Powadi 9
9
Inoluno ponto'ori anu mentee ka inoluno benge-bengea
9:1-18
1Ponto'ori anu mentee mowanguomo rahano,
montadeo opitu karuno,
2sumampao pinotuwu sinumbeleno, monsalo anggorono,
ka mompatinda kaangano.
3Luwuno puu pompekakaako beine itena iramo mpeboo-booli
a luwuno po'ianga mantande a ngkota,
4”Isema anu napi hina pinembasaino, tetoromo ramai”;
ka anu nahi molino pinewowolono, ipotae,
5”Aiwamo, pongkaamo rotiku,
ka inuomo anggoro anu kusaloomo;
6tadiomo benge-benge, ka komiu mentuwu,
ka tondaomo pesalaano ponto'ori.”
7Isema mompaguru asa mia anu mompasinggiri, moweweu pasinggiriano koroino onaeno,
ka isema anu mongkuahako mia mosa'o gauno, mohawe pontetewehi.
8Si pongkuahako mia mompasinggiri ka si o'aliaakomu,
kuahakonomo mia pande mosongka, ka ta mehohawako.
9Poweeakonomo patudu mia pande mosongka, ka onae ta gagi lalu pande mosongka,
paguruomo mia mentee, ka ponto'orino ta tetiangi.
10 #
Ayb. 28:28; Pud. 111:10; Pow. 1:7 Pompu'uano ponto'ori anu mentee onaemo doitoako Ira i Ue,
ka tumo'ori Ira Anu Tedoa Mempori onaemo ponto'ori.
11Hangano, ongkue tinuwumu pinokomelai,
ka luwuno ta'u tuwumu tiniangi.
12Tewala omue pande mosongka, pandemu mosongka atuu tiamu omuemu,
tewala omue mompasinggiri, omue isa'a anu kotumembio.
13Beine monge-monge atuu hadio mpau,
tedoa napi hina pinembasaino, ka nahi ponto'ori hapa-hapa.
14Onae mentoro i arono pewowano rahano
a wawo ngkadera a luwuno po'ianga mantande a ngkota.
15Luwuno mia anu telalo a nsala,
anu moleo pelempano i'oluakono pau,
16”Isema napi hina pinembasaino, tetoromo ramai”;
ka a mia anu nahi molino pinewowolono, ipotae,
17”Uwoi pinonako mo'ahi,
ka roti anu kinaa mewuni-wuni mo'ahi namino.”
18Sine, mia atuu nahi to'orio nine i ra'ai mekongko ira onitu,
ka nine luwuno mia anu inolu atuu kongko i tolinodo mia mate.
Currently Selected:
Powadi 9: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
