Podoaa 5
5
Atora mongkona mia mokoburu
5:1-4
1Mepau Ira i Ue ndi Musa, 2”Parenta iramo to Isaraeli kai luwuno mia anu mohawe haki ngkuli mesaki, luwuno mia anu moluarako nana ka luwuno mia anu mokoburu hangano wata ngkoroi, tinena bintao pekemaa. 3Moiko tama maupo beine asalakono tena ira melako. Ondae asalakono tena ira melako mpeluarako inso a mpekemaa, kasi dompokomokoburuo pekemaa po'ianga-Ku i tonga-tongado.” 4Domeweweuomo to Isaraeli kanatuu. Domentena ira mia atuudo mebintao pekemaa. Kana anu pinau-Do i Ue ndi Musa, kanandiomo domeweweuo to Isaraeli.
Atora mongkona pontolosia sala
5:5-10
5 #
Ima. 6:1-7
Mepau Ira i Ue ndi Musa, 6”Pepaumo a nto Isaraeli: Tewala asa mia, tama ke beine moweweu hala a mpe'asa miano, ka hangano kanatuu moweweu nahi petenunu ndi Ondae i Ue, mia atuu pinokonsala. 7Asalakono imangakuakono hala anu wineweuno atuu, umowahio luwu pontolosi saru tumiangio asa ntia olimano, ka i'amba meweengakono a mia ba ndi sema ipoweweu sala. 8Sine, tewala mia atuu nahina pe'etuno, ndi sema ipoko'owahio pontolosi sala atuu, ka pontolosi sala anu asalakono i'owahio atuu gagi anu-Do i Ue, gagi tiado sando mpesomba, sangkadio bimba lakino pesintuwua anu pinake moweweu pesintuwuano mia atuu. 9Sompo pesomba inso a luwuno pesomba mempori anu pinohawedo to Isaraeli a sando mpesomba, onaemo tiado sando mpesomba. 10Sompo pesomba mempori lano mia atuu me'ueo, sine hapa anu ipeweengakono a sando mpesomba gagi tiano sando mpesomba.”
Songka mongkona kara-kara mosiria
5:11-31
11Mepau Ira i Ue ndi Musa, 12”Pepaumo a nto Isaraeli ka pauako ira: Tewala kombiano asa mia moweweu molengku, moweweu nahi petenunu a ntamano, 13ka tama susua mewowaliakono beine atuu, nahi to'orio tamano, hangano beine atuu mewuni-wuni sumosa'orio koroino, nahina sumakosiio ka nahina humawe ira, 14sine lembuino mompemosiri pabawaio tamano atuu, ranta kai gagi mosiri a ngkombiano, ka beine atuu lano isosa'aiomo koroino; ke mompemosiri pabawaio tamano atuu, ranta kai gagi mosiri a ngkombiano, maupo beine atuu nahi sosa'orio koroino, 15asalakono mia atuu wawao kombiano a sando mpesomba. Asalakono mia mbo'u atuu mowawa pesomba hangano beine atuu hadiono asa ntia hopulu efa tarigu jelai. Nahi moiko ipontawa lana i wawono maupo monaakono dupa, hangano pesomba atuu onaemo pesomba kaanga mosiria, asa pesomba pepopoto'ori anu mopoto'oriakono mia mongkona mosa'oa. 16Sando mpesomba asalakono tumenao beine atuu umpeda ka mopo'aroo ndi Ondae i Ue. 17Ka i'amba sando mpesomba asalakono mowawa uwoi mempori a laro asa kusi wita, mo'ala awu wita anu a horono Kema Mempori ka numaao a laro uwoi atuu. 18Umarino sando mpesomba mopo'aroo beine atuu ndi Ondae i Ue, asalakono ikaleo wuuno beine atuu. Ka i'amba numaao pesomba pepopoto'ori, pesomba kaanga mosiria atuu a pele ngkaeno beine atuu, sekono a ngkaeno sando mpesomba asalakono hinao uwoi mopa'i anu mowawa totonaa. 19Ka i'amba sando mpesomba asalakono sumumpao beine atuu saru motaeakono: Tewala nahi mentee hinao tama anu moturi saru omue ka nahi upoweweu molengku anu mompokomosa'o, kahinaano omue i totono pabawano tamamu, ka tolakomo inso a uwoi mopa'i anu mowawa totonaa andio. 20Sine, tewala omue anu i totono pabawano tamamu moweweu molengku ka sumosa'orio koroimu, hangano mewowaliakono mia anu komba tamamu. 21I larono anu kanandio asalakono sando mpesomba sumumpaakono sumpa totonaa beine atuu ka motaeakono: po'ineeomo Ondae i Ue weweuko gagi sumpa totonaa i tonga-tongano tongkumu saru weweuo pu'u mpa'amu gagi kodei ka pe'anakaamu kamba. 22Hangano uwoi anu mowawa totonaa andio ta mewinso a laro ngkoroimu mokokambao pe'anakaamu ka mokongkodeio pu'u mpa'amu. Ka i'amba beine atuu asalakono motae: Ami, ami.
23Sando mpesomba asalakono burio totonaa atuu a asa lewe wunta ka pahihiakono uwoi mopa'i atuu. 24Asalakono ipoweeakono beine atuu mo'inu uwoi mopa'i anu mowawa totonaa atuu ka uwoi atuu ta mewinso a laro ngkoroino ranta kai mopa'i tinuwuno. 25Sando mpesomba asalakono umalao pesomba kaanga mosiria inso a ngkaeno beine atuu, ka i'amba tumandeo i'aro-Do i Ue ka wawao a meda pontunua pesomba. 26Umarino atuu sando mpesomba asalakono mo'ala asa raku inso a mpesomba kaanga atuu gagi tia pepopoto'orino ka tumunuo a wawo meda pontunua pesomba, ka i'amba weeakono beine atuu uminuo uwoi atuu. 27Mansano iweeakono uwoi kai inuo beine atuu, ka ta gagi, tewala beine atuu lano isosa'aio koroino ka melelu nahi petenunu a ntamano, uwoi anu mowawa totonaa atuu ta mewinso a ngkoroino ka imopa'i tuwuno, ranta pe'anakaano kamba ka puu mpa'ano kodei, ka beine atuu ta gagi totonaa i olono tongkuno. 28Sine tewala beine atuu nahi sosa'orio koroino, tendeano onae mempori, onae ta pinokomengkaa nahi sala ka ta me'ana.”
29Onaemo songka mongkona mosiria, tewala asa beine moweweuomo molengku ka sumosa'orio koroino, kahinaano onae i totono pabawano tamano, 30ke pompemosiri pabawaio asa tama, ranta kai mosiri a ngkombiano; asalakono ipopo'aroo beine atuu ndi Ondae i Ue ka sando mpesomba asalakono weweuo luwuno songka andio a beine atuu. 31Tama atuu ta tola inso a nsalano, sine beine atuu asalakono tumembio sala wineweuno.
Currently Selected:
Podoaa 5: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
