Po'unde-unde 86
86
Pekakai mo'ema pompehohawa nahi bali
86:1-17
1Pekakaino i Daudi.
Ita'oomo biri-Miu, oo Ue, Isangki akumo,
hangano marasai ka mongkokolaro aku.
2Dagaiomo tuwuku, hangano metenunu aku,
Ikaduduiomo tetenaa-Miu anu mompe'ala-ala ndi Omiu.
3Omiumo Ue Alaku, Ipehohawa akumo, oo Ue,
hangano ndi Omiumo kupebooli hawe sumoo oleo.
4Ipokomawongkoomo aroano tetenaa-Miu,
hangano ndi Omiumo, oo Ue, kutandeo aroaku.
5Hangano Omiu, oo Ue, moiko ka behe mo'ampuni
ka hadio ntu'u pompehohawa nahi bali a luwuno mia anu mebooli ndi Omiu.
6Ita'oomo biri a mpekakaiku, oo Ue,
ka Iperioomo pau po'emaku.
7A oleo pompema'isoku mebooli aku ndi Omiu,
hangano Isangki aku.
8Nahina kana Omiu i olono luwuno pinesombai, oo Ue,
ka nahina kana hapa anu wineweu-Miu.
9 #
Meng. 15:4
Luwuno tongku anu pinokogagi-Miu ira mehawe
mpengolontu mpesomba i aro-Miu, oo Ue,
ka ira mpelangkaio nee-Miu.
10Hangano langkai Komiu ka weweu ira anu mengkinohali-haliako,
butu koa Omiu Ue Ala.
11Itisoakunemo pesalaa-Miu, oo Ue,
ka kutuwu montonda mentee-Miu;
Ipokobobotoliomo aroaku dumoitoakono nee-Miu.
12Aku umunde-unde Komiu, oo Ue, Ue Alaku, tompaano aroaku,
ka melangkaio nee-Miu ranta nahina tampulaano;
13hangano langkai ntu'u pompehohawa-Miu nahi bali ndi ongkue,
ka ipotolaomo penaaku inso a laro ntolinodo mia mate.
14Oo Ue Ala, mia mpompelangka-langkai mpentade iramo mensapoi aku,
ka gerombolano mia mpompelangka-langkai mpomporaakono penaaku,
nahi domperio Komiu.
15Sine Omiu, oo Ue, Ue Ala me'aroa ka mompehohawa,
tedoa sabara ka hadio ntu'u pompehohawa ka pokongkomi.
16Ipewolilimo ndi ongkue ka Ipehohawa akumo,
Ipoweeakonomo roso-Miu a ntetenaa-Miu,
ka Ikaduduiomo anano tetenaa-Miu beine!
17Iweweuomo ndi ongkue asa petondoni moikoa,
ka domengkitao mia anu umo'aliaakune
ka gagi memokoko'ii, hangano Omiu, oo Ue, Itulungi akumo ka tumarero aku.
Currently Selected:
Po'unde-unde 86: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
