Podoaa 21
21
Peteaa umpeda i Horoma
21:1-3
1 #
Pod. 33:40
Mokole i wita Aradi, to Kana'a anu mpo'ia i Wita Nege, rumongeo nine to Isaraeli me'aiwa inso a nsala Atarimi, ka i'amba metea umewai ira to Isaraeli, ka iwawa ira ba opia mia tinawa inso ndi ondae. 2Onaemo ka dompotanga to Isaraeli ndi Ondae i Ue, dompotae, ”Tewala Ipeweengakono ntu'u tongku andio a ngkaemami, kami meropuo luwuno kotano ranta ka itampula.” 3Ondae i Ue rumongeo po'emado to Isaraeli, onaemo ka Dopeweengako ira to Kana'a atuu; ka i'amba mia atuudo ka luwuno kotado rinopu ranta kai masola. Onaemo pu'uno po'ianga atuu nineeako Horoma.
Ule mala
21:4-9
4 #
Win. 2:1
Mansado mpelungka inso i torukuno Hore, mpelempa te'aro i Tahi Teberau ka domentanggolilio wita Edomi, ka tongku atuu nami dompokompeteao aroado a ntonga nsala. 5#1Kor. 10:9Ka do'amba mpepauki umewai Ira Ue Ala ka i Musa, ”Tembio ka Iwawa kami mpeluarako inso i Masiri? Ka kimemate i pada one andio? Hangano i ndi'ai nahina roti ka nahina uwoi, ka kaanga motewe andio nte'osa kamimo.” 6Ka Do'amba i Ue mompokohina hadio ule mo'ito i tonga-tongado tongku atuu anu tumungku ira, ranta hadio inso a nto Isaraeli anu mate. 7Ka do'amba tongku atuu me'aiwa ndi Musa ka dompotae, ”Ntehala kamimo, hangano mpepauki kamimo umewai Ira i Ue ka omue.” Pekakaimo ndi Ondae i Ue, ka Doliahako ira ule andio inso ndi omami. Ka i'amba i Musa mekakaiako ira tongku atuu. 8Mepau Iramo i Ue, ”Weweuomo ule mo'ito ka naaomo a asa keu pinontade. Sompo mia anu tinungku, tewala ikitao, ta kongko tuwu.” 9#2Mok. 18:4; Yoh. 3:14Ka i'amba i Musa moweweu ule mala ka inaao a asa keu pinontade. Tewala asa mia itungkuo ule, sine mengkita a ule mala atuu, manasa ta kongko tuwu.
Pelempaa lumako i wita Moabi
21:10-20
10Ka i'amba mpelungka iramo to Isaraeli, ka mpekema i Oboti. 11Inso i Oboti mpelungka ira umpeda hanga ngkota i Abarimi, i pada one anu te'alaako i sabaano oleo Moabi. 12Inso i tu'ai mpelungka ira ka mpekema i Lembono Seredi. 13Ka inso i tu'ai mpelungka ira mbo'u ka mpekema i asa towano Koro Aranoni anu i pada one ka anu waa meluarako inso i witado to Amori, hangano Koro Aranoni onaemo tida wita Moabi, i olodo to Moabi ka to Amori. 14Onaemo pu'uno i larono wunta peteaa-Do i Ue pinau, ”Wahebi i Supa ka luwuno lembono lumako a ngkoro Aranoni, 15ka apano luwuno lembono. Apano atuu tewile malua te'aro a witano kota Ari, ka mehonda a ntida witado to Moabi.” 16Inso i ra'ai melako ira i Beeri. Ndiomo sumuru po'ianga-Do i Ue mepau ndi Musa, ”Pumpu iramo tongku atuu, Aku moweeako ira uwoi.” 17I tempo atuu to Isaraeli mpenaniako penani andio,
”Luluamo, hei sumuru! Aiwa to mpenani ntepoposangki,
hangano sumuru anu mengkinekedo mokole,
18anu pinoko'ondaloako luwuno tuko poparentaa
saru tukodo ulea mokole i olono tongku atuu.”
