Peragenebesi 15
15
O Yerusalem en wene logat ʼbaligisa wene
1Ap logon o Yudea en o Antiokhia wegesarik e, Allah eiyagai eba aʼge wene disogo oluk moʼgulentigisa,
“His e, wene Musa en,
Disogo, yusogo togulom oluk moʼgulnentesi wene ano hegitsogo re, henagap heneʼgerlimu aʼge ʼbalhonobogwi erlak holuk e, henebe Allah en delhonobua erlak o,” oluk moʼgulentigisa. 2Wene asogo moʼgulentigisema, at Paulus Barnabas eʼbirek en is ap ai disogo moʼgulentigisa,
“His en egep ai modok wiagat egep o,” oluk, enemin wene ʼbalogulat, wene sorok ogulat, aʼbigat tigisa. Wene asogo sorok egesema re, is eba aʼge en e, Paulus Barnabas eʼbirek, is logon eneminat o Yerusalem legesarik e, is ap Yesus en enebe yoʼgo onoboluk peragenebesi aʼge ebano emin, is ap Allah eiyagai tenentarok welegesa aʼge emin, enemin en wene ai paget hwaluagoluk peragonobouwogoluk tigisa. 3Is Allah eiyagai en asogo egesarik peragenebegesema re, o eba en e, Fenisia en, Samaria en, lagalat e, disogo moʼgulentil legesa,
“Is aphwami oʼborl oʼgwe aʼge enebabut heberlegesarik onolukhwe Allah wogegisema o,” oluk moʼgulentil lagaimu, is Allah eiyagai eba aʼge loksogoat enagai aʼbik hegesa. 4Is ebano o Yerusalem legesema re, is ap Yesus en yoʼgo onoboluk peragenebesi aʼge ebano emin, is ap Allah eiyagai tenentarok welegesa aʼge emin, is Allah eiyagai logon eba enebe odoktugu legesa aʼge emin, enemin en, hau wusogo wogenebigisa. Wogenebigisema, is en e,
“Nis Allah emin en disogo tige, asogo tige o,” oluk wene ʼbeliʼgogo moʼgulentigisa. 5Moʼgulontogwiam, is ap Farisi aʼge Yesus iak demat oluk wegesa aʼge logon inotluk e, disogo moʼgulentigisa,
“Aphwami oʼborl oʼgwe aʼge Yesus iak wegesa aʼge eba re, enagap eneʼgerlimu aʼge ʼbalonobogulat, wene Allah en Musa yoʼgo poluk nenesaʼgo weregei wene ano tenak welat, togulom o,” oluk moʼgulentigisa. 6Asogo moʼgulentigisema re, is ap Yesus en enebe yoʼgo onoboluk peragenebesi aʼge ebano emin, is ap Allah eiyagai tenentarok welegesa aʼge ebano emin, wene ai hwaluogoluk odoktigisa. 7Asogo odoktigisarik, wene is logon en ogulat, is logon en ogulat, logat ogu legesarik, at Petrus inagarik e, disogo moʼgulentesi,
“Ap yema logwe. Narilak o. Is aphwami oʼborl oʼgwe aʼge en wene op wene enesaʼgo hologulat, onogola en demat oluk pobi togulat, tuagoluk, an pageat his henemin oruakma, is eba moʼgulentai louwagoluk Allah en poliknoboluk yoʼgo nebesi ai henaluk o. 8At Allah aphwami nenede aluk aʼge ano enat,
Yu an neiyagai o, oluk Arogun nis woknentesi ai ʼgelaʼgeat is ai ogo wogentesiat o. 9Is ogo mu ebeleat tagenebasulat, nis ogo mu ebeleat taknenebasulat, tu erlak o. We, is en Yesus iak demat oluk wegesema re, at en onogolaʼgwe hoenebegei aiat o. 10Allah en asogo tagokhwe re, his en at ebabut ʼbaluogoluk togu legep ai nopaget. Wene ai eʼgin aʼbik en e, neneʼbalak wo re, mia welegesa. Ye, nis en ogo wo mia welarat de, pobuk is Yesus iak wegesa aʼge ai wouwagoluk egep ai nopaget. 11Erlak o. At nonue ʼgain Onuk Logo aʼge Yesus ebabut op en e, nenede at ebam heʼberik pogwiam, nis delnenebiselat, is delenebiselat, nenemin hegitsogoat delnenebiso ai o,” oluk moʼgulentesi.
