Markus 5
5
Ap Gerasa aʼge muʼgat enebabut wiak aʼge ogola oruakma, Yesus en henokho lebigenebesi wene
(Matius 8:28-34; Lukas 8:26-39)
1Asogo erliktigisema, at Yesus osi enemin ik Galilea omugwe ano etle akhit aphwami o Gerasa aʼge onowi pam libegesa. 2Libegesarik, at Yesus ik so ogola en ik esaʼgoma libagokhwe erianoat, ap mesik owikmu aphwami werak aʼge onobugumu ebano en liplau wagarik e, Yesus eʼbek waga. Ap ai muʼgat ebabut wiak aʼge ogola ʼgoluk, 3-4aphwami werak aʼge onobugumu ebano modok oruakma, aphwami logon en nin dakha nan dakha herle ʼbesie emeʼgen herle pam eʼgik herle hettugulat, oyuk herle hettugulat, togu legesa aʼgeat de, eʼgik herle daksogo hwikhasulat, oyuk herle porloksogo hwikhasulat, tagoma re, pobuk di herle yu herle ʼbesie emeʼgen herle eminat walhegesarik e, no herle pam on hettu ʼgelaʼge agama re, ebe tenak poluk ebabut e, ap sa en hebelu ʼgelaʼgeat mia aga. 5Asogo oruakhwe, erlige hwedik, hubaʼgo hwedik aphwami werak onobugumu ebano ʼgwiselat, dom pam ligotluk denagalat, tiselat e, iak ngai-wai eselat, uʼgwarek en helep pam emep namogo wetil lasu laga. 6Asogo til lasumu Yesus laga ai erlige re, ap ano ebe walekma eba welat, Yesus il yethesi. Il yetholuk e, at eʼbek pungtak wagarik e, odogorlu pam huragarik e,
7-8“Yesus Allah ʼgain Onuk Logo aʼge omlogo yu, an noʼgosogo taknebaigoluk wegen,” oluk moʼgulesimu, at Yesus en e,
“Muʼgat hebabut wiak aʼge yu, ap yu ogola en henokho libemen o,” oluk moʼgulosoam, at ano iak loksogo eselat e,
“Eiga. Nebit a. Allah uak a. Wiagapnobogun a,” oluk iak loksogo egei. 9Iak loksogo egeimu re, at Yesus en e,
“Hat honuk sa,” oluk ebam hin wesimu re, at en e, disogo egei,
“Nenebe esanat welege ai en e, nonuk esan pulik u ʼgelaʼge, nonuk Legiun,” moʼgulesi. 10Asogo moʼgulesirik e, Yesus en is muʼgat enebabut wiak aʼge ai o eba en walegat peragonobouwano oluk, iak sakhosogo Yesus moʼgulesi. 11Ai erlige o eba dom petne wam esanat mugwa wogu legesa. 12Wogwi oruakma, is muʼgat enebabut wiak aʼge ebano en e, Yesus disogo moʼgulegisa,
“Nis wam ogola yagatla ʼgwi lul en e, eba peraknenebemen o,” oluk eniak sakhosogo moʼgulegisa. 13Asogo moʼgulegisema, at en e,
“I o. Lit o,” egeimu, is muʼgat enebabut wiak aʼge ebano henokho libegesarik e, wam ogola yagatla ʼgwi legesema, wam esan ebano ʼbulema ebano en lusogo ʼbi lagarik e, ik omugwema en e, ik olomu legesa. Wam ik olomu legesa ai re, wam enebe 2.000 ʼgelaʼge modok aʼbigat ik olomu legesa. 14Ik olomu legesema re, is wam pekharok welegesa aʼge onogorlok agarik pungtak aphwami eneʼbek yoʼgo legesarik, aphwami o seli lokma moʼgulontogulat, weimu moʼgulontogulat, moʼgulentigisa. Moʼgulentigisema re, is aphwami en e,
“Noʼgosogo agama en egesa,” oluk, enil houwogoluk Yesus eʼbek wegesa. 15Wegesa ʼgal e, ap tono hauat muʼgat enababut wiak aʼge esan aʼbik ogola ʼgoluk welaga aʼge ano, ebabut heberlogo op agarik, osum ʼbuksogo hweriogo oruakma enil hegesarik onogorlok aga. 16Onogorlok agama re, is aphwami pema wene asogo agama enil hegesa aʼge en e, disogo moʼgulentigisa,
“Ap yu muʼgat enebabut wiak aʼge ogola ʼgoluk welaga aʼge ano disogo tegei o. Ye, wam ebano disogo tegei o,” oluk wene ʼbeliʼgogo moʼgulentigisa. 17Asogo moʼgulentigisema, is en e, disogo moʼgulegisa,
