Nehemia 8

Pobasaa Tora ka porame-ramea oleo langkai Laika Lewe Ngkeu

8:1-19

1Mansano haweako wula anu ko'opitu ka to Isaraeli mpo'ia iramo a luwuno kotano, 2mperongaako iramo mpepumpu luwuno palili a ntanalapa i arono Pewowa Langkai Uwoi. Dome'emao ndi Esera anu tedoa pande a wunta atuu, ka iwawao wunta Taurano i Musa anu Doweeako ira i Ue a nto Isaraeli. 3Ka i'amba oleo amba-ambano wula ko'opitu atuu sando mpesomba Esera wawao wunta Taura atuu i arodo bawaa, moiko tama maupo beine, ka sompo mia anu mokonto'orio. 4Ibasaako ira i arono tanalapa i arono Pewowa Langkai Uwoi inso mo'oru hawe ntonga oleo i arodo tama ka beine saru luwuno mia anu mokonto'orio. Luwuno bawaa mperorongeakono ntu'u pobasaa wunta Taura atuu. 5I Esera anu tedoa pande a wunta atuu, mentade a wawo mimbara keu anu wineweu ta pobasaa wunta Songka atuu. I koanano mentade i Matitia, i Sema, i Anaya, i Uria, i Hilikia ka i Ma'aseya, sekono i manggalino mentade i Pedaya, i Misaeli, i Milikia, i Hasumi, i Hasibadana, i Sakaria ka i Mesulami. 6I Esera wileo wunta atuu domengkitao luwuno bawaa, hangano onae mentade lalu mantande inso a luwuno mia atuu. Tempono iwileo, luwuno mia mpentade. 7I Esera umunde-unde Ira i Ue, Ue Ala anu tedoa langkai, ka luwuno mia mesangki, ”Ami, ami!” Saru mpontande kae. Ka do'amba mpenggolontu ka mpetuundu mesombai Ira i Ue ka rupado hawe a wita. 8Luwudo to Lewi kana i Yesua, i Bani, i Serebia, i Yamini, i Akubi, i Sabetai, i Hodia, i Maaseya, i Kelita, i Asaria, i Yosabadi, i Hanani ka i Pelaya, mompaguruako Taura atuu a bawaa, kontongaado bawaa atuu mpentade a mpo'iangado. 9Wunta atuu, Taura-Do Ue Ala, mengkaa ibinasa ka pinokomengkaa, ranta pobasaa atuu pinokonto'ori.

10Ka i'amba i Nehemia, petewawado ka sando mpesomba i Esera, anu tedoa pande a wunta atuu, saru luwudo to Lewi anu paguru ira bawaa atuu, mpotaeako ira luwu, ”Oleo andio mempori-Do Ue Alamiu, si mpopemasusa ka mpengese!” hangano luwuno bawaa mpengese, itempono domerongeo pauno Taura atuu. 11Ka i'amba motaeako ira, ”Imelakomo, impongkaamo kaanga anu mo'ahi ka impo'inumo inua anu mentowu, saru ime'oliwiomo asa ntia ndi ondae anu nahi dompopatinda hapa-hapa, hangano oleo andio mempori-Do Ueto! Si memasusa aroa, hangano mawongkoa inso ndi Ondae i Ue, onaemo dumagai komiu!” 12Luwuno to Lewi tumena ira luwu bawaa kadompoperodo, ka dompotae, ”Impoperodomo, hangano oleo andio mempori. Siimo imemasusa aroa!” 13Umarino atuu luwuno bawaa melako mpongkaa ka mpo'inu, mpotia-tia kaanga ka mpogawe, hangano dompokonto'orio luwuno pau-Do i Ue anu pinokomengkaa ndi ondae.

14 # Ima. 23:33-36, 39-43; Win. 16:13-15 Ia oleo ko'orua luwuno petewawado anu mpepe'etu luwuno tongku, luwuno sando mpesomba ka luwuno to Lewi me'aiwa mpepumpu ndi Esera, anu tedoa pande a songka Taura atuu, ka domemparesao pauno Taura atuu. 15Ihaweo teburi a songka anu pinowee-Do i Ue molalo i Musa, nine to Isaraeli asalakono ka dompo'ia a laro luwuno laika a oleo langkai wula ko'opitu, 16ka a luwuno kotado saru i Yerusale asalakono pinohawe lele ka pompopoto'ori, kanandio, ”Imelakomo a ntorukuno, alaomo lewe saitu, lewe ngkeu lana, lewe ngkeu muradi, lewe ngkuruma ka lewe inso a luwuno keu anu marombo weweua luwuno laika, kana'umpe anu teburi.” 17Umarino atuu melako iramo mia me'alao luwuno lewe atuu ka meweweuo luwuno laika, singge mia a wawo ato rahano, a kintalado, ka mbo'u a luwuno kintalano Raha-Do Ue Ala, a ntanalapano Pewowa Langkai Uwoi ka a ntanalapano Pewowa Langkai Eparai. 18Luwuno bawaa anu mpekule inso a mpontadia mpoweweu ira laika ka mpo'ia i tu'ai. Lano i tempono i Yosua anano i Nuni hawe oleo atuu to Isaraeli nahi dohori meweweuo anu kanandio. Langkai ntu'u mawongkoa anu pinembasaido. 19Wunta Taura-Do Ue Ala atuu binasa sompo oleo, inso a oleo amba-ambano hawe a oleo pokotompa. I larono opitu oleo domerame-rameo oleo langkai atuu ka a oleo ko'oalu hinao tepumpua langkai menunu saru atora.

Currently Selected:

Nehemia 8: XMZ

Highlight

Copy

Compare