Powadi 7
7
1Hei anaku, pe'inimo a mpauku,
ka naaomo parentaku i laro aroamu.
2Pe'inimo a parentaku, ka omue ko tuwu;
naaomo pompaguruku kana ihi matamu.
3Tanggoomo luwuno atuu a wunga ngkaemu,
ka buriomo atuu i laro aroamu.
4Potaemo a ponto'ori anu mentee, ”Omuemo pepaekompoku”
ka pauomo ponto'ori atuu pe'etumu,
5ka ikaduduiko inso a beine belesu,
a beine lansara, anu hadio pauno.
6Hangano tempono kupengkita-kita,
inso a ntaraliku, inso a pentangoano rahaku,
7kukitao i olodo anu napi hina pinembasaido,
kuhaweo i olodo mia mongura asa ana ntama kontuwuano anu nahi molino pinewowolono,
8anu me'asambaliako umpeda siuno sala,
ka i'amba melempa me'aro a rahano beine atuu,
9i tempono tekamburi, ngkiniwia,
a wongi anu wongi-wongi.
10Aiwaomo asa mia beine tumotowoo,
mesangka belesu saru aroa mpe'akala;
11hadio mpau ka lansara beine andio,
karuno nahi pokorodo i raha,
12kanandio andio onae a nsala, te'ingka mbo'u a ntanalapa,
umpeda sompo pelengkua onae metowoki.
13Ka i'amba i'iniomo ana ntama kontuwuano atuu ka iwoo-wooo,
saru rupa mokapa ipotaeakono,
14”Asalakono aku mompesombaako pesomba tekaduduia,
ka a oleo andio ku'owahiomo tinangaku atuu.
15Onaemo pu'uno ka kupeluarako tumotowoko,
aku umungkeko ka kanandio-andio kuhaweko.
16Kuwileomo umpeo tekosi a wawo mpoturiaku,
sawu lena mperupa-rupa sorano inso i Masiri.
17Pepomboleaku kuporawoakonomo
mire, gaharu ka keu mo'ahi.
18Aiwamo topotendeo tesingka hawe mo'oru,
ka meronga-ronga menamio pompesanaa.
19Hangano tamaku nahi kongko i raha,
onae tekonai a laro pelempaa olai.
20Asa kadu-kadu doi winawano,
da saraipo ipekule tamo hawe wulantii.”
21Mia mongura atuu ipopandeiakono mperupa-rupa pompopandei,
saru pandeno wiwi mepau i'oluakono.
22Mepobingko mia mongura atuu tumondao
kana sapi anu winawa a mposumbelea,
ka kana mia benge-benge anu tepongu ta hinuku,
23hawe ana mpana lumompahio aroano;
kana manu-manu montuturako te'aro a mporakoa,
nahi pokonto'orio nine tuwuno ta masolaa.
24Onaemo pu'uno, hei nana'ote, ronge akumo,
pekokoongakonomo pinauno ngangaku.
25Si pelengkuako aroamu a luwuno pesalaano beine atuu,
ka si pokontesaao koroimu a ntelaloano.
26Hangano hadioomo anu mobela pinepateno,
tedoaomo hadio mia anu pinepateno.
27Rahano onaemo pesalaa lumako a ntolinodo mia mate,
anu metii a luwuno bolongko matea.
Currently Selected:
Powadi 7: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
