I MARAKUSU 7
7
Parenta-Do Ue Ala ka gaudo to Yahudi
7:1-23
(Mat. 15:1-20)
1I asa tempo asa bawaa to Parisi ka ba opia anu mponto'ori Taura inso i Yerusale me'aiwa tepohaweako Ira i Yesu. 2Domengkitao, nine ba opia ira ana guru-Do mpongkaako kae mokoburu, onaemo kae anu nahi wino'ohi. 3Hangano to Parisi kana to Yahudi mehano nahi dompongkaa ba nahi dompewo'ohi ngkae se'elu, hangano mpe'ini ira a gaudo uempu'udo; 4ka ba dompekule inso a olu nahi dompongkaa koa mbo'u ba nahi dompedolo. Hadio mbo'u gau susua anu ininido, kana mongkona mowo'ohi sangkiri, kusi ka luwuno parewa mala. 5Onaemo pu'uno ka dompesikeno to Parisi ka pande ntu'u Taura atuu ndi Ondae, ”Tembio ana guru-Miu ka domentuwu nahi domentondao gaudo uempu'uto, sine mpongkaako kae mokobruru?” 6#Yes. 29:13Dosangki ira, ”Menteeomo pinauno anu ta gagi i Yesaya mongkona omiu, hei mia mpo'onde-onde! Hangano hinao teburi:
Tongku andio umunde-undea-Kune wiwido,
kahinaano aroado olai inso ndi Ongkue.
7Nahina tuduno dompesomba ndi Ongkue,
sekono pompaguru anu dompompaguruako onaemo parentano mia.
8Parenta-Do Ue Ala nahi imperioo hangano mpe'ini a gauno mia.”
9Dopotae mbo'u i Yesu, ”Mempande komiu ntu'u mpebungkuio parenta-Do Ue Ala, ka impokompekariao gaumiu. 10#Pel. 20:12; 21:17; Ima. 20:9; Win. 5:16Hangano motaeomo i Musa: Pelangkai ira amamu ka inemu! ka: Isema montotonaa amano ke ineno asalakono mate. 11Sine impotae: Tewala asa mia motaeakono amano ke ineno: Hapa anu hinao ndi ongkue, anu ta tekona ipepotuwuako, pinakeomo tiano pesomba – onaemo pesomba ndi Ondae Ue Ala – 12ka nami impo'ineeo mbo'u moweweu hapa-hapa tiano amano ke ineno. 13Ba kanandio pau-Do Ue Ala nahi meweweuo hangano gau anu tinondamiu atuu. Ka hadio mbo'u anu susua wineweumiu kanatuu.”
14Ka Do'amba i Yesu moboi ira mbo'u mia hadio ka Dopotae, ”Luwumiu, Imeronge Akumo ka impe'ihilaroo. 15Maupo hapa inso i bungkuno, anu mewinso i larono asa mia, nahi polio kumokoburutio, sine hapa anu meluarako inso a asa mia, onaemo anu kumokoburutio.” [16Ba isema mebiri ka iporonge po'ineeomo ka irongeo!] 17Mansa-Do mewinso a aasa raha Ira meliahako inso a mia hadio, mpesikeno ira ana guru-Do ndi Ondae mongkona pengkonaano potundaano atuu. 18Onaemo ka Dosangki, ”Nde maupo mbo'u omiu nahi mpokonto'orio? Nahi imento'orioke nine luwuakoano inso i bungkuno anu mewinso i larono aasa mia nahi polio kumokoburutio, 19hangano komba mewinso a laro aroa sine a laro kompono, ka i'amba tinadi a ngkakusu?” Hangano kanandio Dopokomengkaao luwuno kaanga moiko. 20Motae Ira mbo'u, ”Hapa anu meluarako inso a asa mia, onaemo anu kumokoburutio, 21hangano inso i larono, inso i aroano mia, mesabaako luwuno pinewowolo mosa'o, pebelesua, ponakoa, pompepatea, 22ponsosaboa, modokoa, mosa'oa, pe'akala, po'o'aroa mosa'o, mosisiri, pompepaukiako, pompelangka-langkai, monge-mongea. 23Luwuno anu mosa'o andio mesabaako inso i larono ka mongkokoburuti mia.”
Beine to Siro-Penesia anu mompe'ala-ala
7:24-30
(Mat. 15:21-28)
24Ka Do'amba i Yesu melungka inso i tu'ai ka Dolako i wita Tirusi. Mewinso Ira a aasa raha ka nahi Dobehe ba ihina mia tumo'orio, sine hawe-Do nahi pinokompewuniako. 25Tendeano aasa ine, anu anano ipewinsokio onitu nsa'o, ronga rumongeo mongkona Ondae, ka i'amba aiwa ka ipenggolontu a mpuu karu-Do. 26Beine atuu to Yunani tongku Siro-Penesia. I'emao ndi Ondae i Yesu ka Dosaariakono onitu nsa'o inso a anano. 27Ka Do'amba i Yesu motaeakono, ”Po'ineeomo ka domemowohi ari nana'ote, hangano nahi tekona umalao roti anu pinatindaako nana'ote ka itinendeako dahu.” 28Sine sumangki beine atuu, ”Mentee, Ue. Sine dahu anu a ntoto meda mpongkaa ira koa mbo'u siba-sibano roti anu sinosalado nana'ote.” 29Onaemo ka Dopotaeakono i Yesu beine atuu, ”Hangano luwuno paumu atuu, kanandio-andio lakomo hangano onitu nsa'o atuu meluarakoomo inso a anamu.” 30Beine atuu mekule a rahano, ka i'amba humaweo anano atuu mepombole a mpoturia, ka onitu atuu meluarakoomo.
Ondae i Yesu mokotompao asa mia mobongo
7:31-37
31Ka Do'amba i Yesu bintao mbo'u wita Tirusi ka telalo i Sidoni lumako i rano Galilea, i tonga-tongano wita Dekapoli. 32I tu'ai mia mewawao ndi Ondae asa mia anu mobongo ka montala'u'u ka dome'emao ndi Ondae, ka Dodampoakono kae-Do i wawono mia atuu. 33Ka umarido i Yesu monsiao inso a mia hadio, ranta orua iramo koa, Dowinsoo toniso-Do a birino mia atuu, ka Do'amba me'onui ka rumareo elono mia atuu. 34Ka i'amba kontongaa-Do mentombu i langi Ondae i Yesu mompae penaa ka Dopotaeakono, ”Epata!”, pengkonaano: Te'ungkahimo! 35Ka te'ungkahiomo birino mia atuu ka i tempo koa mbo'u atuu tepotolaomo mbo'u tanggono elono, ka i'amba moikoomo ipepau. 36Me'oliwi Ira i Yesu a mia anu mekongko i tu'ai ka si domentutuluo maupo ndi semamo koa. Sine maupo dome'inonto, komalu-maluano domempaleleo. 37Ntekokodoho ira ka mengkohali-hali ka dompotae, ”Luwuakoano Dopokogagio moiko, anu mobongo Dopokogagio ka iporonge, anu bebe Dopokogagio ka ipepau.”
Currently Selected:
I MARAKUSU 7: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
