Colossien 1
1
Paul abèche bana ba Nzambe. Achange tonga n’èchingane a bango. Achakole bwe, Christ adi elenge a Nzambe, na adi mutu m’èbuliki a Nzambe. Achange tonga n’ichèbo dyango itaki na wango tonga na mina monyòngò.
1Paul, apôtre a Jésus Christ tonga na bodingo ba Nzambe na Thimothée, mwanyango a bole èbati a Nzambe a bèni,
2o ma banyango ba baphele o Christ b’èchwa, na b’ètungu, bango badi o Colosses. Tika grâce edyale na beni na phi a Nzambe, Chango a bèni na Mokonchi Jésus Christ.
3Banga bophè Nzambe ingòko, Chango a Mokonchi ma bèni, Jésus Christ o mayonga ma banga tonga na beni kokoko,
4tonga banga bowokaki echingane a beni o ch’a Jésus Christ, n’èlumb’a beni, yango beni bodi na yango na bato b’èchwa bachò,
5tonga n’ichena dyango idi ibombibaki na beni ikolo, dyango beni bowokaki bocho o mawò ma nènè o mina minyòngò,
6myango mipholaki o ma beni na myango midi o ch’echò, na myango mibote mpuka na mikate ko myango mikielaki o phanyak’a beni kokoko o bucha ba tabocho bona, okomo beni bowokaki myango na bomèchènèki grâce a Nzambe o ch’a nènè,
7ko beni boyekolaki a Epaphras bona, mochali a botoma bò na banga, akonde, na modikichi ètungu a Christ tonga na beni,
8na wango achakolaki nà na banga elumb’a, beni o ch’Eyaye,
9echoko banga bobokondo boyonga tonga na beni ka yango, o bucha bwango banga bowokaki iwò dyango kokoko ncho kinòwa, na banga boyonge bwe, beni botonde na bokièngu ba bodingo ba wango, na bolèngi na bophomu b’Eyaye bichò,
10na botambole ko etambole yango Mokonchi modinge bona, na kobona bochangize mwango o beka bichò, na bobote mpuka a matoma manyòngò machò, na bokate o ch’a bokièngu ba Nzambe,
11na bolènde na nguli echoko ko nguli a botochibe ba wango edi bona, tonga n’idikiza ngingi na chabo o beka bichò.
12Na bophè Chango ingòkò na moni, koncha wango enyèzaki beni bodyale bakabi ba beka b’itike ba b’èchwa o phololo.
13Koncha wango emichaki bèni o nguli a bowe, n’atikaki bèni o bokonchi ba Mwan’a bole a wango akonde.
14O ch’a wango bèni bodi n’ichungiba, pardon a machuma ma bèni.
15Yengu koncha edi elenge a Nzambe, wango oyèniba ka, abotibaki makuba machò bocho.
16Beka bichò bitulibaki tonga na wango, byango bidi ikolo, na byango bidi o che, beka byango biyènibe na beka byango bidi oyèniba ka, nyò bakiti ba botochibe, nyò bakomandi nyò mikonchi, nyò nguli o phanyak’a biyaye, beka bichò bitulibaki na wango na tonga na wango.
17Wango adi beka bichò bocho, na beka bichò bibike o ch’a wango,
18na wango adi mutu ma nchoto, dyango idi ebuliki a Nzambe, wango adi bophotiche, mwe tabocho o phanyak’a bawe, echoko wango tadyala moto a tabocho o beka bichò yango.
19Tonga ebèki enyèki na Nzambe bokokele bochò todyala o ch’a wango.
20Na Nzambe tanyèza beka bichò na wango dyòkò, o chima wango atubizaki phi tonga na malongo ma wango awèchinye, nyò beka byango bidi ikolo nyò beka byango bidi o che.
21Na beni dyòkò bango bobèki mochika na wango ikale, na beni bobèki bandoli ba wango o ch’a mitema, tonga na matoma mabè,
22ko kinòwa wango awutaki tonga na beni na bowe ba nchoto a wango, tonga n’iyicha botike beni o bocho ba wango n’èchwa, banyèki n’iwò twa,
23mo beni bobandame n’èchingane, etungu na ngingi olangwa ichen’a mina minyòngò, myango beni bowokaki ka, niè, na myango michakwibe o bokuba ba nch’a ch’ikolo bocho, nga Paul, nga bitikiba mochali a mina minyòngò myango.
24Kinòwa nga change o ch’a makambi ma nga tonga na beni, na nga tunyole makambi ma Christ o nchoto a nga, mango mawuli o nchoto a wango, dyango idi ebuliki a Nzambe.
25Nga bitika mochali a yango, ko mina m’ikaba beka ba Nzambe myango wango aphèki nga tonga na beni midi bona, na bochakole mawò ma Nzambe o binongo bichò kot’èchakole,
26mawò ma yiche mango mabèki mabombibe o bophotiche ba mabiko na mangomba, ko, kinòwa mayènibe na bato b’èchwa ba wango,
27tonga Nzambe aingaki boyebize bango bomandi ba botochibe ba mawò ma yiche bidi bwe o phanyak’a bato bango bach’owoka mawò ma Nzambe ka, ”mango madi Christ o ch’a beni, ichen’a botochibe”,
28wango banga bochakole na boteye moto ikika, na bodikize moto ikika na bokièngu bochò, echoko banga toyicha botike moto ikika o bocho ba wango ko moto monyèki bona o ch’a Jésus Christ yango.
29Tonga n’iwò dyango nga dyòkò nga lèki ekielele mochalo mokuli ko nguli a wango edi bona, yango ekiele mochalo o ch’a nga kot’èkielele.
Currently Selected:
Colossien 1: BUI1947
Highlight
Share
Copy
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