12Asogo moʼgulentesimu, is aphwami esan ebano eniak u erlakma en mo egesa. Asogo mo egesema, Paulus Barnabas eʼbirek en wene moʼgulontogulat e,
“Is aphwami oʼborl oʼgwe aʼge wene moʼgulontogwiam pobi tuagoluk, nis en elalinat tagonobogulat til noʼgu legerik wege ai, ebe re, Allah enat tagenebasu laga o,” oluk ʼbeliʼgogo moʼgulentasukhwe, enesaʼgo hologo welegesa. 13Wene arat moʼgulentigisema re, at Yakobus en disogo moʼgulentesi,
“Ap yema logwe. Narilak. An wene ik aʼge yu henesaʼgo hwelit o. 14Allah en is aphwami oʼborl oʼgwe aʼge enebam ede eberegeitik e, disogo egei,
Is logon an neiyagai emagoluk wogenebik o, oluk wogenebegei aʼge paget, at Simon en moʼgulnentesi ai o. 15Asogo moʼgulnentesi ai re, is ap Allah iak moʼgulontogu legesa aʼge ebano en egesa hegitsogoat moʼgulnentesi o. Is en disogo oluk pelal wegesa,
16-17Nenaik ʼgain Onuk Logo aʼge en e,
Aphwami ado pema ebe ʼberlek emin,
is aphwami oʼborl oʼgwe aʼge,
an neiyagai oluk nuʼgwarek nonuk ʼbalogo poligenebegi aʼge ai eba ʼberlek emin,
enemin laʼbuksogo enaik ʼgain Nonuk Logo aʼge an nebeat horonobuagoluk,
an nuʼgwarek pobuk weik o.
Weiktik e, o orloʼbuk osoam pobuk ʼget worogwi ai ʼgelaʼge,
Daud lak ononuk erlak aga ai,
ononuk oruagap paik o.
Moluk egei aʼge ai, an en pobuk oborlogouk erlaksogo modok wusogo pasulat, ʼgerap pasulat, tik o, oluk,
at nenaik ʼgain Onuk Logo aʼge ano ʼberlegat tago aʼge en
18asogo nenaluk emagoluk pageat moʼgulentesimu, (Amos 9:11-12)
pelal wokho pegesa ai o. 19Ai en e, an nogola re, is aphwami oʼborl oʼgwe aʼge enebabut heberlotluk, onolukhwe Allah wogogwi aʼge ai re, onogola wiagap po re, erlak epasu legi o. 20We, nis en e, wene disogo oluk pelal wokho eneʼbek perakpouwok o. Dogwi asua pam heʼberik welat uam worogwi aʼge ʼgwerik noʼgwiam enebe wiagaphorlogwi aʼge ai no mia. ʼBabi tenonto miayat. Ye, di aʼge yu aʼge oʼgorlop ʼberelogo werak aʼge noʼgulat, mep noʼgulat, tu miayat o, oluk enesaʼgo wusogo eneʼbek perakpouwok o. 21Wene Allah en at Musa moʼgulesimu, at en nenesaʼgo weregei wene ano, hwerli nenaʼbu neneʼbalak page eba enat, o da ya o aphwami Yahudi aʼge seʼban ogwiʼgwe, agauwa Allah paget weat welat nin hwedik nan hwedik wene ai onuk tualogo moʼgulontogwi aʼge oruagat o,” oluk at Yakobus en moʼgulentesi.
Wene pelal wokho is Allah eiyagai o Antiokhia aʼge eneʼbek perakpou wegesa wene
22Wene asogo egesarik e, is ap Yesus en enebe yoʼgo onoboluk peragenebesi aʼge ebano emin, is ap Allah eiyagai ʼgwelagentarok welegesa aʼge ebano emin, Allah eiyagai logon odoktak welegesa aʼge ʼberlek emin, enemin en wene disogo oluk ʼbaligisa,
“Ap nis aʼge logon pulogo yoʼgo onoboluk, Paulus Barnabas eʼbirek enemin o Antiokhia louwagoluk, peragonobouwok o,” oluk egesa. Asogo egesarik e, is Allah eiyagai logon en, at Yudas onuk mesik Barsabas ai emin, Silas ai emin,
“Enebabut op o,” oluk opogu legesa aʼge en, pelal wogo ai eneʼgikmu woluk louwagoluk yoʼgo enebegesa. 23Wene ai pam pelal wokho pogulat, disogo egesa,
“Nis henarilak honorokhwi Yesus en nenebe yoʼgo nonoboluk peraknonobou waga aʼge emin, Allah eiyagai tenentarok welege aʼge emin, nenemin en e, his o Antiokhia aʼge, Siria aʼge, Kilikia aʼge, henebe oʼborl oʼgwe aʼgeat de, Allah eiyagai aʼge nenarilak nonorokhwi, oluk hau wathenebige ai o. 24Ap nis aʼge logon his heneʼbek wegesarik e, nis en,
