut tal yu'unic li Asaías xchi'uc xnich'nabe. 6Ta sventa li smomnich'nab Zerae ja' isut tal li Jeuel xchi'uc yits'inabe. Ja' vaquib ciento xchi'uc lajuneb yo'vinic (690) ta scotolic.
7Ta sventa li smomnich'nab Benjamine ja' isutic tal li'i: Salú xnich'on Mesulam, ja' li xnich'on Hodaviase, ja' li xnich'on Asenuae; 8xchi'uc Ibneías xnich'on Jeroham; Ela xnich'on Uzi, ja' li xnich'on Micrie; xchi'uc Mesulam xnich'on Sefatías, xnich'on Reuel, ja' li xnich'on Ibniase. 9Li yuts' yalal sbaic ti jmoj smoltotique ja' baluneb ciento xchi'uc vaclajuneb yoxvinic (956) ta scotol. Scotol li viniquetic le'e ja' banquilaletic yu'un yuts' yalalic ta sventa stotic.
10Li paleetic ti isutic tale ja' Jedaías, Joiarib, Jaquín, 11xchi'uc Azarías xnich'on Hilquías. Ja' smoltotac li Mesulam, Sadoc, Meraiot, Ahitob, ja' li banquilal to'ox te ta ch'ulna yu'un Diose, 12xchi'uc Adaía xnich'on Jeroham, Pasur smomnich'on Malquías, xchi'uc Masai xnich'on Adiel. Ja' smoltotac li Jazera, Mesulam, Mesilemit xnich'on Imere. 13Li paleetic ti isutic tale ja' yuts' yalaltac li Imere. Scotolic ja' banquilaletic yu'un yuts' yalalic ta sventa stotic. Ja' oyic o'lol xcha'mil xchi'uc oxlajunvinic (1760) ta scotolic. Ja' lec oy sbijilic ta spasbel yabtel Dios te ta ch'ulna.
14Ta sventa li levietique ja' isutic tal: Semaías xnich'on Hasub, xnich'on Azricam, xnich'on Hasabías, ja' li smomnich'nab Merarie; 15xchi'uc Bacbacar; Heres; Galal; Matanías xnich'on Micaía, xnich'on Zicri, xnich'on Asaf; 16Obadías xnich'on Semaías, xnich'on Galal, xnich'on Jedutún, ja' li muc'ta moltotil yu'unique; xchi'uc Berequías xnich'on Asa, xnich'on Elcana ti te inaquiic ta bic'tal lumetic yu'un netofaetique.
17Li jchabi ti'ch'ulna isutic tale ja' Salum, Acub, Talmón, Ahimán xchi'uc yits'inab. Li Salume ja' banquilal yu'unic. 18Ja' te chchabiic o li ti'ch'ulna ta stuq'uil sloq'ueb c'ac'al#9.18 C'ac'al - Oy boch'o chalic jtotic. ti la spas ajvalile. Le'e ja' smomnich'nab li mol Levie.
19Li Salum xnich'on Coré ja' li xnich'on Ebiasaf xnich'on yan Coree xchi'uc li yan coreetic ti jun smoltot xchi'uquique ja' yabtelic o chchabiic li sti' yochebal ch'ulna, jech chac c'u cha'al smoltotic ta vo'one ti ja' yabtelic o xchabiel li ti'ch'ulna pasbil ta nucul yu'un Muc'ul Diose.
20Li Finees xnich'on Eleazare ja' banquilal soldado yu'unic, lec chi'inbil yu'un Muc'ul Dios.
21Li Zacarías xnich'on Meselemiase ja' chchabi li ti'ch'ulna pasbil ta nucule.
