Imama 8

Poronsoano i Haruni ka luwuno anano

8:1-36

1 # Pel. 29:1-34 Ondae i Ue mepau ndi Musa, 2”Poboio i Haruni ka luwuno anano meronga saru onae, ka alao luwuno sangka, lana po'urapi ka sapi lakino pesomba po'onini hala, orua bimba lakino ka baki me'ihi roti nahi peragi, 3ka i'amba tumena ira pepumpu luwuno bawaa i arono pewowa Kema Tepotowoa.” 4I Musa weweuo kana parenta-Do i Ue ndi onae, ka mpepumpu iramo bawaa atuu i arono Kema Tepotowoa. 5Mepauomo i Musa a bawaa atuu, ”Ndiomo pau peparenta-Do i Ue kai wineweu.” 6Ka i'amba i Musa tumenao i Haruni ka luwuno anano me'umpeda ka iwo'ohiako ira uwoi. 7Umarino atuu ipokonaakono i Haruni lemba meloe i larono, tumanggoakono peboo ntongano, mokonaakono lemba meloe i bungkuno saru lemba epo ndi onae, metanggoakono koloro tanggono lemba epo, ranta kai tetanggo moroso ndi onae. 8Ipokonaakono tutuwi rada ndi onae ka inaakono i larono tutuwi rada atuu Urimi ka Tumimi. 9Ka i'amba numaao peboo ulu a uluno, ka a peboo ulu atuu i arono inaao ramba-ramba ulu inso a wulaa onaemo ramba-ramba mempori kana petena-Do i Ue ndi Musa. 10I'alao i Musa lana po'urapi ka i'urapio Kema Mempori saru luwuno anu kongko i larono ka ipokomemporio luwuno atuu. 11Itawisiakono tedei inso a lana atuu a meda pontunua pepitu ka umurapio meda puntunua pesomba atuu saru luwuno parewano, bolusa pewo'ohia mbo'u saru empehino kai pokomemporio. 12Ka i'amba montawa tedei inso a lana po'urapi atuu a wawo uluno i Haruni ka umurapio kai pokomemporio. 13I Musa tumena ira anano i Haruni me'umpeda, ka i'amba mokonaako ira lemba meloe i larono, itanggoakono peboo ntonga ka ipeweweakono peboo ulu kana parenta-Do i Ue ndi Musa.

14Sapi laki pesomba po'onini hala winawa umpeda, ka i'amba i Haruni ka luwuno anano menaao kaedo a wawo uluno sapi laki pesomba po'onini hala atuu. 15Sapi atuu sinumbele, ka i'amba i Musa mo'ala reano, ka wunga ngkaeno hahiakono rea atuu a ntandu-tanduno a limbuno meda pontunua pesomba ranta ipokomemporiomo meda pontunua pesomba atuu inso a hala. Toreano rea atuu inuwu i totono meda pontunua pesomba. Kanandiomo ipokomemporio meda pontunua pesomba atuu ka iweweuakono pesintuwuano. 16I Musa umalao luwuno taba anu metako a ihi kompono, taba anu umapiio ate, ka orua wua horino saru tabano, ka i'amba tumunuo a wawo meda pontunua pesomba. 17Sine sapi laki atuu saru kulino, bauno ka ta'ino tinunu ranta kai pingko i bungkuno pekemaa kana parenta-Do i Ue ndi Musa.

18Umarino atuu winawaomo bimba lakino pesomba tinunu. I Haruni ka luwuno anano menaao kaedo a wawo uluno bimba lakino atuu. 19Bimba lakino atuu sinumbele ka reano ipesiwuiakono i Musa a limbuno meda pontunua pesomba. 20Bimba lakino atuu binatu-batu montonda tiano anu tinantui, ka i'amba uluno ka tia-tiano saru tabano itunuo i Musa. 21Sine ihi kompono ka witino wino'ohi a uwoi. Ka i'amba i Musa tumunuo luwuno bimba laki atuu a meda pontunua pesomba. Onaemo pesomba tinunu anu woono mompokomawongko, asa pesomba tinunu ndi Ondae i Ue, kana parenta-Do i Ue ndi Musa.

22Ka i'amba winawaomo bimba lakino anu susua, bimba pesomba poronsoa. I Haruni ka luwuno anano menaao kaedo a wawo uluno bimba laki atuu. 23Bimba laki atuu sinumbele, ka i'amba i Musa mo'ala tedei reano ka iponaakono a lewe biri koanano i Haruni, a ine wunga ngkae koanano ka ine wunga ngkae karu koanano. 24I Musa tumena ira luwuno anano i Haruni me'umpeda, ka i'amba monaa tedei rea atuu a lewe biri koanado, a ine wunga ngkae koana ka a ine wunga ngkae karu koanado. Toreano rea atuu ipesiwuiakono i Musa a limbuno meda pontunua pesomba. 25I'alao tabano, ikino anu mentaba, luwuno taba anu metako a ihi kompono, taba anu umapiio ate, orua wua horino saru tabano ka pa'a koanano. 26Inso a laro baki anu me'ihi roti nahi peragi anu kongko i aro-Do i Ue, i'alao asa roti bonggoli nahi peragi, asa roti bonggoli anu sinaloako lana, ka asa roti monipi, ka i'amba numaao i wawono luwuno taba ka pa'a koanano atuu. 27Luwuno inaao a pelengkaeno i Haruni ka a pelengkaedo luwuno anano ka luwuno pinesombaako gagi pesomba tinande i aro-Do i Ue. 28Ka i'amba i Musa umalao luwuno atuu inso a pelengkaedo ka itunuo a wawo meda pontunua pesomba, i wawono pesomba tinunu. Onaemo pesomba poronsoa kai gagi woono mompokomawongko, asa pesomba tinunu ndi Ondae i Ue. 29I Musa umalao radano bimba atuu ka ipesombaakono gagi pesomba tinande i aro-Do i Ue. Onaemo anu hinaweno i Musa gagi tiano inso a bimba laki pesomba poronsoa atuu, kana parenta-Do i Ue ndi Musa. 30I Musa mo'ala mbo'u tedei lana po'urapi ka rea anu i wawono meda pontunua pesomba atuu, ka i'amba tawisiakono i Haruni ka sangkano, a luwuno anano ka sangkado. Kanandiomo ironsoo i Haruni saru sangkano ka luwuno anano saru sangkado.

31Motaeomo i Musa ndi Haruni ka a luwuno anano, ”Imenahuomo bau atuu i arono pewowa Kema Tepotowoa. I ra'aimo asalakono imengkaano saru roti anu a laro baki pesomba poronsoa, kana anu umariomo kuparentaako ira: i Haruni ka luwuno anano asalakono mengkaano. 32Hapa anu torea inso a bau ka roti atuu asalakono imentunuo kai pingko ikaano api. 33Si melako inso a mpewowano Kema Tepotowoa i larono opitu oleo, ranta kai sompo rame-rameno poronsoamiu, hangano rame-rameno poronsoa ta wineweu opitu oleo tehineno. 34Kana anu wineweu a oleo andio, kanatuu koa mbo'u parenta-Do i Ue kai meweweuo pesintuwua ndi omiu. 35I larono opitu oleo asalakono impo'ia i arono pewowa Kema Tepotowoa meene ka wongi. Asalakono impetenunu meweweuo anu lano anggaamiu ndi Ondae i Ue kasi memate, hangano kanandiomo parenta-Do ndi ongkue.” 36I Haruni ka luwuno anano meweweuo luwu peparenta-Do i Ue telalo ndi Musa.

Currently Selected:

Imama 8: XMZ

Highlight

Compare

Copy