Wene disogo moʼgulentai lit, oluk peragonobou wom erlak aʼgeat de, is en his moʼgulhontogulat e, henede wiagaphonobogulat, henede yarluktak pogulat, tigisa o, oluk aphwami en egesema nenesaʼgo hwelige o. 25-27Nenesaʼgo hweligerik e, nenebe odoksogo welat wene ʼbalige o. Wene asogo ʼbaligerik e, Barnabas Paulus eʼbirek enebe nenede hwedik aʼge, enebe nonue ʼgain Onuk Logo aʼge Yesus Kristus paget onoboluk, waronobuogoluk tugukhweat de, at ebaget togwi aʼge enemin heneʼbek wemagoluk ap logon Yudas Silas eʼbirek yoʼgo enebegema wema ani o. Is wemarik e, wene pelal wokho pege aʼge ai enemde pam en ʼbeliʼgogo moʼgulhontouwak o. 28Nis Allah Arogun emin welat e, wene disogo oluk ʼbalige ai. Wene eʼgin aʼge moʼgulhonto mia o. We, wene yuat henesaʼgo holu o, oluk ege. 29Dogwi asua pam heʼberik welat uam warogwi aʼge ai ʼgwerik nagup erlak. Mep ai nagup erlagat o. Di aʼge yu aʼge oʼgorlop ʼberelogo werak aʼge ai nagup erlagat o. ʼBabi tenentagubat o, oluk wene ʼbalige. Asogo tu erlakma en mo ogup holuk e, his op togu legep o, oluk ul ai o. Wene ai pam arat moʼgulhentige o. Narilak norokhwi,”
oluk pelal wokho perakpou wegesa.
30Asogo pelal wokho perakpou wegesema, o Antiokhia arat wegesarik e, Allah eiyagai enebe ʼberlegat odoktagonoboluk, wene pelal wogo aʼge ano wogentigisa.
31Wogentigisema, onuk moʼgulegisarik e,
“Wene ai pam nonogola op aga,” oluk onogola enagai aʼbik hegesa. 32Onogola enagai aʼbik hegesema re, at Yudas Silas eʼbirek Allah iak moʼgulontogu legesa aʼge no oluk e, Allah eiyagai ebano enede sebelogulat, ago weragonobogulat, tuogoluk e, wene logat moʼgulontogu legesa. 33Asogo moʼgulontogwi welegesarikmu en, is Allah eiyagai o Antiokhia aʼge en e, is Yudas Silas eʼbirek hau wusogo, is enebe peragonobou wegesa aʼge ebano eneʼbek pobuk togolik peragenebegesa. [ 34Aʼge re, at Silas en e,
“An mo ik o,” oluk o Antiokhia mo egei.] 35Is Paulus Barnabas eʼbirek ogo re, o Antiokhia eba mo egesarik, is aphwami logon esanat enemin eba welat e, wene nonue ʼgain Onuk Logo aʼge iak op wene ai moʼgulontogulat, enesaʼgo worogulat, togu legesa.
Paulus Barabas eʼbirek Markus paget il-il wene ʼbaligisarik hun domok ʼbogoligisa wene
36O eba agauwa logon enemin welegesarik en e, Paulus en Barnabas moʼguleselat e,
“O da ya nonue ʼgain Onuk Logo aʼge iak moʼgulentil noʼgu legeʼgwe ebano pobuk togolik louwok o. Lagalat Allah eiyagai nenarilak nonorokhwi ebano noʼgosogo oruak oluk, o seli loʼbok nenil entil louwok o,” oluk moʼgulesi. 37Asogo moʼgulesimu, at Barnabas en e, at Yohanes onuk mesik Markus ano woluk laigoluk tegei. 38Asogo tagoma, at Paulus en e,
“Erlak o. Nis Allah paget nemin til louwogoluk legerik en e, o Pamfilia en togolik sogulogo waga ebano re, pobuk togolik woluk lul erlak o,” oluk moʼgulesi. 39Asogo moʼgulesimu, eʼbirek wene haro wiak ʼbaligisarik e, hun hunat ʼbogoligisa. At Barnabas en e, Markus woluk e, ik oloʼgwe ik so wusogo o Siprus waga. 40Wagama re, at Paulus en e, Silas yoʼgo pesirik womogoluk togumu, is Allah eiyagai o Antiokhia aʼge en e,
“Nonue ʼgain Onuk Logo aʼge ebabut op aʼge ano en wokhonoboluk louwak o,” oluk hau wusogo peragonobou wegesema wegesa. 41Is ebano wagalat e, o propinsi Siria eba en ʼbekhit o propinsi Kilikia Allah eiyagai enede ago weragenebil wegesa.
Currently Selected:
Peragenebesi 15: WUL
Highlight
Share
Compare
Copy
Want to have your highlights saved across all your devices? Sign up or sign in