Ka i'amba inso i pada one melako ira i Matana, 19inso i Matana melako i Nahalieli, inso i Nahalieli melako i Bamoti, 20inso i Bamoti melako i lembono i witado to Moabi umpeda punsuno Torukuno Pisiga anu me'aro a mpada molue.
Peteaa umewaio i Sihoni, mokole i Hesiboni
21:21-30
21 #
Win. 2:26-37
Ka do'amba to Isaraeli mpotena mia lumako ndi Sihoni, mokoledo to Amori, saru pe'oliwi, 22”Ipo'inee kamimo ntelalo i witamiu. Nahi kami mepansia mpewinso a luwuno bondemiu ka luwuno lere anggoromiu. Nahi kami mpo'inu uwoi sumurumiu. Butu koa a nsala langkai kami mpelempa ranta ka kimelaloo witamiu.” 23Sine, nahi ehe ira i Sihoni to Isaraeli mpelempa melaloo witano. Tendeano, ipumpu ira luwuno sorodaduno ka dompeluarako i pada one umaropi ira to Isaraeli. Kohaweno i Yahasi meteaomo umewai ira to Isaraeli. 24Sine, to Isaraeli menangiakono mata mponai ka mpetorokio witano, inso a ngkoro Aranoni hawe a ngkoro Yabo, hawe a inuleno i Amoni, hangano tida witado inuleno i Amoni atuu tedoa moroso. 25Luwuno kota atuu dompoko'alao to Isaraeli, onaemo ka domerodo a luwuno kotado to Amori, i Hesiboni ka a luwuno kota kodeino. 26Hangano, kota Hesiboni onaemo kota po'iangano i Sihoni, mokoledo to Amori. Horio metea umewaio mokoledo to Moabi anu se'eluno, ka ipongko'alao luwu wita inso i a ngkaeno hawe a ngkoro Aranoni. 27Onaemo pu'uno ka dompotae puu mpowadi,
”Aiwamo i kota Hesiboni, moikoomo iwinangu
ka ipinokomoroso kota po'iangano i Sihoni atuu!
28 #
Yer. 48:45-46
Hangano api meluarako inso i kota Hesiboni,
langano api inso a ngkota po'iangano i Sihoni,
anu pingko kumaano Ari-Moabi,
ondae anu pabawaio luwuno pongku wita asa ngkeu Koro Aranoni.
29Masolakomo, oo Moabi!
Memasola komiumo, oo tongkuno i Kamosi!
Iweweuo luwuno ana ntamano gagi mia mpolai,
ka luwuno anano beine gagi mia ntinawa
ndi Sihoni, mokoledo to Amori.
30Tomempana iramo, tampulaomo kota Hesiboni hawe i Diboni,
ka topokotampula ira hawe i Nopahi, anu tewile hawe i Medeba.”
Peteaa umewaio i Ogo, mokole i Basani
21:31–22:1
31 #
Win. 3:1-4
Kanandiomo domerodo to Isaraeli i witado to Amori. 32Mansano montena mia i Musa padasoo kota Yaeseri, dompoko'alao luwu kota kodei petengi-tengino Yaeseri ka mensaari ira to Amori anu mekongko i tu'ai. 33Ka do'amba mpelengkuako ka domelako te'aro i Basani. Ka i'amba i Ogo, mokole i Basani saru luwuno palilino melako i Ederei umaropi ira ka dompetea. 34Sine, mepau Ira i Ue ndi Musa, ”Siimo doitoakono, hangano Aku meweengakono saru luwuno palilino ka witano a ngkaemu. Asalakono weweuo ndi onae kana anu wineweumu ndi Sihoni mokoledo to Amori anu mo'ia i kota Hesiboni.” 35Onaemo ka domenangio ka luwuno anano saru luwuno palilino, ranta nahina maupo te'asa mia anu pino'inee tola. Ka do'amba mpetorokio witano.
Currently Selected:
Podoaa 21: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
