I MATIU 6
6
Mongkona pompowee pontulungi
6:1-4
1 #
Mat. 23:5
”Impe'ihilaroo, si meweweuo gau mpesombamiu i arodo mia ka domengkitao, hangano tewala kanandio, nahi komiu mpohawe tambomiu inso ndi Ondae Amamiu anu i suruga. 2Gagi tewala komompowee anu mentee, si paleleo mongkona atuu, kana anu wineweudo mia mpo'onde-onde a luwuno raha tepumpua ka a luwuno sala kodei, ka dome'unde-unde ira mia. Kupauakomiu: Menteeano mpohawe iramo tambodo. 3Sine tewala mompoweeko anu mentee, siimo ito'orio kae manggalimu hapa wineweuno kae ngkoanamu. 4Po'ineeomo pompowee anu mentee atuu ka itewuni iwineeako, ka Ondae Amamu kumitao anu tewuni Ira sumuloakomu.”
Mongkona mekakai
6:5-15
(Luk. 11:2-4)
5 #
Luk. 18:10-14
”Ka tewala komiu mpekakai, si mpekakai kana mia mpo'onde-onde. Inehedo mempauo pekakaido saru mpentade a laro raha tepumpua ka a ntepotowoano sala langkai, ka domengkita ira mia. Kupauakomiu: Menteeano mpohawe iramo tambodo. 6Sine tewala komekakai, pewinsomo a laro bolongkomu, tondoomo pewowa ka pekakaimo ndi Ondae Amamu anu kongko a ntewuniano. Ka Ondae Amamu kumitao anu tewuni Ira sumuloakomu.
7Ka mbo'u a laro mpekakaimu atuu si hadio mpena pau kana anu domeleleoakono mia anu nahi domento'ori Ira Ue Ala. Potaedo nine hangano hadiono pau pekakaido ta inindu. 8Gagi omiu si mengkana ondae, hangano Ondae Amamiu tumo'orio hapa anu kineremiu se'eluno napi ime'emao ndi Ondae. 9Onaemo pu'uno impekakaimo kanandio:
Amamami anu i suruga,
nee-Miu ka ipinokomempori,
10Poparentaa-Miu ka ihawe,
ka igagimo po'ehe-Miu
i tolino kana i suruga.
11Ipowee kami kaangamami oleo andio ka isompo
12ka I'ampuniomo halamami, kana omami mbo'u me'ampunio salado walimami ndi omami;
13ka si wawa kami a laro po'ara-arahakoa,
sine Ipotola kamimo inso ndi mosa'o.
[Hangano Omiumo anu me'ueo Poparentaa ka pabawa ka marambaa ranta nahina tampulaano. Ami.]
14 #
Mrk. 11:25
Hangano tewala ime'ampunio salado mia, Ondae Amamiu i suruga Ira umampuni komiu mbo'u. 15Sine tewala nahi ime'ampuni ira mia, Ondae mbo'u Amamiu nahi Ira umampunio salamiu.”
Mongkona puasa
6:16-18
16”Ka tewala mempuasa komiu, si mpopokitao rupamiu mompemasusa kana mia mo'onde-onde. Domebalio rupado, ka domengkitao koa mia nine kontongaado mempuasa. Kupauakomiu: Menteeano mpohawe iramo tambodo. 17Sine tewala omue puasa, lanaomo ulumu ka pero'umo, 18ka si domengkitao mia nine kontongaamu puasa, tendeano butu Ondae Amamu anu kongko a ntewuniano. Ka Ondae Amamu kumitao anu tewuni Ira sumuloakomu.”
Mongkona mopumpu arataa
6:19-24
19 #
Yak. 5:2-3
#Luk. 12:33-34”Si popumpu arataa i tolino; i tolino usu ka ta'ilasi ta sumolangio ka mia monako ta kumekeo ka iponakoo. 20Sine pumpuakonomo koroimu arataa i suruga; i suruga nahi ta sumolangio usu ka ta'ilasi ka mia monako nahi ta kumekeo ka monakoo. 21Hangano ba isua ipo'ia arataamu, i tu'ai mbo'u ipo'ia aroamu.
22 #
Luk. 11:34-36
Mata onaemo huluno koroi. Tewala moiko matamu, mewineomo asa ngkoroimu; 23Ba mosa'o matamu, wongi-wongiomo asa ngkoroimu. Gagi tewala mewine anu kongko ndi omue wongi-wongiomo, tedoaomo wongi mpusu wongi-wongia atuu.
24 #
Luk. 16:13
Nahina maupo te'asa mia mokompe'ue te'orua. Hangano tewala kanatuu, ta umo'aliaakono anu asa mia ka mehohawao anu susua, ke ta metenunu a asa mia ka nahi perioo anu susua. Nahi komiu mpokompe'ue ndi Ondae Ue Ala ka mpe'ue a Arataa.”
Mongkona salalaro
6:25-34
(Luk. 12:22-31)
25”Onaemo pu'uno ka Kupauakomiu: Siimo imesala-laroakono tuwumiu, ba hapa anu komiu mengkaano ke me'inuo, ka siimo imensala-laroakono mbo'u koroimiu, ba hapa ta pesangkamiu. Kombake tuwu atuu mentuduopo sekono kaanga ka koroi atuu mentuduopo sekono sangka? 26Kita iramo manu-manu i langi, anu nahi dompompaho ka nahi domensowi ka nahi dompopumpu kaangado a nsi'e, sine Dopaka ira koa Amamiu anu i suruga. Kombake olaiopo polaluamiu sekono manu-manu atuudo? 27Isemake i olomiu anu hangano sala-larono mokontiangio maupo te'asa hiku sala ntumuwuno? 28Ka tembio ka imensala-laro mongkona pesangkamiu? Kitao sisino bunga a lere, anu tuwu nahi po'angga ka nahi pohoru, 29#1Mok. 10:4-7; 2Taw. 9:3-6 sine Kupauakomiu: I Salomo maupo saru luwuno marambano nahi pesangka mengkena tekosino kana asa inso a bunga atuu. 30Gagi tewala kanandio Doramba-rambao Ue Ala ewo a lere, anu kongko oleo andio ka tisomo tinadi a laro api, nde nahi ta laluaopoke Dopoposangka komiu, hei mia anu makura pompe'ala-alano? 31Onaemo pu'uno siimo imensala-laro ka mpotae: Hapake anu ta kaangamami? Hapake anu ta inuamami? Hapake anu ta pesangkamami? 32Luwuno atuu dome'ungkeo luwuno tongku anu nahi domento'ori Ira Ue Ala. Sine Ondae Amamiu i suruga tumo'orio, nine imengkereo luwuno atuu. 33Sine ime'ungkeomo ari Poparentaa-Do Ue Ala ka mentee-Do, ka luwuno atuu Ira tumiangiakomiu. 34Onaemo pu'uno si mensalalaro mongkona oleo tisomo, hangano oleo tisomo hinao masusano onaeno. Masusaa asa oleo sompoomo tiano asa oleo.”
Currently Selected:
I MATIU 6: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
