Po'unde-unde 89
89
Isuake pompehohawa-Do i Ue anu nahi bali ndi Daudi?
89:1-53
1 #
1Mok. 4:31
Penani pompaguruno i Etani, to Eserahi.
2Aku menaniako mpiha luwuno pompehohawa-Do i Ue anu nahi bali,
mopoto'oriakono ngangaku petenunu-Miu mapa'api-api inule.
3Menteeano kupotae: Pompehohawa-Miu anu nahi bali winangu ranta nahina tampulaano;
petenunu-Miu nahi telelu kana langi.
4 #
2Sam. 7:12-16; 1Taw. 17:11-14; Pud. 132:11-12; Tin. 2:30 ”Kuwutuomo pedandia saru mia bininiki-Ku,
mesumpa Akumo ndi Daudi, tetenaa-Ku:
5Ranta nahina tampulaano Aku tumeahakono inulemu,
ka mokorosoo kadera poparentaamu mapa'api-api inule.” Sela
6Po'ineeomo langi ka ipaleleo luwuno pabawa-Miu, oo Ue,
ka petenunu-Miu a laro tepumpuado anu mempori.
7Nde isemake a laro nseru anu mengkena saru Ondae i Ue,
anu mengkena kana Ondae i Ue i olono luwuno pinesombai?
8Ondae Ue Ala atuu mongkokongiri i olodo anu mempori,
maramba ka mongkokodoito lumaloio luwuno anu kongko a mpehori-hori-Do.
9Oo Ue, Ue Alano luwuakoano, isemake anu moroso kana Omiu, oo Ue?
Petenunu-Miu kongko a mpehori-hori-Miu.
10Omiumo anu parentao pebundeno tahi anu tedoa mompelangka-langkai,
tempono dopewuatako bombano, Omiu koa mbo'u anu mokotemontoo.
11 #
Yes. 30:7; 51:9 Omiumo anu piregoo i Rahabi kana mia anu monsumbele,
saru kae-Miu anu moroso sumiarawoo iwali-Miu.
12Omiu koa me'ueo langi, Omiu koa mbo'u me'ueo tolino,
wawontolino saru ihino Omiu koa mokogagio.
13Utara ka selata, Omiu koa anu mokogagio.
Tabori ka Heremoni kokora-kora mo'unde hangano Omiu.
14Omiu koa me'ueo tokia anu moroso,
kae-Miu moroso ka kae ngkoana-Miu tetande mantande.
15Moleoa ka songka onaemo pentadeano kadera poparentaa-Miu,
pompehohawa ka petenunu melempa i aro-Miu.
16Me'uraomo tongku anu monto'ori kokora-kora mo'unde,
oo Ue, ondae mentuwu a laro wantano rupa-Miu;
17hangano nee-Miu ondae mengkokora-kora hawe sumoo oleo,
ka hangano moleo-Miu mpo'unde ira.
18Hangano Omiu koa marambano rosodo,
ka hangano Ipemoikoo Itiangio tanduno rosomami.
19Hangano kantato Ondae i Ue me'ueo,
ka mokoleto Anu Tedoa Mempori me'ueo, Ue Alado to Isaraeli.
20Hori Komiu mepau a laro pongkita
a luwuno mia anu pinehohawa-Miu. Omiu mepau,
”Kutulungiomo asa mia pongkiari,
mokomantandeomo asa mia bininiki inso i olodo tongku atuu.
21 #
1Sam. 13:14; 16:12; Tin. 13:32 Kuhaweomo i Daudi, tetenaa-Ku;
Ku'urapiakonomo lana-Ku anu mempori,
22ka kae-Ku kukongkomio mpiha,
tendeano tokia-Ku mokorosoo.
23Nahi ira menangio iwali,
ka nahi ta mokonsiio mia lambaha.
24Aku rumawo-rawo ira iwalino inso i arono,
ka ondae anu me'o'aliaakono Aku mepate ira.
25Mentee-Ku ka pompehohawa-Ku anu nahi bali kumongkomio,
ka hangano nee-Ku tandu rosono ta tetiangi.
26Aku weweuo kaeno pabawaio tahi,
ka kae ngkoanano pabawai ira korono.
27Onae ta moboi Aku, ’Omiumo Amaku,
Ue Alaku, torukuno watu tekaduduiku.’
28 #
Meng. 1:5
Aku tumandeo mbo'u gagi ana aka,
gagi anu tedoa mantande i olodo luwuno mokole ntolino.
29Onae Aku koa mehohawao mpiha ranta nahina tampulaano,
ka pedandia-Ku moroso ndi onae.
30Aku tumeahakono inuleno anu moparenta ranta nahina tampulaano,
ka kadera poparentaano asa ntinuwuno langi.
31Tewala inuleno mebintao Songka-Ku
ka nahi domentuwu montonda songka-Ku,
32tewala nahi domentondao pompakosi-Ku
ka nahi dompe'ini a luwuno parenta-Ku,
33asalakono pe'ewado Aku humukuakono tuko
ka tumunduhi ira hangano salado.
34 #
2Sam. 7:14-15
Sine Aku koa mehohawao mpiha
ka petenunuKu nahi Aku balio.
35Nahi Aku lumimpaio pedandia-Ku,
ka pinauno wiwi-Ku nahi Aku balio.
36Pohona Kupesumpa a mempori-Ku,
manasa nahi Aku megaupi ndi Daudi:
37Inuleno anu moparenta ta kongko ranta nahina tampulaano,
ka kadera poparentaano ta moroso kana mata'oleo i aro-Ku,
38moroso nahina tampulaano kana wula,
sakosii nahi bali a laro nseru.” Sela
39Sine Omiu isa'a nahi tarimao ka tumadio,
gagi bamburu a mia anu inurapi-Miu,
40balio pedandia saru tetenaa-Miu,
kumokoburutio ranba-ramba uluno a laro pampawu,
41umaluo luwuno pekorahakoano,
weweuo luwuno benteno gagi howuno anu terawo.
42Luwuno mia anu telalo a nsala merontuo,
ka onae gagi tataado pehori rahano.
43Iweweuomo kae ngkoanado iwalino monangi,
Iweweuomo luwuno iwalino memawongko.
44Mata mponaino mbo'u Iwolilio ndi onae,
ka nahi Ipokowalio a laro mpe'iwalia.
45Itompaakonomo pabawano anu maramba,
ka kadera poparentaano Ipepasiakono a wita.
46Ipoko'owowao tuwu mongurano,
Itutuwiakono mokoko'ii. Sela
47Opia mbo'u tehineno, oo Ue, Ipewuni mpiha,
tekuda-Miu kolanga-langa kana api?
48Irambeomo kana hapa tinuwuku andio,
nahina ntu'u tuduno Ipokogagio luwuno anano mia!
49Isemake anu polio tuwu mpiha ka nahi pembasaio matea,
anu polio motolao penaano inso a mpabawano tolinodo mia mate? Sela
50Isuake tondonino pompehohawa-Miu anu amba-ambano, oo Ue,
anu Idandiakonomo sumpa ndi Daudi a mpetenunu-Miu?
51Irambeomo, oo Ue, pontata a luwuno tetenaa-Miu,
anu tinembiku a laro radaku inso a luwuno tongku.
52Luwuno iwali-Miu mpotata, oo Ue,
mentatao pelempano mia anu inurapi-Miu.
53Inunde-unde Iramo i Ue ranta nahina tampulaano!
Ami, ami.
Currently Selected:
Po'unde-unde 89: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
