Powadi 18
18
1Mia anu mo'ia asa-asano, mo'ungke ineheno,
mosa'ono aroano mansa gagi a sompo pontimbanga.
2Mia monge-monge nahi behe a ponto'ori,
butu ineheno popauo ihino aroano.
3Tewala hawe gau mosa'o, haweomo mbo'u pompokongkodeia
ka mokoko'iia tinondaako pompasinggiri.
4Pepauno ngangano mia kana uwoi anu ondalo,
sine pepu'uano ponto'ori anu mentee kana korono anu bubulaka.
5Nahi moiko me'alaako a mia mosa'o gauno
ka mia mentee nahi tinarima a mpebitaraa.
6Wiwino mia monge-monge mompokohina pe'u'uaa,
ka ngangano mebooli mo'ema petunduhi.
7Mia monge-monge pinepate hangano ngangano,
wiwino onaemo ohono penaano.
8Pauno anu mompau nahi mentee kana kaanga mo'ahi,
anu mewinso a laro kompo.
9Mia anu meluweki a laro mpo'anggaano
gagiomo pepaekompono anu monsolangi.
10Nee-Do i Ue onaemo menara anu moroso,
i ra'aimo polaiano mia mentee ka itekadudui.
11Kota anu moroso a mia kaea onaemo arataano
ka kana rere watu anu mantande montonda potaeno.
12Pompelangka-langkai mese'elungio tekale-kalea,
sine pe'urumako mese'elungio pompelangkai.
13Tewala asa mia sumangki se'eluno irongeo,
onaemo benge-bengea ka tataano.
14Mia anu moroso aroano mokotembio marasaino,
sine anu tetadi rosono, isema mokompomuleo?
15Aroano mia hinao ponto'orino mohawe ponto'ori,
ka birino mia pande mosongka mo'ungke ponto'ori.
16Pompowee mo'ungkahi pesalaano mia,
wawao me'aro a luwuno mia langkai potorodo.
17Anu amba-ambano mepau a laro asa pe'u'uaa tengkita mentee,
ranta hawe mia susua ka mepenteeo kara-karano.
18Undi mokompenaa-naao pengengea,
ka umoloti ira mia mempabawa.
19Pepaekompo anu pinokomahaki motungkoopo inumpedaako sekonopo kota anu moroso,
ka pengengea atuu kana lansono pewowa langkaino asa bente.
20Inso a hasilino ngangano kompono asa mia pinokomowohi,
hasilino wiwino mokomowohio.
21Tuwu ka mate ipabawaio elo,
isema ineheno pakeo, ta kumaano wuano.
22Isema mohawe beineno, mohawe me'uraa,
ka Dopemoikoo i Ue.
23Mia mongkokolaro mepau mepepehohawa,
sine mia kaea sumangki nahi pontudu.
24Hinao wali-wali anu mowawa masolaa,
sine hinao sambe'e anu rangkuopo sekono asa mia pepaekompo.
Currently Selected:
Powadi 18: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