“Yesus. Hat hebe nis neneʼbek yema wolorogun erlak o. Momu lak o!” oluk eniak sakhosogo moʼgulegisa. 18Moʼgulegisema re, at Yesus ik so ogola ʼgwik ʼgalma re, at ap muʼgat enebabut wiak aʼge ogola ʼgoluk welaga aʼge ano en e, disogo moʼgulesi,
Neʼbirek noʼgu lomogoluk louwok o,” oluk iak lioksogo moʼgulesimu, 19at Yesus en e, disogo moʼgulesi,
“Erlak o. Howi pam lak o. Laguntik e, nonue ʼgain Onuk Logo aʼge ano en ede nioluk e, disogo taknebesi, oluk harilak hosi moʼgulentai lak o,” oluk esaʼgo wusogo perakpesi. 20Perakpesimu, o kota 10 pam werik oruakma lagarik disogo moʼgulentil denaga laga,
“Yesus en disogo obapnebegei, yusogo obapnebegei,” oluk moʼgulentil lagama re, is enebe ʼberlek en e,
“Nonogorlok o,” oluk erliktigisa.
Yairus agalogo emin, hwe mesik emep lasu modok welaga aʼge emin, Yesus en obabenebegei wene
(Matius 9:18-26; Lukas 8:40-56)
21Asogo tegeirik e, Yesus ik omugwe ano ik iak yu akhit so wusogo liplau waga. Liplau wagoma, aphwami esan pulogo at eʼbek ik esaʼgoma odoktu egesa. 22Odoktu egesarik oruakma re, o aphwami Yahudi aʼge seʼban ogumu ebano onuelak ʼgain welegesa aʼge mesik onuk Yairus wagarik, Yesus il yetholuk, eragam odogorlu pam hweriogo welat hau weriselat e, disogo moʼgulesi,
23“Yesus nue. An nagalogo ebe wei aʼge ebam ou en wareigoluk tagokhwe wegi o. Hat en heʼgik tenhagunmu ebe op emarik elaluk welemagoluk, neʼbirek lul en yoʼgo hobou wegi o,” oluk iak erlagaik ʼgusogo moʼgulesi. 24Asogo moʼgulesimu eʼbirek legesa.
Lagaimu re, aphwami modok aʼbik Yesus eʼberlik lagalat ʼbun-ʼbun ʼban-ʼban ebam hi-hebitsogo legesa. 25Legesa eba aʼge, hwe mesik emep lasu modok oruakhwe 12 tahun tegei. 26Emep lasu modok welat e, dokterlak en heleʼguagoluk di dokter yu dokter yoʼgo onoboluk, ou oʼgo wogontugulat e, at en aʼge modok erlagaptegei aʼgeat de, emep ano ʼgarok u erlak modok ebenagaikmu loksogoat lasu laga. 27-28Emep asogo lasu modok welat, Yesus obok esaʼgo holholuk e, ede en e, disogo epesi,
“An at osum neʼgik tenhelema, nemep yu erlak ema o,” opoluk lagarik, Yesus eʼberlik horoksogo lasulat, osum eʼgik tenhesi. 29Eʼgik tenhasukhwe erianoat, emep ano edipmu en ʼgarok egeimu, ogola en e,
“I. An ou modok wiak welegi ano, obapnebegei hegi,” oluk ede epesi. 30Asogo ede epasukhwe, at Yesus ede en e,
“Eige! An nannisogo elalin obabenebise legi aʼge ano nogola en aphwami pema enebam lagama enagat hegi,” oluk erianoat pobi tegei. Pobi toluk e, aphwami esan ebano odogun ʼgwanisogo il ʼgwelagontoluk e, disogo moʼgulentesi,
“An nosum sa en eʼgik tenhesi,” oluk enebam hin wesi. 31Hin wesimu re, at osi iak wogu legesa aʼge ebano en e, disogo moʼgulegisa,
“Eige! Nue. Nis nenebe esanat heragam oʼgwe egilluk waga lege aʼge yema hil yetnentasulat e,
Sa en tenniesi, oluk ese legen?” oluk moʼgulegisa. 32Asogo moʼgulegisa aʼgeat de, at Yesus en,
“Sa en tenniesi,” oluk, ebe dokhumtak paigoluk il edenogo yerentil laga. 33Yerentil lasumu, at hwe ano ede en e,
“An en tenhegimu taknebesi aʼge ano de, oso hegi,” oluk pobi tegeitik e, ogorlok agarik, uak erlik-erlik eselat e, Yesus eragam odogorlu pam huragarik e,
“An asogo welegerik e, disogo tegis o,” oluk ʼberlegat ʼbeliʼgogo moʼgulesi. 34Asogo moʼgulesimu, at Yesus en, disogo moʼgulesi,
“Nagalogo e. Hede nebam heʼberigen ai en op egen o. Holuk e, hogola opsogo lak o,” oluk perakpesi.
