I MATIU 9
9
Mia luuka pinokotompa
9:1-8
(Mrk. 2:1-12; Luk. 5:17-26)
1Umarino atuu me'ula Iramo i Yesu a laro bangka ka Do'amba mesakiako. Ka Do'amba hawe a ngkota-Do. 2Ka domewawaomo mia ndi Ondae aasa mia luuka anu kombole-mbole a mpoturiano. Mansa-Do kumitao i Yesu pompe'ala-alado, mepau Iramo a mia luuka atuu, ”Pe'ala-alaomo, hei ana-Ku, halamu inampuniomo.” 3Onaemo ka dompotae ba opia ira anu mponto'ori Taura i laro aroado, ”Ipepaukiako Ira Ue Ala.” 4Sine Doto'orio i Yesu pinewowolodo, ka Do'amba mepau, ”Tembio ka impompewowolo anu mosa'o i laro aroamiu? 5Isuake anu lalu moruana, motae: Halamu inampuniomo, ke motae: Pewangumo ka pelempamo? 6Sine ka imento'orio, nine i wawontolino andio i Ana Manusia pabawa mo'ampuni hala” — ka i'amba mepau Iramo a mia luuka atuu —, ”Pewangumo, tandeomo poturiamu ka pekulemo i rahamu!” 7Ka mewanguomo mia atuu ka ipekule. 8Ka mia hadio anu mengkitao anu gagi atuu medoito ka do'amba me'unde-unde Ira Ue Ala anu mompowee Iramo pabawa kanatuu a mia.
I Matiu puu popumpu sima'ulu tumonda Ira i Yesu
9:9-13
(Mrk. 2:13-17; Luk. 5:27-32)
9Mansa-Do lumako i Yesu inso i tu'ai, Dokitao aasa mia anu meneeako i Matiu mentoro a kantoro sima'ulu, ka Do'amba motaeakono, ”Tonda Akumo.” Onaemo ka ipentade i Matiu ka i'amba tumonda Ira. 10#Luk. 5:30; 15:1-2 Ka i'amba tempono Ondae i Yesu mongkaa a rahano i Matiu, mehawe iramo hadio puu popumpu sima'ulu ka mia ntehala ka mpongkaa mperonga-ronga saru Ondae ka ana guru-Do. 11Tempono domengkitao to Parisi anu gagi atuu, dompotaeako iramo ana guru-Do i Yesu, ”Tembio gurumiu ka Dopongkaa mperonga-ronga saru puu popumpu sima'ulu ka mia ntehala?” 12Dorongeo i Yesu ka Dopotae, ”Komba mia madoo anu mongkere sando, sine mia mahaki. 13#Hos. 6:6; Mat. 12:7 Gagi imelakomo ka impepaguruakonomo pengkonaano pau andio: Anu inehe-Ku onaemo pe'aroa ka pompehohawa ka komba pesomba, hangano hawe-Ku komba aiwa mompoboi mia mentee, tendeano mia tehala.”
Mongkona mempuasa
9:14-17
(Mrk. 2:18-22; Luk. 5:33-39)
14Ka i'amba mehawe iramo ana guruno i Yohane ndi Ondae i Yesu ka dompotae, ”Tembio omami ka to Parisi mempuasa, sine ana guru-Miu naahi?” 15Dosangki ira i Yesu, ”Polioke luwuno sambe'eno umbu ngkoroi tama mpompemasusa kontongaano umbu ngkoroi atuu kongko saru ondae? Sine ta hawe tempono umbu ngkoroi atuu inala inso ndi ondae ka i tempomo atuu ira mempuasa. 16Nahina maupo te'asa mia motompeliako asa nsore sawu anu wo'ohu a lemba anu laano, hangano tewala kanandio sawu potompeli atuu ta berio lemba atuu, ka i'amba kolangka-langkaino teberino. 17Kanatuu koa mbo'u anggoro anu sarai nahi inihii a laro ngkadu kuli anu laano, hangano tewala kanandio kadu atuu ta teberi ranta ka ite'uwu anggoro atuu ka kadu mbo'u atuu teberi-beri. Sine anggoro anu sarai domenaao mia a laro ngkadu anu wo'ohu koa mbo'u, ka ba kanandio tepekaria oruano.”
