Powadi 29
29
1Isema me'ulu watu, maupo mohaweomo pongkuahako,
ta mepobingko sinolangi ka nahi pinokompomule mbo'u.
2Tewala mia mentee tetiangi hadio, mpo'unde iramo palili,
sine tewala mia mosa'o gauno moparenta, pompau iramo pinemasusado palili.
3Mia anu mongkekewoi ponto'ori anu mentee mokomawongkoo amano,
sine isema anu mebawaa saru beine belesu mopingko arataa.
4Saru moleoa mokole kumorahakono wita,
sine mia anu motuntu hadio sima'ulu kumale-kaleo.
5Mia anu wela mo'ungke ura a mpe'asa miano
mompadindi oho i arono karuno.
6Mia anu moweweu mosa'o te'ohoako polimpa'ino,
sine mia mentee ta kumora ka mo'unde.
7Mia mentee tumo'orio tiano mia molema,
sine mia mosa'o gauno nahi pokonto'orio.
8Anu mompasinggiri mokomarisuo kota,
sine mia pande mosongka mokomorinio tekuda.
9Tewala mia pande mosongka mekara-kara saru mia benge-benge,
mia benge-benge andio momemu ka mengingisi, onaemo ka nahina rodoa.
10Mia anu mokorangaako rea umo'aliaakono mia moleo,
sine mia anu moleo aroano merioo penaano.
11Mia monge-monge motiio luwuno tekudano,
sine poko'ariano mia pande mosongka mokomorinio.
12Tewala anu moparenta metondaio pegaupi,
luwuno pegawaino gagi mosa'o gaudo.
13Mia mongkokolaro ka anu mompokonsii hinao pengkenaado:
Ondae i Ue moweeako ira wanta a matado orua ira.
14Mokole anu mobitara mia molema a moleoa,
kadera poparentaano moroso mpiha ranta nahina tampulaano.
15Tuko ka pongkuahako mowawa ponto'ori anu mentee,
sine ana anu pino'inee ta mokoko'iio ineno.
16Tewala mia mosa'o gauno tetiangi, tetiangiomo mbo'u polimpa'ia,
sine mia mentee ta kumitao tedontaado.
17Paguruomo anamu, asalakono onae ta moweeakomu rodoa,
ka mokomawongkoko.
18Tewala nahina mengkaaa, gagiomo mo'ila palili.
Me'uraomo mia anu me'ini a songka.
19Butu koa saru luwuno pau asa mia ata nahi pinokopaguru,
hangano maupo ipokonto'orio, nahi perioo.
20Ukitao mia anu magasi mepau?
Hadioopo pomperorohino mia monge-monge sekonopo a mia atuu.
21Isema metondaio atano mompu'u da imongura,
poko'ariano mokogagio motea ulu.
22Anu mara ntekuda moweweu pe'u'uaa,
ka mia anu liu tekuda, hadio polimpa'ino.
23Pompelangka-langkai mompe'uru-uru mia,
sine mia anu me'urumako, montarima po'unde-unde.
24Isema montarima tia inso a mia monako, umo'aliaakono koroino;
irongeomo pontotonaa ka ipesakosii, sine nahi pompau.
25Doito a mia mowawa oho,
sine isema me'ala-ala Ira i Ue, kinadudui.
26Hadio mia mepeto'ori a anu pabawa,
sine inso ndi Ondae i Ue mia montarima moleoa.
27Mia mentee mokoburuakono mia benge-benge;
mia mosa'o gauno mokoburuakono anu moleo pesalaano.
Currently Selected:
Powadi 29: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