35Asogo moʼgulosokhwe erianoat, o aphwami Yahudi aʼge seʼban ogumu onue ʼgain ano owi pam en osi yoʼgo wegesarik e, disogo moʼgulegisa,
“Nue. Hagalogo ano arat waragama en wege o. Holuk e, nonue ʼgain wene moʼgulnentasu aʼge yu, ʼburlat hemin louwogoluk ming-ming tu no? Erlak o,” oluk moʼgulegisa. 36Asogo moʼgulegisema, at Yesus en, is eniak esaʼgo hwelegei aʼgeat de, eniak sagalogo ukpesirik ʼgain ano disogo moʼgulesi,
“Hede mennei oborogun o. Hede an nebam heʼberik poluk nemin louwok o,” oluk moʼgulesirik e, legesa. 37Legesarik, aphwami enebe esanat moʼgulentasulat e,
“Neneʼberlik worogup erlak. We, is Petrus emin, Yohanes ot Yakobus eʼbirek emin, is nak e, nemin lul o,” oluk enemin legesa. 38Legesa ʼgal e, ʼgain ano owi pam aphwami esanat welat e, eniak modok aʼbigat ngai-wai ogulat e, loʼgu marugumu legesa. 39Legesarik, at Yesus ebe o pam ʼgwegeitik e, disogo moʼgulentesi,
“His e, ngai-wai ogulat loʼgu marogu legep ai nopaget. Hwele ai warom erlak, we, nogoso yo,” oluk moʼgulentesi. 40Asogo moʼgulentesimu re, is aphwami ebano en e, eida ebigisa. Eida aʼbik ebigisema, at en e, enebe ʼberlegat perlengsogo odipmu lebigenebesi. Lebigonoboluk e, is hwele ano aik ia emin, Yesus osi emin legesa aʼge ebano emin, is nak wogonoboluk o ogorlirakma hwele ano oruakma ʼgwigisa. 41ʼGwigisarik, eʼgik tenak poluk e, nis neniak pam,
“Hwele yu, nagalogo. Inorogun en moʼgulhese legi o,” oluk u ʼgelaʼge, is eniak pam,
“Talita kum,” oluk moʼgulesi. 42Asogo moʼgulosokhwe erianoat, hwele ano ebe dagaga hwerli en 12 tahun agarikmu no oluk e, ebe inagarik, o ogorlirak oʼgwe lak-wak tegei. Asogo tegeimu, is aphwami ebano enil hegesarik,
“Eige! Nonogorlok o,” oluk erliktigisa. 43Asogo erliktigisa aʼgeat de, at Yesus en e, disogo moʼgulentesi,
“An tisokhwe henil niegep aʼge ai, aphwami logon modok moʼgulentagup o,” oluk nenesaʼgo weregitik e,
“Hwele yu soʼboru mesik nouwagoluk wogemis o,” oluk moʼgulentesi.
Currently Selected:
Markus 5: WUL
Highlight
Copy
Compare
Share
Want to have your highlights saved across all your devices? Sign up or sign in
