Baromain 7
7
Tonga na Christ bèni bodi bachomi, motamba a machuma twa.
1Banyango ba baphele ba nga, nga lobe na bakoncha bango bayebe miyeko bwe, beni bodi oyeba bwe miyeko midi na chwa ikolo na moto machu machò mango wango achaka na bomwè ka?
2Elenge ko yango mwachi abikangiba na molomi a wango o cha miyeko machu ma wango machò o wango achaka na bomwè, ko, mo molomi awe, owana moyeko myango mokangaki o phanyak’a wango na molomi mukiènya.
3Ko, mo wango alongibe na bole bakbwi o molomi a wango achaka na bomwè, owana tatanga wango bwe mwato a bochembi, ko, mo molomi a wango awe, owana moyeko mwango mukiènya o nchoto a wango, mo nyò wango alongibe na bole bakbwi dy’òtanga wango bwe, mwato a bochembi ka.
4Banyango ba baphele ba nga nà beni dyòkò elenge ko yango, beni bobibomiba ebati a miyeko tonga na nchoto a Christ, tonga n’ichekwa bato ba koncha wango ewumwaki o bowe echoko bèni tobota Nzambe mbuka yango.
5Tonga o bèni bobèki bochaka ebati a nchoto, baphongo bango batubaki tonga na miyeko bakielaki matoma na bikiètè ba bèni, echoko byango bibotaki mbuka o bowe yango.
6Kinòwa bèni buphinchwiba na miyeko echoko bèni buwaki n’èyeka yango ekangaki bèni bocho yango, na kinòwa bèni bokiele botoma o ch’èdyalele Eyaye etemu, edi odyala o ch’èdyalele ekale a mamelo ka.
7Ne bèni toloba bwe nde? Miyeko edi machuma? Twa nyè. Mo ebodyala tonga na miyeko ka, ibè nga boyeba machuma ka, mo miyeko mibodikiza bwe, todyalake na baphongo ka, ibe nga boyeba baphongo ka.
8O machuma madwaki komo, mango matubizaki baphongo moto elenge elenge o cha nga tonga na miyeko ma mochimbako. Mo miyeko oyèniza machuma ka, mango madi bowe.
9Bocho nga lòngòki bwabona miyeko twa, ko, o miyeko ma mochimbako mitubanaki bochuma bowumwaki,
10na nga awaki. Miyeko ma mochimbako, myango mikambaki nga o bomwè michekola nga mowe.
11Tonga o machuma madwaki komo, mango machukwizaki nga n’ichena, na miyeko ma mochimbako, na mabomaki nga na myango.
12Kobona miyeko midi echwa na miyeko na mochimbako midi n’èchwa, midi minyèki na minyòngò.
13Eyeka enyòngò ebèki n’iwò iboma nga nènè? Twa nyè. Edi machuma koncha echekolaki nga mowe tonga n’iyèniza edyalele a mango koncha bwe, machuma edi machuma, na machuma makwaki eyeka enyòngò na mabomaki nga na yango, na kobona machuma taleka bokwokuli mutu miyeko ma mochimbako.
14Bèni boyebe bwe, miyeko midi n’èyaye ebati a myango, ko, nga di ebati a nchoto yango, etèkibaki na machuma.
15Tonga nga di oyeba ekielele yango nga kiele ka, nga di okiela eyeka yango nga dinge ka, ko, eyeka yango nga yine, nga kiele yango.
16Mo kinòwa nga kiele eyeka yango nga di odinga ka, owana nga chimite bwe, miyeko midi minyòngò.
17Kobona edi odyala nga koncha ekiele ekielele yango ka, edi machuma, mango madi o cha nga.
18Tonga nga yebe bwe, o cha nga ebati a nchoto, edi eyeka enyòngò twa, bodingo b’ikiela beka binyòngò bodi, ko, nguli ikiela byango edi twa.
19He, beka binyòngò byango nga leke edingele nga okiela byango ka, ko, beka bibe, byango nga leke eyinele, nga kiele byango.
20Ko, mo nga kiele beka, byango nga di odinga ka, edi okiela wana nga koncha ka, ekiele bochuma bwango bodi o cha nga.
21Nga dwe moyeko mwango o cha nga bwe, okomo nga dinge bokiele ekielele enyòngò, beka bibe bidandame na nga.
22Tonga nga di phocha miyeko ma Nzambe o cha mwe ma nga.
23Ko, nga yènè moyeko makbwi o cha bikiètè ba nga, mwango monane na moyeko mwango modi o ch’èyaye a nga, mokande nga na mochekole nga motamba a moyeko ma machuma, mwango modi o cha bikiètè ba nga.
24Di kambi a nga, tephakola nga o cha nchoto a bowe di nda?
25Tika Nzambe atochibe mutu Mokonchi ma bèni Jésus Christ.
Na kobona ebati a nga koncha nga di motamba na mowoki a miyeko ma Nzambe, ko, ebati a nchoto nga di motamba a miyeko ma machuma.
Currently Selected:
Baromain 7: BUI1947
Highlight
Share
Copy
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
