Podoaa 10

Unino napiri

10:1-10

1Mepau Ira i Ue ndi Musa, 2”Weweuomo orua napiri inso a nsalaka. Asalakono uweweuo atuu inso a nsalaka pinalu, ka upakeo moboi ira bawaa Isaraeli ka tumena ira sorodadudo mpelungka. 3Mansano pinuuri orua napiri atuu, luwuno bawaa atuu asalakono mpepumpu i aromu i arono pewowano Kema Tepotowoa. 4Tewala butu asa pinuuri, luwuno petewawa, luwuno petewawa sorodadudo Isaraeli asalakono mpepumpu i aromu. 5Tempono imempuurio unino pepopoto'ori, sorodadu anu mpekema i sabaano oleo asalakono mpelungka; 6Tempono imempuurio unino pepopoto'ori kompenduano, sorodadu anu mpekema i selata asalakono mpelungka. Gagi unino pepopoto'ori asalakono pinuuri tumena ira mpelungka. 7Sine, tumena ira bawaa mpepumpu, asalakono butu imempuurio, siimo ipe'uni pepopoto'ori. 8Luwuno napiri atuu asalakono domempuurio anano i Haruni, luwuno sando mpesomba. Onaemo anu gagi pompakosi ranta nahina tampulaano ndi omiu hawe a inulemiu. 9Tewala melako komiu mpetea i witamiu umewaio iwali anu mokomarasai komiu, asalakono napiri impopo'unio pepopoto'ori, kai merinambe i aro-Do i Ue, Ue Alamiu, ka kinadudui inso a iwalimiu. 10A luwuno mbo'u oleo imemawongko, a luwuno maroaamiu ka sompo pompu'uano wula, asalakono imempuurio napiri atuu ia tempo mpopesombaako luwuno pesomba tinunumiu ka luwuno pesomba tekaduduiamiu; tinoono kai merinambe i aro-Do Ue Alamiu. Ongkuemo Ue, Ue Alamiu.”

Mpelungka inso i torukuno Sinai

10:11-36

11Ia ta'u ko'orua, wula ko'orua, tanggala rua pulu wula atuu, seru atuu mewuatako i wawono Kema Mempori, po'iangano songka-Do Ue Ala. 12To Isaraeli mbo'u mpelungka inso i pada one Sinai montonda potudano pelungkado, ranta kai penaa-naa seru atuu i pada one Parani. 13Onaemo pelungkado amba-ambano montonda petena-Do i Ue telalo ndi Musa. 14Anu tese'elu melungka onaemo sorodadu anu i totono bandera tepo'asaado inuleno i Yehuda montonda bawaado. Anu metewawa a bawaa atuu onaemo i Nahasoni anano i Aminada; 15Anu metewawa bawaa suku inuleno i Isakari onaemo i Natane'eli anano i Suari; 16Anu metewawa a bawaa suku inuleno i Sebulo onaemo i Eliabi anano i Heloni. 17Umarino atuu Kema Mempori rinongka, ka mpelungka iramo inuleno i Geresoni ka inuleno i Merari anu mentandeo Kema Mempori atuu. 18Ka i'amba mpelungka iramo sorodadu anu i totono bandera tepo'asaado i Rube montonda bawaado. Anu metewawa a bawaa atuu onaemo i Elisuri anano i Siedeuri; 19Anu metewawa a bawaa suku inuleno i Simeo onaemo i Selumieli anano i Surisiadai; 20Anu metewawa a bawaa suku inuleno i Gadi onaemo i Elisapi anano i Rehueli. 21Umarino atuu mpelungka iramo to Kehati, anu mentandeo luwuno sangka po'ianga mempori; Kema Mempori pinasaomo se'eluno napi domehawe. 22Ka do'amba mpelungka sorodadu anu i totono bandera tepo'asaado inuleno i Eparai montonda bawaado; 23Anu metewawa a bawaa atuu onaemo i Elisama anano i Amihudi; anu metewawa a bawaa suku inuleno i Manase onaemo i Gamalieli anano i Pedasuri; 24Anu metewawa a bawaa suku inuleno i Benami onaemo i Abidani anano i Gideoni. 25Gagi baresi pokotompa luwuno sorodadu atuu, mpelungka iramo sorodadu anu i totono bandera tepo'asaado inuleno i Dani montonda bawaado; anu metewawa a bawaa atuu onaemo i Ahieseri anano i Amisiadai; 26Anu metewawa a bawaa suku inuleno i Asieri onaemo i Pagieli anano i Okirani; 27Anu metewawa a bawaa suku inuleno i Napatali onaemo i Ahira anano i Enani. 28Onaemo potudano pelungkado to Isaraeli montonda bawaado, tempono dompelungka.

29Ka i'amba motae i Musa ndi Hobabi anano i Rehueli to Midia, ponino i Musa, ”Kami mpelungka a mpo'ianga anu dinandi-Do i Ue tempono Dopepau: Aku koa meweengakono ndi omiu. Ipetondamo merongaakami, kami koa mpoweweu moiko ndi omiu, hangano Ondae i Ue modandiako ira anu moiko a nto Isaraeli.” 30Sangkino ndi Musa, ”Nahi aku metonda, sine aku lumako i witaku ka a mpepaekompoku.” 31Motae i Musa, ”Ku'emao si binta kami, hangano omiumo anu tumo'orio kana'umpe kami mpekema i pada one; komiu gagi mata nsalamami. 32Tewala itonda kami, moikoa anu Ira weweuo i Ue ndi omami kami koa meweweuo mbo'u ndi omiu.” 33Ka i'amba mpelungka iramo inso a ntorukuno-Do i Ue ka mpelempa otolu oleo olaino pelempaa, sekono Burua pedandia-Do i Ue melungka i arodo ka mpelempaa otolu oleo olaino pelempaa mpo'ungke po'ianga pena-naado. 34Seru-Do i Ue kongko i wawodo tempono meene, tempono dompelungka inso a mpekemaa.

35 # Pud. 68:2 Sompo ipelungka burua pedandia atuu, motae i Musa, ”Ipentademo oo Ue, ka dontesiarawo iwali-Miu ka luwuno mia anu umo'aliaa-Komiu mpolai inso i aro-Miu.” 36Sompo ipenaa-naa burua pedandia atuu, ipotae, ”Ipekulemo, oo Ue a bawaa Isaraeli anu mapasowu-sowu andio.”

Currently Selected:

Podoaa 10: XMZ

Highlight

Compare

Copy