Anano petewawa a raha tepumpua
Beine anu mahaki merea
9:18-26
(Mrk. 5:21-43; Luk. 8:40-56)
18Kontongaa-Do i Yesu mepau kanatuu ndi ondae, haweomo asa mia petewawa a raha tepumpua, ka i'amba mesombai Ira ka ipotae: ”Anaku beine da sarai imate, sine I'aiwamo ka inaao kae-Miu i wawono, asalakono ta tuwu.” 19Mentade Iramo i Yesu ka tumondao mia atuu mperonga saru luwuno ana guru-Do. 20I tempo atuu aasa beine anu hopulu ka orua nta'umo tehineno imahaki merea aiwa rumangkuhi Ira i Yesu inso i bungku-Do ka i'anggao wuakino lemba meloe-Do. 21Hangano potaeno i laro aroano, ”Maupo butu ku'anggao lemba meloe-Do, aku tompa.” 22Sine Ondae i Yesu mewolili ka Dokitao saru motae, ”Pokorosoo aroamu, hei ana-Ku, ikaduduikomo pompe'ala-alamu.” Ka mompu'u tempo atuu tompaomo beine atuu.
23Tempono Dohawe i Yesu a rahano petewawa a raha tepumpua atuu ka kumita ira anu mpompuuri siloli ka mia hadio mpohohoi, 24motae Iramo, ”Imelakomo, hangano nana'ote andio komba mate, sine moturi.” Sine dompengingisii Ira. 25Mansado mensinaari mia hadio, mewinso Ira i Yesu ka Do'inio kaeno nana'ote atuu, ka i'amba mewanguomo nana'ote atuu. 26Ka tepaleleomo mongkona anu gagi atuu a luwuno wita atuu.
Ondae i Yesu mokotompao matado orua mia anu morawu
9:27-31
27Tempono Dopotilaloakono i Yesu pelempaa-Do inso i ra'ai, orua mia morawu tumondari Ira saru mebooli ka dopotae, ”Ipehohawa kamimo, hei anano i Daudi.” 28Mansa-Do mewinso i Yesu a laro asa raha, aiwa iramo orua mia morawu atuu ndi Ondae ka Dopotaeako ira i Yesu, ”Ipe'ala-alaoke, nine Aku mokoweweuo?” Dosangki Ira, ”Humbee Ue, kipe'ala-alao.” 29Ka Do'amba i Yesu umanggao matado ka Dopotae, ”Gagiomo ndi omiu montonda pompe'ala-alamiu.” 30Ka tewileomo matado. Ka Do'oliwi ira ntu'u i Yesu, Dopotae, ”Itangkoroo ka si hina maupo te'asa mia tumo'orio mongkona andio.” 31Sine ondae meluarako ka dopalele Ira a luwuno wita atuu.
Asa mia beebe pinokotompa
9:32-34
32Kontongaado meluarako mia anu umari morawu atuu, winawaomo ndi Ondae i Yesu asa mia beebe anu pinewinsokino onitu nsa'o. 33Ka mansano linuarako onitu nsa'o atuu, mokompepauomo mia beebe atuu. Ka mengkohali-hali iramo mia hadio, dompotae, ”Anu kanandio napi dohori mia mpokita i Isaraeli.” 34#Mat. 10:25; 12:24; Mrk. 3:22; Luk. 11:15 Sine dompotae to Parisi, ”Saru pabawano tadulakodo onitu nsa'o Iponsaariako onitu nsa'o.”
Pompehohawa-Do i Yesu a mia hadio
9:35-38
35 #
Mat. 4:23; Mrk. 1:39; Luk. 4:44 Kanandiomo Dosompoo i Yesu luwuno kota ka inia; Ondae mompaguru a luwuno raha tepumpua ka paleleo Lele Mawongkoa mongkona Poparentaa Suruga saru mokotompao luwuno haki ka molemaa. 36#Pod. 27:17; 1Mok. 22:17; 2Taw. 18:16; Yeh. 34:5; Sak. 10:2; Mrk. 6:34 Kumita ira mia hadio atuu, teleluomo aroa-Do i Yesu mehohawa ira, hangano memokendo ka ntepo'inee kana bimba anu nahina pakambi ira. 37#Luk. 10:2Ka Dopotaeako ira ana guru-Do, ”Sowia lano hadio, sine anu mo'angga tedei. 38Onaemo pu'uno impo'emamo a ueno sowia, ka Dopontena anu mpo'angga a nsowia atuu.”
Currently Selected:
I MATIU 9: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
