Sakaria 7

Pesombaa puasa pinesikenoako

7:1-14

1A nta'u ko'opaa poparentaano mokole Dariusu, haweomo pau-Do i Ue ndi Sakaria, a ntanggala opaa wula ko'osio, onaemo wula Kisilewi. 2Tempo atuu palilino Beteli domentenaomo i Sareseri ka i Regemi-Melekehi saru luwuno miano ka dompokomolusaako Ira i Ue aroa-Do, 3ka dompesikenoakono a luwuno sando mpesombano raha-Do Ueno luwuakoano ka a luwuno nabi, kanandio, ”Asalakonoke ka kimpengese ka mpomalia a wula ko'olima kana anu kimeweweuomo i larono mapata'u-ta'u?” 4Haweomo pau-Do Ueno luwuakoano ndi ongkue, 5”Pauako iramo luwuno palili ka a luwuno sando mpesomba, kanandio: Tempono imempuasa ka mposabangi a wula ko'olima ka ko'opitu i larono pitu pulu nta'u andio, nde mentee ntu'uke omiu mempuasaa-Kune? 6Tempono impongkaa ka tempono impo'inu, kombake impongkaa ka mpo'inu tiano koroimiu omiu-miu? 7Kombake onaemo atuu pau anu Dopohaweomo i Ue telalo a luwuno nabi anu i ndi'ipua, tempono Yerusale saru luwuno kota petengi-tengino da dompo'iangario mia ka rodo, ka Wita Nege saru Sepela da pino'iangario mbo'u?” 8Pau-Do i Ue hawe mbo'u ndi Sakaria, kanandio, 9”Kanandiomo pau-Do Ueno luwuakoano: Polempaomo songka anu mentee ka popokitaomo petenunu ka pompehohawa a mpe'asa miamu! 10Sii popokonsii tuwu beine ka nana'ote nahina amano, mia hawe ka mia mongkokolaro, ka si hina tinoo mosa'o i laro aroamu a mpe'asa miamu!” 11Sine nahi dobehe pomperio, pompembuu-mbuu ira, me'ewa ka mpompebongo-bongo kasi domporonge. 12Domeweweuo aroado motea kana watu labu, kasi domporonge pompaguru ka pau anu pinohawe-Do Ueno luwuakoano molalo Penaa-Do telalo a luwuno nabi anu i ndi'ipua. Onaemo pu'uno haweomo tekuda anu mongkokongiri inso ndi Ondae i Ue. 13”Mengkena kana nahi domperorongeakono tempono domempinoboi, kanatuumo mbo'u Ongkue nahi Kuperorongeakono i tempono dompepoboi, pau-Do Ueno luwuakoano. 14Onaemo pu'uno Kusiarawoako ira angi lompiu i olodo luwuno tongku anu nahi domento'orio. Sa'umarino wita atuu gagi boni-boni, ranta nahina anu wela telalo i ra'ai. Kanandiomo domeweweuo wita anu tekosi atuu gagi po'ianga anu boni-boni.”

Currently Selected:

Sakaria 7: XMZ

Highlight

Compare

Copy