Nehemia 4

Petangkoro a mia anu nahi pe'eheo powangua

4:1-23

1Mansano rumongeo i Sanibala nine kontongaamami wali mpowangu bente, tesingkaomo tekudano ka tedoa mosa'ono. Ipasinggiri ira to Yahudi, 2ka ipotae i arodo pepaekompono ka sorodadu Samaria, ”Hapake menteeano anu wineweudo to Yahudi anu molema andio? Nde hinaoke anu pinokorosodo? Nde ira mpowawa pesombadoke? Nde ira koa mpoko'umario i larono asa oleo? Nde ira wali mpotuwu ira watu inso a howuno anu terawo anu pingkoomo mo'ai?” 3Ka i'amba motae i Tobia to Amoni anu umpeda ndi onae, ”Maupo dowali mewanguo, sine tewala asa dahu ntobu mewuatako i wawono, tehoaomo rere watudo.”

4Oo, Ue Alamami, Irongeomo kana'umpe kimempinokongkodei. Iposuleako ira ponggari-nggarido a wawo uludo ondaedo ka Ipeweengako ira kana pinomuru i wita po'iangado mia mentinawa. 5Siimo Itutuwiako Ira salado ka halado si oninio inso i aro-Miu, hangano mpoweweu ira luwuno anu mompokomosa'o aroa i arodo luwuno mia anu kontongaado mpowangu.

6Sine, kimewanguo mpiha bente hawe entonga mantandeno ka ranta kaitepotowo tompano, hangano luwuno tongku mpo'angga tompaano aroado.

7Mansano rumongeo i Sanibala ka i Tobia saru to Ara ka to Amoni ka to Asidodi nine anggaa pokomoikono bente Yerusale atuu motilalo ka luwuno bolono bente mompu'u te'onso, onaemo kadotedoa ntekuda. 8Ntepo'asa ira luwu ira mpeteaakono Yerusale ka mompokomarisu i ra'ai. 9Sine, mpekakai kami ndi Ondae Ue Alamami, ka mpodagai kami meene ka wongi hangano pinogaudo.

10Mpotae iramo to Yehuda, ”Rosodo anu mpontande watu terawo molemaomo, kahinaano watu terawo da hadio ntu'u. Nahi kami mempolio wali mewanguo bente andio.” 11Iwali mami mpopewowolo ira, ”Nahi ira mento'orio ka nahi ira mpokita hapa-hapa, ranta katomekongko i tonga-tongado, mepate ira ka mokompenaa-naao anggaa atuu.” 12To Yahudi anu mpo'ia umpeda ndi ondae, pempulumo dome'aiwa mpopoto'oria kami, ”Ira mensapoi kita inso a luwuno po'iangado.” 13Ka ku'amba monaa palili montonda pepe'etuano a luwuno po'ianga anu lalu tetotoako inso a mpo'ianga atuu, i bungkuno bente, a luwuno po'ianga anu malua, soompo saru ponai, kansai ka pana. 14Umarino kuparesao luwu, mentade aku ka mepau a luwuno mia memota'u, anu mempabawa ka a luwuno mia susua, ”Si medoitoako ira! Rambe Iramo i Ue anu tedoa langkai pabawa-Do ka mongkokongiri ka impeteamo tiado luwuno pepaekompomiu, ana ntama ka ana beinemiu, saru hangano kombiamiu ka rahamiu.”

15Mansado merongeo iwalimami nine tinoodo kimento'oriomo ka nine nahi Dopokogagio Ue Ala, onaemo ka kimpekule luwu a bente, singge mia a mpo'anggaano. 16Mompu'u oleo atuu asa ntia miaku mpo'angga ka asa ntia susuano mpo'ini kansai, kanta ka pana saru mpopake lemba labu, ka luwuno petewawa mpentade i bungkudo luwuno suku Yehuda 17anu mpowangu bente. Luwuno mia anu mpontande ka mponteo, me'anggao anggaado asa ngkae ka kae anu susuano mo'ini sangka petea. 18Sompo mia anu mowangu, mo'angga metampi ponai a ntongano ka i horiku mentade puu mpopuuri tawuwua. 19Mepau akumo a luwuno mia memota'u, anu mempabawa ka a luwuno mia anu susua, ”Anggaa andio langkai ka molue, ka ntemponsia kita olai asa mia ka anu susuano a rere, 20tewala mporonge komiu unino tawuwua i asa po'ianga, impepumpumo i ra'ai tepohawea kami. Ondae Ue Alato anu meteaakita!”

21Kanandiomo kime'anggao anggaa atuu, kontongaano asa ntia mia mo'ini kansai mompu'u umpeda meene hawe kaisumoo luwuno anano wula. 22I tempo mbo'u atuu parenta andio kuweeako ira palili, ”Sompo mia saru miano asalakono mperato wongi i Yerusale, ka dompo'anggaa kami i tempono wongi, ka meene mpo'angga anggaado.” 23Moiko ongkue maupo luwuno pepaekompoku, miaku ka luwuno puu mpodagai anu tumonda aku, luwumami nahi kintengko'ala melohuo sangkamami. Sompo mia mo'ini parewa mpetea a ngkae koanano.

Currently Selected:

Nehemia 4: XMZ

Highlight

Copy

Compare