Peragenebesi 24
24
Ap Yahudi aʼge en wene Paulus ebam pegesa wene
1Asogo moʼgulentesirik e, agauwa huaben welegesarik agauwa agaikhen oruakma re, is ap Allah eiye aʼge onue ʼgain Ananias emin, enarluedek aʼge ebano logon emin, ap mesik wene hwaliso aʼge onuk Tertulus emin, enemin o Kaisarea wegesa. Wegesarik e, ap ʼgain gubernur Feliks ano eʼbek ʼgwigisarik, wene Paulus ebam pouwogoluk moʼgulegisa. 2Asogo moʼgulegisarik, Paulus ebe worlholuk e, Tertulus en wene ebam pouwagoluk, moʼgulegisema, at en ʼgain Feliks disogo moʼgulesi,
“Gubernur Feliks nue. Hat en tennentarok oruakhwe re, nis yema page enat weim erlak lioksogo welege o. Aphwami nis aʼge paget e, hogola en ʼgagalogo, hegitsogo taga legen ai pam di aʼge yu aʼge op ago. 3Hat en o da ya nin hwedik nan hwedik opsogo nak taga legen ai, nis en,
Op o, oluk, hau modok wathobogu lege. Nue. 4Asogo aʼgeat de, an en wene yat moʼgulhosokhwe hebit emano oluk, wene horoksogo moʼgulheik yu, hebabut op ano re, hesaʼgo hologun en, wene ebe moʼgulheik. 5Ap yu en e, aphwami wiagabenebil denagoma, ebabut ʼbalige o. Is aphwami ap Nazaret aʼge ano eʼberlik lagai aʼge onue ʼgain welat e, aphwami Yahudi aʼge o di owi yu owi welagai aʼge ʼberlegat onogola edikpil denago yo. 6Asogo onogola edikpil denaga lagarik e, o Allah owi werik aʼge wiagap paigoluk tagoma ebe tenak pege o. [Tenak pegerik e, wene nis aphwami Yahudi aʼge en togwi aʼge pam emdema wouwogoluk tige. 7Asogo aʼgeat de, ap tentara aʼge onue ʼgain Lisias ano wagarik e, ebe neneʼgikmu en delogo woluk lagarik yema perakpou waga ai o. 8Asogo perakpou wagarik, wene ap yu ebam pege aʼge nenebe hat heʼbek wemagoluk moʼgulnentesimu wege yu i o.] Nis en wene ebam pege aʼge ai, hat en emdema wasulat, haluk emayat o,” oluk moʼgulesi. 9Asogo moʼgulesimu, is ap Yahudi aʼge pema akhit ebano en ogo re, wene at ebam pogulat e,
“At Tertulus en egei ai, demat egei yo,” oluk moʼgulegisa.
At Paulus en, uʼgwarek ebe erlele wokho, ʼgain Feliks moʼgulesi wene
10Is en wene asogo egesema re, at ʼgain gubernur ano en wene Paulus en mesik uagoluk eʼgik dum ʼbelinghasulat moʼgulesi. Moʼgulesimu, at en e,
“Nue. Aphwami nis aʼge, di wene yu wene enebam pogwiam e, page enat di tahun yu tahun hat en enemdema wokho wene enebam pasulat, noʼgorliselat, taga legen ano an naluk o. Ai en, wene an nebam pegesa ai, erlakmayat o, oluk, nuʼgwarek nebe erlele wokho harat moʼgulheik ai en, nogola nagai hasu legi o. 11An Allah erliktigoluk o Yerusalem ʼgerat legirik e, agauwa 12 nak takpoluk welegi o. Welegirikmu re, hat en,
Demat a? Erlak a, oluk is hin wogentagunmu en de, haluk emayat o. 12An o Allah owi werikmu ʼgoluk emin, o aphwami Yahudi aʼge seʼban ogwiʼgwe ʼgoluk emin, o seli momu lobotluk emin, aphwami muon logon enemin neniak sagalugulat, ye, is logon eniak loksogoat sagaluagoluk onogola edikpasulat, tu erlak o. Asogo tisokhwe ogo is ap Yahudi aʼge en enil nio erlagat o. 13Is ap yema en wene nebam pogwi ai re,
Demat tegeimu, oluk no aʼge onukhiouwa. Onukhio aʼge erlak ema o. 14Aʼge re, wene demat taga legi aʼge ebe yuat ʼbaksogo moʼgulheik. Is en e,
Aphwami Yesus eʼberlik lagai ai wiak, oluk ogwi aʼgeat de, an nak e, is en, wiak ogwi aʼge ai iak hologo, nis neneʼbalak naduk Allah eragam ʼgoluk welat erliktogu legesa ai ʼgelaʼge, an ogo erliktaga legi nak e, demat taga legiat o. Erliktagalat, wene Allah en nenesaʼgo weregei wene ai emin, ap at iak moʼgulontogu legesa aʼge eniak emin, ʼberlegat pelal wokho pegesa aʼge oruak ai, demat oluk tenak welegi o. 15Is ap yu en e,
Aphwami op togwi aʼge emin, wiak togwi aʼge emin, enebe warotluk oruakma demat Allah en enelalugabonobua, oluk, enede Allah pam heʼberik oruak ai ʼgelaʼge, an asogoat welegi o. 16Asogo welat e, nogola en e,
Wiak mesik tegis, oluk nede eʼgin welemano oluk e, Allah paget emin, aphwami enebaget emin, op nak taga legi ani, oluk, nede sesogo weleigoluk, nannisogo taga legi o.
