Po'unde-unde 66
66
Po'undeakono wineweu-Do Ue Ala anu mongkokongiri
66:1-20
1Tiano petewawado anu mpenani. Penani Po'unde-unde.
Kokora-koramo po'undeako Ira Ue Ala, hei luwuno ihino tolino,
2penanimo unde-undeo marambano nee-Do,
pelangkaiako Iramo po'unde-unde!
3Pepaumo ndi Ondae Ue Ala, ”Tedoa mongkokongiri luwuno wineweu-Miu;
hangano pabawa-Miu anu tedoa langkai luwuno iwali-Miu mpetuundu ndi Omiu.
4Luwuno ihino tolino mpenggolontu mpesombai Komiu,
ka mpenani umunde-unde Komiu, menani umunde-undeo nee-Miu.” Sela
5Lakomo ka kitaomo wineweu-Do Ue Ala;
Ondae mongkokongiri a laro wineweu-Do a mia:
6 #
Pel. 14:21; Yos. 3:14-17 Dobalio tahi gagi wita motu'i,
ka ondae mensakio korono saru mpelempa karu.
Onaemo pu'uno aiwamo tomemawongko hangano Ondae,
7anu moparentaako roso ka mosia anu nahina tampulaano.
Mata-Do moposooo luwuno tongku,
ka si dompompelangka-langkai anu me'ewa. Sela
8Unde-unde Iramo Ue Alamami, hei luwuno tongku,
ka impoporongeako Iramo po'unde-unde!
9Ondae weweu kami kongko mentuwu
ka nahi po'ineeo karumami telelu.
10Hangano I'arahako kamimo, oo Ue Ala,
mokomorina kamimo, kana mia mompokomorina salaka.
11Iwinso kamimo a laro buani,
mompokona tembia a ntongamami;
12Ipo'inee iramo mia ntelaloio ulumami,
mpolalo kamimo api ka uwoi;
sine Iluarako kamimo ka mompowee koloaa.
13Aku mewinso a laro raha-Miu saru mowawa pesomba tinunu,
aku umowahio pontangaku ndi Omiu,
14anu ipauomo wiwiku,
ka pinauno ngangaku i tempono kumasusa.
15Luwuno pesomba tinunu inso a kondehora mewalo ta pinesombaako ndi Omiu,
saru ahuno pesomba inso a bimba lakino;
aku patinda ira sapi ka bembe lakino. Sela
16Aiwamo, rongeomo, hei luwumiu anu doitoako Ira Ue Ala,
aku tumutuluo
hapa anu wineweu-Do a ngkoroiku.
17Ndi Ondae mebooli akumo saru ngangaku,
kanandioandio saru eloku kupenaniako po'unde-unde.
18Ande-andeno hinao tinoo mosa'o i laro aroaku,
manasa Ondae i Ue nahi Dobehe rumongeo.
19Sine Ondae Ue Ala mentee ntu'u Dorongeomo,
Doperioomo pekakai anu pinauku.
20Inunde-unde Iramo Ue Ala, anu tumarimao pekakaiku
ka nahi poko'olaio pompehohawa-Do inso ndi ongkue.
Currently Selected:
Po'unde-unde 66: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