22Scotol ti c'u yepal t'ujbilic ta xchabiel ti'naetique ja' chib ciento xchi'uc lajchab (212) ta scotol, puru yuts' yalal sbaic te ta slumalic. Ja' i'ac'bat yabtelic yu'un David xchi'uc li Samuel ti lec sna' c'usi chc'ot ta pasele. 23Scotolic c'alal ta xnich'nabic la sjelilan sbaic ta xchabiel li sti' yochebal ch'ulna yu'un Muc'ul Diose. 24Oy xchabiel yu'unic ta sloq'ueb c'ac'al,#9.24 C'ac'al - Oy boch'o chalic jtotic. ta smaleb c'ac'al, ta norte, xchi'uc ta sur. 25Li xchi'iltaquic ti te nacajtic ta bic'tal lumetic yu'unique, ta vucvuc c'ac'al ital coltavanicuc. 26Pero li chanib banquilal jchabi ti'naetic, ja' li levietique, te oyic o scotol c'ac'al. Ja' chchabiic li cuartoetique xchi'uc li sc'ulejal sna Diose. 27Le'e te nacalic o ta spat xocon ch'ulna yu'un Dios, yu'un ja' yabtelic o xchabiel, xchi'uc ja' tsjamic ta jujun sob. 28Oy jayibuc ja' oy ta yac'olic tsloq'uesic noxtoc li abtejebaletic sventa yabtel Diose, xchi'uc ja' chotesic noxtoc; ja' chich'ic lec ta venta c'u yepal. 29Li yantique ja' oy ta sventaic xchabiel li yan c'usitic te chtune, xchi'uc li arina, ya'lel ts'usub, aceite, pom, xchi'uc muil poxiletique. 30Oy jayibuc xnich'nab paleetic ja' tspasic li perfumeetique. 31Li Matatías, ja' li leví vinic, sba xnich'on Salum, ja' li smomnich'on Coree, ja' oy ta sventa tsq'uel li c'usitic chich' ch'ilel ta xalteme. 32Oy jayibuc coatetic ja' oy ta sventaic xchapanel lec li pan te oy o ta stojol Diose; ja' ta xcholanic lec scotol c'ac'al ta sc'ac'alil chcux yo'ntonic. 33Jech noxtoc oy jq'uejimoletic; ja' banquilaletic yu'un li levietique. Te nacalic ta cuartoetic yu'un ch'ulna. Mu'yuc sventainojic yantic abtel, yu'un ta c'ac'al ta ac'ubal mu xocobic o ta spasel li yabtelique.
34Le'e ja' banquilaletic ta jujuchop yuts' yalalic ti ja' yalab xnich'nab levietique. Ja' te inaquiic ta Jerusalén.
Sc'oplal smoltotac xchi'uc yalab xnich'nab Saúl
(1 Cr 8.29-40)
35Li Jehiel stot Gabaone te inaqui ta lum Gabaón. Li yajnile Maaca sbi. 36Li sba xnich'one Abdón sbi. Ja'o xtal Zur, Cis, Baal, Ner, Nadab, 37Gedor, Ahío, Zacarías, xchi'uc Miclot. 38Li Miclote inich'naj, Simeam sbi. Le'e te inaqui ta Jerusalén ec jech chac c'u cha'al li yan xchi'iltaquique.
39Li Nere inich'naj, Cis sbi. Li Cise inich'naj, Saúl sbi. Li Saule inich'naj, ja' Jonatán, Malquisúa, Abinadab, xchi'uc Es-baal. 40Inich'naj li Jonatane, Merib-baal sbi. Inich'naj li Merib-baale, Micaía sbi. 41Li xnich'nab Micaiae ja' Pitón, Melec, Tarea, xchi'uc Acaz. 42Inich'naj li Acaze, Jara sbi. Inich'naj li Jarae, ja' Alemet, Azmavet, xchi'uc Zimri. Li Zimrie inich'naj, Mosa sbi. 43Li Mosae inich'naj, Bina sbi. Li xnich'on Binae Refaías sbi. Li xnich'on Refaiase Elasa sbi. Li xnich'on Elasae Azel sbi.
44Li Azele oy vaquib xnich'on. Ja' Azricam, Bocru, Ismael, Searías, Obadías, xchi'uc Hanán. Le'e ja' xnich'nab li Azele.
Currently Selected:
1 Crónicas 9: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.