I MARAKUSU 13
13
PONTUTULU MONGKONA OLEO TAMPULAANO WAWONTOLINO
LAMORO 13
Raha-Do Ue Ala ta rinongka
13:1-2
(Mat. 24:1-2; Luk. 21:5-6)
1Tempono Dopeluarako i Yesu inso a Raha-Do Ue Ala, aasa ana guru-Do motaeako Ira, ”Guru, Ikitaomo tedoa moroso watu atuudo ka tedoa tekosi luwuno raha atuu!” 2Ka Do'amba i Yesu motaeakono, ”Ukitao luwuno raha anu langkai andio? Nahina maupo te'asa ta pino'inee metako i wawono watu anu susua, luwuno ta rinongka.”
Pompu'uano tebobarasaia
13:3-13
(Mat. 24:3-14; Luk. 21:7-19)
3Tempono Ondae i Yesu mentoro a wawo Pongku Saitu, tepo'aroakono Raha-Do Ue Ala, mpesikeno iramo butu ondae i Peturu, i Yakobu, i Yohane ka i Andarea ndi Ondae, 4”Ipauakamimo, te'ipiake ta gagiano atuu, ka hapake tondonino, tewala luwuno atuu ta hawe pokotampulaano.” 5Ka mompu'u Iramo i Yesu mepauako ira, ”Impetangkoromo ka si domempopo'oo komiu mia! 6Ira mehawe hadio mia mpeneeako nee-Ku ka mpotae: Ongkuemo Onae, ka ta hadio mia pinopo'oodo. 7Ka tewala mporonge komiu u'uruno peteaa ke lele mongkona peteaa, si medanggara. Luwuno atuu asalakono gagi, sine atuu napi komba tampulaano. 8Hangano tongku ta mentade umewaio tongku ka poparentaa umewaio poparentaa. Ta gagi leelu a hadio mpo'ianga, ka ta hina mokoninggoa. Luwuno atuu da pompu'uano marasaia ta haweano tempo wo'ohu.
9 #
Mat. 10:17-20; Luk. 12:11-12 Sine omiu andio, impetangkoromo! Komiu mempineweengako a majelisi agama ka komiu mentinunduhi a raha tepumpua ka komiu mewinawa i arodo anu mempabawa ka luwuno mokole hangano Ongkue, gagi sakosiido. 10Sine Lele Mawongkoa asalakono pinalele ari a luwuno tongku. 11Ka tewala mewinawa komiu ka pineweengako, si mensalalaro ta hapa anu asalakono komiu mempauo, sine imempauomo hapa anu imewineeako i tempo koa mbo'u atuu, hangano komba omiu anu mpepau tendeano Penaa Mempori.
12Aasa pepaekompo ta meweengakono pepaekompono ka ipinepate, kanatuu koa mbo'u aasa ama a anano. Ka nana'ote ta umewa a mia mota'uno ka ta mepate ira. 13#Mat. 10:22Ira me'o'aliaakomiu luwuno mia hangano nee-Ku. Sine mia anu mompetea hawe a pokotampulaano onae ta tekadudui.”
Pobobarasaia anu mobea ka luwuno Mesia anu mpegaupi
13:14-23
(Mat. 24:15-28; Luk. 21:20-24)
14 #
Dan. 9:27; 11:31; 12:11 ”Tewala imengkitao Puu Pompepate mokoburu mentade a mpo'ianga anu nahi pototono – anu mpobasa asalakono ka dompepenteeo – ka luwuno mia anu i Yudea asalakono ka dompolai a mentorukuno. 15#Luk. 17:31Mia anu kontongaano me'angi-angi a wawo raha siimo ipetii ka mewinso ta mo'ala hapamo koa inso a rahano, 16ka mia anu kontongaano a lere siimo ipekule ta mo'ala sangkano. 17Memasola iramo ine anu kontongaado mementia ke anu mompo'uo anano i tempo atuu. 18Impekakaimo, ka si gagi luwuno atuu i tempo morini. 19#Dan. 12:1; Meng. 7:14Hangano i tempo atuu ta gagi pobobarasaia kana anu napi hori gagi tampu'uno wawontolino, anu pinokogagi-Do Ue Ala, hawe kanandio-andio ka anu nahi ta gagi mbo'u. 20Ka tewala nahi Dopoko'owowao i Ue tempono, asalakono inso a luwuno anu tuwu nahi ta hina anu tekadudui; sine hangano mia mebininiki anu Dobiniki iramo, Dopoko'owowaomo i Ue tempono.