17An o mo ligom, ʼbugom, osokhwe tahun esanat o Yerusalem lo erlak welegirik e, narilak norokhwi nenebe mesik aʼge oluk, uang logon lerentasulat, Allah akhit logon pasulat, tiogoluk legi o. 18Legirik asogo tagalat, o Allah owi werikmu ʼguogoluk enebetne horogwi ai ʼgelaʼgeat asogo horak poluk en ʼgwegis o. Asogo tegis ai, aphwami esan nemin ʼgwilo erlak o. Is logon ogo enemin neniak sagalu erlagat oruakma is Yahudi aʼge en enil niegesayat o. 19We, is ap Yahudi aʼge logon o propinsi Asia en legesarik eba welegesa. Eba oruakma nil entegismu re, is enat wene nebam po holuk e, hat heʼbek ya wotluk en wene nebam po aʼge o. 20Is enebe erlak holuk e, is ap yema oruak aʼge en uak o. Aphwami en is ap Yahudi aʼge Allah paget wene edip ʼbeloʼgogwi aʼge eneʼbek nebei legesarik, eba edik oruakhwe wene edip heratigisa. Asogo heratogwiam, an wiak tegis aʼge mesik demat enesaʼgo hweligisa aʼge enat uak o. 21An eba edik welat, wene mesigat yu nak niak loksogo moʼgulentegis ai o,
Aphwami waragai aʼge Allah en demat enelalugabonobua, oluk pobi taga legi ai en, wene nebam pogu legep yu o, oluk moʼgulentasuam en nak e, enesaʼgo hweligisa ai o,” oluk moʼgulesi.
22Asogo moʼgulesimu, at Feliks aphwami Yesus eʼberlik lagai wene ai alukmu no oluk e, Paulus disogo moʼgulesi,
“Yogodak wene arat ege. Pobuk ap tentara onue ʼgain Lisias ano ebe wago holuk en, wene hebam pegesa aʼge ai, an en wene edip herasogo ologun werik ani o,” oluk moʼgulesi. 23Asogo moʼgulesirik, at osi tentara ʼgain mesik en Paulus ebe tenak welemagoluk disogo moʼgulesi,
“Hat en Paulus ebe tenak welat holuk e, yogunat nese lemagoluk ukpomup o. Ye, aphwami at aʼge en di aʼge yu aʼge at agai aʼgeat, lethouwogoluk ogwi holuk e, wene yagentagun no yo. Ukpasu lomup o,” oluk esaʼgo weregei.
At Paulus ebe ʼgain Feliks emin, hwe Drusila emin, eneʼbek woluk legesa wene
24At ʼgain Feliks en asogo,
“Tenak wolomup o,” oluk moʼgulesirik, agauwa weiyat welegesarik en, at ugwe onuk Drusila, hwe ebe Yahudi aʼge woluk wagarik e, osi en Paulus wai louwagoluk moʼgulentesimu legesarik ebe woluk wegesema re, at Paulus en aphwami enede Kristus Yesus ebam heʼberik welagai wene ano moʼgulentasuam, ʼgain Feliks ano esaʼgo hwelak welaga. 25Asogo hwelak oruakhwe, hegitsogo tugulom wene ano emin, enede sebelak wolom wene ano emin, pobuk Allah en aphwami nenemdema wokho poluk wene nenebam pasulat, noʼgorliselat, tua wene ano emin, moʼgulentasuam, Feliks ogorlok aga. Ogorlok agarik e,
“Yogodak wene arat egen o. Pobuk u erlige holuk en de, worlhiaik ani o,” oluk togolik perakpesi. 26Asogo perakpesirik, ogola en e,
“Paulus en uang mesik woknema hwi a,” oluk epasulat, nin hwedik nan hwedigat worlhasulat e, weneane eʼbirek ogu legesa.
27Asogo ogukhwe, mo ligom ʼbugom 2 tahun welegesarik en, pobuk Feliks ebalema ap mesik onuk Perkius Festus gubernur emagoluk edikpegesa. Edikpouwogoluk togumu, at Feliks en e,
“Is aphwami Yahudi aʼge onogola opsogo,” oluk Paulus eʼgik herle weragat ukpesi.
Currently Selected:
Peragenebesi 24: WUL
Highlight
Share
Compare
Copy
Want to have your highlights saved across all your devices? Sign up or sign in
