Sakaria 1

LUWUNO ANU KINITA

LAMORO 1–8

Petena ka dontepidi

1:1-6

1 # Esr. 4:24–5:1; 6:14 I larono wula ko'oalu a nta'u ko'orua poparentaano i Dariusu, haweomo pau-Do i Ue ndi nabi Sakaria anano i Berekia anano i Ido, kanandio, 2”Ondae i Ue tedoa Ira tekuda a uempu'umu. 3Onaemo pu'uno, pauako iramo: Kanandiomo pau-Do Ueno luwuakoano: Impepokulemo ndi Ongkue, kanandiomo pau-Do Ueno luwuakoano, ka Ongkue mbo'u mepokule ndi omiu, pau-Do Ueno luwuakoano. 4Siimo imengkana uempu'umiu anu dompopoto'oriako ira nabi anu i ndi'ipua, kanandio: Kanandiomo pau-Do Ueno luwuakoano: Impepokulemo inso a mpelelumiu anu mosa'o ka wineweumiu anu mokoburu! Sine nahi domebehe merongeo ka nahi domebehe mperio Aku, kanandiomo pau-Do i Ue. 5Isua irake uempu'umiu? Ka luwuno nabi, nde mentuwu ira hawe nahina tampulaano? 6Sine pau ka pompakosi-Ku anu Kuparentaako iramo luwuno tetenaa-Ku, luwuno nabi, kombake atuu i'alu iramo uempu'umiu? Komba ntepidi irake saru mpotae: kanamo tinoo-Do Ueno luwuakoano Ira weweuo ndi ontae menunu saru pelelu ka wineweuto, kanandiomo Dopoweweu ndi ontae?”

Pongkita amba-ambano: anu mesawi a ngara

1:7-17

7A oleo korua pulu ka opaa wula Siebati, wula kohopulu ka asa, a nta'u ko'orua poparentaano i Dariusu, haweomo pau-Do i Ue ndi nabi Sakaria anano i Berekia anano i Ido, motae, 8#Meng. 6:2, 4”Hieno wongi mohawe aku aasa pongkita: tengkitaomo asa mia anu mesawi a ngara motaha! Onae mentade i olono keu muradi anu a laro wingke; ka i bungkuno hadio ngara anu motaha, anu motaha-taha ka anu mopute. 9Ka ku'amba mesikeno: Hapa pengkonaano luwuno andio, oo Ueku? Sumangki mala'eka anu mepau ndi ongkue: ’Aku koa mopokitao ndi omue hapa pengkonaano luwuno andio!’ 10Mia anu mentade i olono keu muradi atuu sumangki, ’Ondaemo andio anu tinena-Do i Ue lumako sumompoo tolino!’ 11Ka do'amba mpotae a Mala'eka-Do i Ue anu mentade i olono keu muradi atuu, ’Kimesompoomo tolino, ka menteeano asa wawontolino atuu mpenoro-noro koa ka rodo.’ 12Sumangki Mala'eka-Do i Ue, ipotae, ’Oo Ueno luwuakoano, hawe te'ipia mbo'u nahi Ipehohawao Yerusale ka luwuno kota Yehuda anu Itekudaako iramo i larono opitu nta'u andio?’ 13Ka i'amba Ondae i Ue sumangkiako pau anu mauru ka anu montarero a mala'eka anu mepau ndi ongkue atuu. 14Ka i'amba mala'eka anu mepau saru ongkue atuu motae ndi ongkue: Peboolimo kanandio: Kanandiomo pau-Do Ueno luwuakoano: ’Aroa-Ku tedoa mawongkoakono Yerusale ka Sioni. 15Sine tedoa langkai tekuda-Ku a luwuno tongku anu rumasao koroino roodo. Tempono nahi Kutekuda lahi ndi ondae, luwuno tongku atuu mpotiangi marasaiado. 16Onaemo pu'uno, kanandiomo pau-Do i Ue, Aku wali mehohawao Yerusale. Raha-Ku ta pinontade mbo'u i ra'ai, kanandiomo pau-Do Ueno luwuakoano, ka koloro posongka ta pinadindi mbo'u i Yerusale.’ 17Umarino atuu pebooliakonomo kanandio: Kanandiomo pau-Do Ueno luwuakoano: Luwuno kota-Ku ta hadioako mbo'u anu moiko. Ondae i Ue Ira tumareroo Sioni ka wali binikio Yerusale.”

Pongkita ko'orua: opaa tandu ka opaa puu mpolabu

1:18-21

18Mengkita aku ngkoraane ka kukitaomo opaa tandu. 19Ka ku'amba mesikeno a mala'eka anu mepau ndi ongkue atuu, ”Hapa pengkonaano luwuno andio?” Sangkino ndi ongkue, ”Onaemo andio luwuno tandu anu sumiarawo ira Yehuda, Isaraeli ka Yerusale.” 20Ka i'amba Ondae i Ue mopokitao ndi ongkue opaa puu mpolabu. 21Mesikeno aku, ”Me'aiwa ira mpoweweu hapake mia andiodo?” Mala'eka atuu sumangki, ”Luwuno tandu atuu onaemo anu sumiarawo iramo Yehuda, ranta nahina maupo te'asa mia mosia tumandeo uluno. Luwuno mia andio me'aiwa weweu ira ka domedoito, ka metadiakono tandudo luwuno tongku anu tumandeo tanduno a wita Yehuda ka sumiarawo ira.”

Currently Selected:

Sakaria 1: XMZ

Highlight

Compare

Copy