21I tempo atuu ba dompotaeakomiu mia: Kitao, i Mesia kongko Ira i ndi'ai, ke: Kitao, i Mesia kongko Ira i ra'ai, si mpe'ala-alao. 22Hangano i Mesia mpegaupi ka nabi anu mpegaupi ira mpesabaako ka ira mpoweweu hadio petondoni kinohali-haliako, anu tinoodo bakana mopo'oo ira mia mebininiki. 23Impopesu'uimo! Se'eluomo Kupauakomiu luwuno andio.”
Hawe-Do i Ana Manusia
Potundaano tutulu mongkona keu ara
13:24-32
(Mat. 24:29-36; Luk. 21:25-33)
24 #
Yes. 13:10; Yeh. 32:7; Yoe. 2:10, 31; 3:15; Meng. 6:12 ”Sine i tempo atuu, umarino pobobarasaia atuu, mata oleo ta gagi wongi-wongi ka wula nahi mewanta 25#Yes. 34:4; Yoe. 2:10; Meng. 6:13ka anano wula ira ntedodonta inso i langi, ka luwuno pabawano langi ta melelu. 26#Dan. 7:13; Meng. 1:7I tempo atuu mia ta kumita Ira i Ana Manusia hawe a laro nseru saru luwuno pabawa ka maramba-Do. 27Ka i tempo mbo'u atuu Ira metena ka dompeluarako mala'eka-Do ka Ira pumpuo luwuno mia bininiki-Do inso a opaa siuno tolino, inso i tompano tolino hawe i tompano langi. 28Impo'alamo pepaguru inso a mpotundaano tutulu mongkona keu ara. Tewala molusaomo luwuno sampa motutuno ka mompu'u mentumba, imento'orio, nine tempo motu'i-tu'i rangkuomo. 29Kanatuu koa mbo'u, tewala imengkitao gaagi luwuno atuu, imento'oriomo nine tempono rangkuomo, a mpuu pewowano. 30Kupauakomiu: Menteeano mia andiodo nahi ira metampula, ba napi gagi luwuno atuu. 31Langi ka tolino ta tampula, sine pau-Ku nahi ta tampula.
32 #
Mat. 24:36
Sine mongkona oleo andio ke tempo atuu nahina maupo te'asa mia anu tumo'orio, luwuno mala'eka i suruga naahi, ka maupo Ana naahi, butu Ondae i Ama.”
Patudu ka impetangkoro
13:33-37
33”Impopesu'uimo ka impetangkoromo! Hangano nahi imento'orio ba te'ipia ihawe tempono. 34#Mat. 25:14; Luk. 12:36-38Ka teweweuno mengkena kana aasa mia anu lumako a nsingge inia, anu mobinta rahano ka iweeako ira atano pabawano singge mia saru anggaano, ka parentao anu modagai pewowa ka ipedaga-dagai. 35Onaemo pu'uno impedaga-dagaimo, hangano nahi imento'orio ba te'ipia ipekule umbu raha atuu, tamo wongi, ke ntonga wongi, ke tehine wongi, ke mo'o-mo'oru ntu'u, 36ba mansa hawe mepakada ka si hawe komiu tekonai mpoturi. 37Hapa anu Kupauakomiu, Kupauako ira luwuno mia: impedaga-dagaimo!”
Currently Selected:
I MARAKUSU 13: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
