Powadi 16
16
1Mia polio montitimbanga i laro aroano,
sine sangkino elo pu'uno inso ndi Ondae i Ue.
2Luwuno pesalaano mia morina montonda pongkitano onaeno,
sine Ondaemo i Ue anu paresao aroa.
3Peweengakonomo wineweumu ndi Ondae i Ue,
asalakono gagi luwu sinongkamu.
4Ondae i Ue weweuo luwuakoano singge hinao tinoono,
maupo mia mosa'o gauno Doweweuo tiano oleo masolaa.
5Sompo mia anu mompelangka-langkai mokoburu-Do i Ue;
onae manasa nahi ta tola inso a mpohuku.
6Saru pompehohawa ka petenunu, sala inampuni,
hangano doitoako Ira i Ue mia olaiakono wineweu mosa'o.
7Tewala Dopemoikoo i Ue pesalaano asa mia,
maupo iwalino mia atuu Dopokosintuwuo saru onae.
8Moikoopo hinawe tedei tinondaako menteea,
sekonopo hinawe hadio nahina moleoa.
9Aroano mia mompewowolo pesalaano,
sine Ondaemo i Ue anu mokomanasao te'aroano pelempano.
10Pomputusino anu pinesombai kongko a wiwino mokole,
tempono mobitara, ngangano nahi poweweu sala.
11Pontimba ka ponsa'u anu mentee onaemo ndi Ondae i Ue,
luwuno watu pontimba a laro ngkadu-kadu Ondae weweuo.
12Moweweu gau mosa'o mokoburuno mokole,
hangano kadera poparentaa gagi moroso hangano menteea.
13Wiwi anu mentee ipemoikoo mokole,
ka mia anu mepau moleo ta pinehohawa.
14Bamburuno mokole onaemo mala'eka matea,
sine mia pande mosongka mokompenaa-naao.
15A rupano mokole anu mewanta hinao tuwua
ka moikono kana seruno usa tempo olono wula usa ka motu'i-tu'i.
16Mohawe ponto'ori anu mentee moikoopo sekono wulaa,
ka mohawe ponto'ori masuliopo olino sekono salaka.
17Pesalaano mia moleo onaemo olaiakono wineweu mosa'o;
isema dumagaio pesalaano, mekariao penaano.
18Pompelangka-langkai mese'elungio tekale-kalea,
ka konangi-nangi mese'elungio tedontaa.
19Moikoopo me'urumako saru mia anu mauru
sekonopo metia rinontu saru mia mompelangka-langkai.
20Isema mekokoongakono pau ta mohawe moikoa,
ka me'uraomo mia anu me'ala-ala Ira i Ue.
21Mia anu aroano pande mosongka pinau hinao ponto'orino,
ka pepau anu mo'ahi ta lalu pine'ala-ala.
22Pinewowolo molino onaemo pu'uno tuwuano anu me'ueo,
sine hukuno mia benge-benge onaemo benge-bengeno.
23Aroano mia pande mosongka mokogagio ngangano hinao pinewowolo molino,
ka weweuo wiwino lalu pine'ala-ala.
24Pau anu mompokosanaa kana inenano siu hoani,
mo'ahino aroa ka mokomadoo ira wuku.
25 #
Pow. 14:12
Hinao pesalaa anu pinau moleo,
sine tompano te'aro a matea.
26Pompemokoninggono asa mia anu mo'angga mokorosoo ka ipo'angga,
hangano ngangano dumadaio.
27Mia anu nahi mentudu mongkeke aa mosa'oa,
ka wiwino kana hinao api anu mompokomo'ai.
28Mia anu molengku moweweu pe'u'uaa,
ka asa mia anu mompau nahi mentee momponsua sambe'e moroso.
29Mia anu mompake pobobarasai mompokotesaa pe'asa miano,
ka weweuo onae melempa a mpesalaa anu nahi moiko.
30Isema mempiroakono matano, mosongka pompopo'oo;
isema mekomu, moweweuomo anu mosa'o.
31Wuu mopute onaemo ramba-ramba ulu anu tekosi,
anu hinawe a nsala menteea.
32Mia anu mauru lumaloio asa sorodadu,
mia anu mokompeteao aroano lumaloio mia anu mompoko'ala kota.
33Undi tinende a wawo mpa'a,
sine inso ndi Ondae i Ue luwuno pomputusi.
Currently Selected:
Powadi 16: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
