Powadi 31
31
Powadi tiano i Lemueli inso ndi ineno
31:1-9
1Ndiomo pauno i Lemueli, mokole i Masa, anu ipaguruakono ineno.
2Hapa anu aku pauo, anaku, ana ngkoroiku,
ana tinangaku?
3Rosomu si weeakono beine,
ka pesalaamu a luwuno beine anu mpepate ira mokole.
4Nahi pototono mokole, hei Lemueli,
nahi pototono mokole mo'inu anggoro,
ke maupo a luwuno anu langkai potorono mosisiriakono inua mokora,
5ka si mansa hangano inua ikolupeo hapa anu pinakosiomo,
ka melengkuakono tiado mia anu ntepokonsii.
6Inua mokora weeakonomo mia anu ta mate,
ka anggoro a mia anu masusa aroa.
7Po'ineeomo ipo'inu ka ikolupeo mongkokolarono,
ka nahi pewowoloo mbo'u masusano.
8Ungkahiomo ngangamu tiano mia anu beebe,
tiado luwuno mia anu tepo'inee.
9Ungkahiomo ngangamu, alaomo pomputusi anu moleo
ka alaakonomo tiano mia anu tepokonsii ka anu mongkokolaro.
Po'unde-unde tiano beineno anu pande
31:10-31
10Beineno anu pande isemake ta humaweo?
Onae masuliopo olino sekonopo paramata.
11Aroano tamano me'ala-alao,
tamano nahi ta makuraako me'uraa.
12Onae moweweu moiko a ntamano ka nahi poweweu anu mosa'o
asa ntinuwuno.
13Onae mo'ungke wulu bimba ka tembi,
ka sanaa mo'anggaako kaeno.
14Onae kana kapalado puu mpebalu-balu langkai,
inso olaiano ipowawa kaangano.
15Onae mewangu tempono da wongi-wongi,
ka i'amba patindao kaangado pe'asa rahano,
ka tumia-tiao anggaa a luwuno puu pompekakaakono beine.
16Onae mo'oli lere anu ineheno,
ka inso a hasilino kaeno onae moweweu lere anggoro.
17Tongano ibooakono rosono,
ipokorosoo tokiano.
18Ito'orio nine usahano hinao untuno,
i tempono wongi pelitano nahi mate.
19Kaeno inaao a roda mpohoru,
wunga ngkaeno mo'ini pongkalulu bana.
20Kaeno iweeakono anu tepokonsii,
tumasiakono kaeno a mia anu mongkokolaro.
21Onae nahi danggaraakono pe'asa rahano tempono metii seru baku,
hangano luwuno ihino rahano mpesangka rua api.
22Onae moweweu umpeo tekosi tiano koroino,
lena alusu ka sawu wungo sangkano.
23Tamano tino'ori a mpewowa langkai
tempono mentoro mperonga-ronga luwuno mia memota'uno wita atuu.
24Onae moweweu sangka inso a lena ka umasao,
onae mompatinda peboo ntonga a mia mpebalu-balu.
25Roso ka pompelangkai gagi pesangkano,
onae mengingisi mongkona oleo lembuino.
26Ngangano i'ungkahiakono ponto'ori anu mentee,
pompaguru petenunu mompehohawa kongko a elono.
27Onae paresao luwuno orusua a nsomborino,
kaanga moluwea nahi kaano.
28Luwuno anano mpewangu, ka mpotaeakono me'ura,
tamano mbo'u umunde-undeo,
29”Hadio beine pande mpo'angga,
sine omue lumaloi ira luwu.”
30Tekosi atuu mompopo'oo ka tekosia nahina tuduno,
sine beineno anu doitoako Ira i Ue inunde-unde.
31Weeakonomo tia inso a hasilino kaeno,
po'ineeomo wineweuno umunde-undeo a mpewowa langkai!
Currently Selected:
Powadi 31: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
