Powadi 23
23
1Tempono omue mentoro mongkaa saru asa mia langkai potorono,
pekokoongakono temoiko hapa anu hina i aromu.
2Naaomo asa piso a we'umu,
tewala langkai aroamu mingki mongkaa!
3Si mosisiriakono kaanga anu mo'ahi,
onaemo atuu kaanga pinatinda anu mompopo'oo.
4Si pe'isei ka ugagi kaea,
bintaomo tinoomu andio.
5Tewala upepenteeo, onae moliu,
hangano onae mansa mepani,
ka i'amba menee i laro meene kana rajawali.
6Si pongkaa rotino mia anu modoko,
si mosisiriakono kaangano anu mo'ahi.
7Hangano kana mia anu moweweu poreke a ngkoroino, kanatuumo onae.
”Pongkaamo ka po'inu,” ipotae ndi omue,
sine aroano nahi bobotoli ndi omue.
8Asasumpu anu kinaamu kolumuao,
ka luwuno paumu anu mo'ahi utadi-tadio.
9Si pepau a birino mia monge-monge,
hangano ta meruanahio luwuno paumu anu pande mosongka.
10Si limbao tidano wita anu tehine,
ka mewinsokio lereno nana'ote nahina amano.
11Hangano pontolosido moroso,
Ondaemo anu umala-alaakono kara-karado umewaiko.
12Po'aroomo pinewowolomu a pompaguru,
ka birimu a luwuno pau ponto'ori.
13Si o'ondahao paguruo anamu;
nahi ta mate tewala usepiakono lauro.
14Omue sumepiakono lauro,
sine penaano ukaduduio inso a ntolinodo mia mate.
15Hei anaku, tewala aroamu pande mosongka,
aroaku mbo'u mawongko.
16Sumangaku mo'unde,
tewala wiwimu mompau anu moleo.
17Si mosisiri aroamu a mia anu ntehala,
sine doitoako Iramo mpiha i Ue.
18Hangano oleo lembuiano mentee ntu'u hinao,
ka pomperorohimu nahi ta tetadi.
19Hei anaku, rongeomo, ka gagimo pande mosongka,
po'aroomo aroamu a mpesalaa anu mentee.
20Omue si kongko i olodo anu mpo'inu anggoro
ka mangoso mongkaa bau.
21Hangano mara mpo'inu ka mangoso mongkaa gagi mongkokolaro,
ka mongkokoturi weweuo mia mesangka teberi-beri.
22Rongeomo amamu anu me'anaakomu,
ka si pokongkodeio inemu tewala mota'uomo.
23Oliomo menteea ka si asao;
kanatuu koa mbo'u ponto'ori anu mentee, pompaguru ka ponto'ori.
24Amano asa mia anu mentee ta kokora-kora;
anu me'anaako ira mia anu pande mposongka ta mo'unde hangano onae.
25Po'ineeomo ka dopo'unde amamu ka inemu,
po'ineeomo ka imawongko onae anu me'anaakomu.
26Hei anaku, weeakunemo aroamu,
po'ineeomo matamu sanaakono luwuno pesalaaku.
27Hangano beine belesu onaemo aa anu ondalo,
ka beine lansara onaemo sumuru anu ma'iso.
28Tendeano, kana puu porontu ipontowoki,
ka mokohadioo anu mohapu pedandia i olodo mia.
29Isema mompe'adodo? Isema mompemasusa?
Isema mengenge? Isema moluarako pinemasusano?
Isema mobela nahina pu'uno? Isema motaha matano?
30Ondae atuu anu mpentoro-toro saru anggoro hawe tehine wongi,
ondae anu mehawe mpo'inu anggoro sinalo.
31Si kitao anggoro butu hangano motaha,
mangkilo a laro sangkiri,
ka waa mewinso saru menami,
32sine lembuino metungku kana ule,
ka mewurosiako ipo kana ule mo'ito.
33Ka i'amba matamu ta kumita ira anu kinohali-haliako,
ka aroamu pau ira pau anu nahi te'atora.
34Omue kana mia i tongano bombano tahi,
kana mia a wawo karuno sombano kapala.
35Omue komotae, ”Mia sumepi aku, sine nahi kupompemahaki.
Mia tumunduhi aku, sine nahi kupembasaio.
Te'ipiake kupekaangako?
Aku mo'ungke mbo'u anggoro.”
Currently Selected:
Powadi 23: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
